الأحد، يناير 22، 2006

أحياناً أتسائل

أحياناً أتسائل

هل من حق الأخرين أن يسخروا من مشاعرك أو أحلامك؟

هل من حق الأخرين أن يعتبروك دوناً عنهم من حيث المشاعر أو الأحلام؟

إذا لم تتفق مشاعرك و أفكارك مع الأخر فهل هذا يعطيه الحق أن يسفه من قدرك وأن يعتبرك ناقص إنسانية؟

هل توجد مستويات من المشاعر؟؟؟؟؟؟؟؟؟؟

بمعنى إننى لن أتناقش معك طويلاً لإنك لا تمتلك المشاعر الكافية لكى تتحاور معى

بمعنى اخر أنت غير كفؤ أن تخلط مشاعرك بمشاعرى؟؟؟؟؟

الأحد، يناير 15، 2006

الناس اللى بتضحك-فانتازيا

أنا الأن فى طريقى إلى عملى
أحاول جاهداً إبعاد كل مشاكلى و أفكارى الخيالية عن رأسى و التركيز فقط فى الأعمال التى سأقوم بها
أصل لمرحلة من التركيز لدرجة إننى لا أرى الناس من حولى ,فقط غاية إهتمامى هو الوصول إلى وسيلة مواصلات تقلنى إلى عملى
وصلت الأن إلى الشارع الرئيسى عبرت الحارة الأولى ووصلت إلى جزيرة الطريق منتظراً فرصة أخرى لعبور الحارة الأخرى و يستوقف إنتباهى شابة ذات شعر أسود منسدل على كتفيها قادمة من الإتجاه الأخر تريد عبور الشارع و تبتسم
من زاويتى أستطيع أن أرى أثر الإبتسامة على ركن شفتيها
أنظر للناحية الأخرى لأرى الشخص المحظوظ الذى نال هذه الإبتسامة ,لا أجد أحد يتلقى الإبتسامة
مجرد مارة ,بائع جرائد,تلميذ فى طريقه للمدرسة
إبتسامتها تعلق فى ذهنى فأعبر الطريق عائداً إلى حيث كنت و أسير خلفها
و
أنا:ممكن لحظة واحدة من فضلك
الفتاة "تنظر لى فى دهشة":أيوة
(أنتبه أن الفتاة تمتلك وجهاً ملائكيا مع بعض النمش البسيط)
أنا:حضرتك كنتِ بتضحكى ليه
الفتاة"ترمقنى الأن بإستهجان شديد:وإنت مالك و حضرتك بقى بتراقبنى ولا إيه
أنا:لا والله أنا بس لقيتك بتضحكى ,حبيت أعرف أنتِ بتضحكى ليه,من فضلك جاوبى سؤالى وماتستغربهوش
الفتاة:هوا الضحك حرام ولا إيه؟؟؟؟ ولا القانون بيعاقب دلوقتى اللى بيضحكوا فى الشارع
أنا:من فضلك حاولى تفهمينى أنا فعلاً يهمنى أعرف إيه هو سبب ضحكتك
الفتاة:ليه؟؟؟؟؟
أنا:الصراحة مش حقدر أوصلك الفكرة بس أنا بحب دايماً بأهتم إنى أعرف أسباب الحالة أكتر ما أشوف الحالة نفسها
الفتاة:يا سلام إنت شكلك كده بتستهبل
أنا:ماشى يا ستى بصى الضحكة اللى طلعت منك دى كانت من القلب إنت أكيد كنتى بتفكرى فى حاجة حصلتلك أو بتتوقعى حاجة حتحصل, محدش مأثر على ضحكتك غيرك
الفتاة:إنت أكيد شفت ناس قبل كده بتضحك فى الشارع ,عُمرك سألت حد السؤال ده؟؟؟؟
أنا:الصراحة دى أول مرة ,أنا ساعات باشوف ناس بتضحك ,بس دى أول مرة تيجيلى الجرأة واسأل حد
الفتاة:طيب لو شفت حد ماشى بيعيط أو زعلان حتسأله عن السبب
أنا:عمرى ما فكرت فى الحكاية دى يمكن علشان أغلبية الناس بتبقى ماشية زعلانة أصلاً
الفتاة:طب إفترض أنه كان فيه إتنين معديين أنا وراجل عجوز وإحنا الاتنين بنضحك كنت حتسأل مين فينا
أنا:ده سؤال مقدرش أرد عليه غير لما أبقى فى الموقف نفسه
الفتاة:تصدق بقى إن الراجل العجوز حتبقى ضحكته أحلى
أنا:إشمعنى ؟؟؟؟؟
الفتاة:إشمعنى علشان العجوز ده ما بيضحكش من فراغ ,أكيد هو شاف كتير فى الدنيا علشان كده ضحكته طالعة من القلب, لكن البنت أخرها ممكن تضحك لما تفتكر كلمة كان قالهالها الولد اللى بتحبوه,مقلب عملته فى واحدة صاحبته
أنا:كلامك معقول جداً
الفتاة فى تحمس :إيه رأيك لو سألنا أى حد معدى بيضحك ,إنت بتضحك ليه
أنا:مع إنى عارف إننا مش حنلاقى بس نجرب
الفتاة:لأ إطمن حنلاقى
نبدأ مع رجل مبتسم يسرع الخطى: لو سمحت بعد إذن حضرتك ممكن نعرف حضرتك بتضحك ليه؟؟؟؟
الرجل:الساعة 8:30
أضحك أنا و الفتاة على رده التلقائى
أنا :أكيد إفتكرنا بنسأل على الساعة
بائع الجرائد:طبيعة المهنة يا بيه لازم أضحك على طول فى وش الزبون
تلميذ ذاهب إلى المدرسة:عندنا حصتين ألعاب النهارده
فتاة:النهاره عيد ميلادى و خطيبى عازمنى بره
شاب:حسن شحاتة أخد حسام حسن المنتخب وساب بلال
رجل:مكتوب إن حسن صقر صلى الجمعة مع نظيف فمسكه المجلس الأعلى للرياضة
شاب:لأ أبداً إفتكرت واحد صاحبى وهو بيقولى إنه شاف فيلم إسمه الخاتم الملك طلع قصده ملك الخواتم
رجل:من الحزن باضحك
ولد صغير:حد يشوف قمر زيك على الصبح ومايضحكش
رجل عجوز:إيه ده أنا كنت بضحك ماخدتش بالى والله يا إبنى
شاب:إقرئوا الكاريكتير ده و حتعرفوا أنا كنت بضحك ليه

أنا:شفتى بقى يا ستى الناس بتجاوب إزاى بتلقائية
الفتاة:إنت عايز رأيى بجد
أنا:اه
الفتاة:أنا شايفة إنك لقيت بنت حلوة قلت تفتح معاها كلام بطريقة جديدة ,وممكن تمشى معاك وتعرف إسمها وناخد نمرة تليفونها كمان
أنا:أقسملك بالله إن ده ماكانش قصدى
الفتاة:حيث كده بقى أنا عايزة أقولك إنك أهبل,حد برضوه يمشى فى الشارع يسأل الناس هيا بتضحك ليه أنا قلت بس أسايرك شوية أشوف أخرتك أيه,دلوقتى بس ممكن أقولك أنا كنت بضحك ليه
أنا:خلاص مش عايز أعرف,أكيد ماكنتيش بتضحكى على حاجة ,دى أكيد غلطة فى تعبيرات وشك خلتنى أشوفك بتضحكى,على فكرة إنتى ممكن تكونى ماكنتيش بتضحكى ,أنا بس اللى شفتك بتضحكى و أقنعتك إنك بتضحكى ,عموماً شكراً على وقتك اللى ضيعتيه معايا
أكتشف إننى قد تأخرت كثيراً عن العمل فأقرر العودة إلى المنزل والنوم.

الأحد، يناير 08، 2006

الليلة الأخيرة - قصة قصيرة

لماذا إعتزل شريف سلامة؟؟؟؟؟؟؟
كثٌرت الإشاعات و التكهنات عن أسباب إعتزاله
البعض قال قصة حب فاشلة
أخرون قالوا إنه لم يستطع الصمود فى المجال الفنى
إشاعات و إشاعات
أنا فقط أعلم لإننى كنت من ضمن القلائل معه فى ليلته الأخيرة
هل تسمحون لى أن أعرفكم بنفسى فى البداية
عادل عبد السلام تجاوزت الأربعين ببضع سنوات
أعمل بالجمارك
أستطيع أن أرى الكلمة التى تتبادر إلى أذهان الكثير منكم عند سماع كلمة جمارك و إبتسامتهم الخبيثة
يجب أن تعلموا جيداً أن أغلب رجال الجمارك شرفاء ذوى ضمير حى
العمل فى الجمارك شأن أى مهنة أخرى بها الصالح و الفاسد
عن نفسى
أنا كنت من القلة الفاسدة
أنا لا أمتلك هدية القدر الميراث
فأنا متزوج و أملك ثلاثة أطفال والرابع فى طريقه للحياة
الحياة صعبة أنتم تعلمون
أعباء و أعباء ومصاريف ومدارس ودروس خصوصية و مواصلات
حسناً كل هذه التبريرات التى قدمتها لا تبرر خيانة الأمانة
ولكنى لست لصاً كبيراً
مجرد عمولات بسيطة و هدايا عينية
كى أستطيع عبور الأيام مع أسرتى
اه هناك شىء مهم يجب أن تعلموه عنى
أنا فنان
لو أردتم الدقة
كنت فناناً
صوتى لا بأس به,أكتب الشعر,أعزف العود
ولكن الوظيفة و قسوة الحياة قضوا على كل هذا
من وقت لأخر أذهب إلى حفلات المراكز الثقافية ,الأوبرا
أقضى فيهم ساعتين ,بالعربى كده بينعنشونى صح
أرجع إلى بيتى بعدها و أحضن عودى وأبدأ فى الغناء
منذ حوالى سبع سنين تعرفت على شريف سلامة
كانت أول حفلة له غنى فيها منفرداً على العود أغانى من التراث لسيد درويش ثم غنى فى النهاية أغنيتن من تأليفه و ألحانه
من الأغنية الأولى أدركت أته موهوب و مختلف
ذاع صيت شريف بعدها فى المراكز الثقافية ولم أفوت حفلة واحدة له كنت مستمع دائم له فى جميع حفلاته
بعد حوالى أربع سنوات من بدايته الفنية كون شريف فرقته الخاصة وبدأ يسلك مسلكاً مختلفاً فى غناؤه
بدأ يغنى للعديد من الأفكار الجديدة الطازجة
تقلصت مساحة الحب فى أغانيه
كان يغنى للوطن,للأرض,للصداقة,للحرية,للذكريات,للحياة
كل ما يمكن أن تتخيله من أفكار كان يناقشها فى أغانيها التى كان يشترك فى تأليفها مع فرقته
مع إرتباطى الشديد بحضور حفلاته بدأت أسأل عن أصوله و أستقصى المزيد و المزيد عنه
شريف سلامة من أسرة ميسورة الحال والده يمتلك شركة مقاولات كبرى,شريف يعمل مع والده فى الصباح وفى المساء تكون بروفات مع فرقته أو حفلة
يقولون عن شريف إنه دمث الخلق ,خجول جداً أى كلمة ثناء تحَمر وجنتيه
المقربون من شريف يقولون أن شريف رافض تماماً لفكرة إحتراف الغناء و أن يكون هو مصدر رزقه الوحيد
شريف إتبع نظاماً فريداً فى حياته منذ أن كون فرقته أثار سخط الكثيرون عليه ولكنه صمد
فمثلاً رفض تماماً إقامة أى حوارات صحفية معه أو فرقته كان يرى إنه لا يوجد ما يقولوه فكل ما يريدوا أن يقولوه يقولوه فى أغانيهم
منع إستخدام إستخدام أى تكنولوجيا فى أغانيه,لا توجد الالات موسيقية تعتمد على الكهرباء,لا توجد أجهزة صوت ,حتى الميكرفون ألغاه تماماً من حفلاته
كان يرى إن التكنولجيا مع فوائدها الجمة تقلل من إحساس الناس بالغناء
هو يغنى بحنجرته فقط
عدد الأفراد فى حفلاته لا يزيد عن مائتى شخص كان يرى إنه كلما زاد العدد كلما قل تركيزه وإحساسه
فهو يردد دائماً إنه لم يحلم بإنه يغنى أمام أكثر من عشرة أشخاص فما بالك بعشرات الأفراد
شريف لم يدخل يوماً الأستوديو كل أغانيه تم تسجيلها من حفلاته ونزلت على شرائط كاسيت بدون إذنه
تعرض لهجوم شديد من الصحف و المجلات الفنية ونعتوه بإنه ديكتاتور و معقد نفسياً
ولكن شريف صمد و أصبح ظاهرة فنية فعلاً
فى عز مجد شريف سلامة توقف عن الغناء لحوالى ستة شهور لأسباب غير معلومة
بل و توقف عن ااذهاب لعمله وقبع فى بيته رافضاً التحدث لأى من معجبيه أو أصدقائه

ستة أشهر كاملة لم أستمع إلى شريف
كنت فى أسوأ حالاتى النفسية
كان صوت شريف هو المهدىء لكل الامى النفسية
بعد تلك الستة أشهر تم الإعلان أخيراً عن حفلة لشريف سلامة
لأول مرة شريف يسمح بدخول ثلاثمائة شخص إلى محرابه الخاص,ومع ذلك نفذت التذكر يوم صدورها ,إستطعت الحصول على تذكرة بصعوبة شديدة من السوق السوداء بسعر يتجاوز ثلاثة أضعاف السعر الأصلى
فى تلك الليلة بدأت فرقة شريف كالعادة بعزف بعض المقطوعات الموسيقية قبل ظهوره
هل هذا شريف سلامة حقاً؟؟؟؟؟؟؟؟؟؟؟؟؟؟؟
الكثيرون لم يعرفوه من شدة نحافته
وبدأ شريف فى الغناء
شريف لم يغن من قبل كما غنى فى تلك الليلة
غنى كل أغانيه القديمة
كان يغنى بصوت مجروح
عن الوطن وعن فلسطين وعن بغداد
وغنى أغنية جديدة عن المعنى
كان يقول ويأكد لنا فيها إن كل شىء فى الحياه له معنى حتى ولو كان بسيط لكنه جميل
الألم له معنى,الأمل له معنى, الوطن له معنى
كنت فيما مضى يرتعش جسدى من أغانى شريف و حسه المرهف
تلك الليلة بكيت كما لم أبك من قيل
كان صوت شريف يحرقنى من الداخل
كنت أريد أن أجرى إلى شريف و أحضنه
وصمت شريف
تصقيف متواصل لمدة عشر دقائق,حتى فرقته كانت تصقف له
وشريف كان ينحنى بكل أدب مستقبلاً تهانى الجمهور,ثم إستأذن من الجمهور إنه يريد أن يقول شيئاً
لم تكن تلك عادة شريف أن يتحدث مع الجمهور كان دائماً خجله يمنعه من ذلك
شريف بدأ فى الكلام:هل من الممكن أن أسالكم سؤال وأرجو من الصدق و الصراحة فى الإجابة
الجمهور فى حماس:إتفضل يا شريف
شريف:إنتو بتحبوا الأغانى اللى أنا بقدمها
الجمهور يصقف بشدة و يهتف بإسم شريف
شريف يرفع ذراعه طالباً من الجمهور التوقف عن التصفيق:أنا بس عايز أسألكم أنا الأغانى بتاعتى بتمثل إيه بالنسبلكم
"وضعت يدى على قلبى, شعرت تماماً بما هو مقبل عليه ,كانت عشرتى الطويلة مع أغانيه قد جعلتنى أقترب من روحه"
يقف أحد المستمعين يبدو عليه الوقار:يا أستاذ شريف حضرتك بتقدم فن محترم جداً فى مواجهة المسخرة اللى إحنا شايفينها
شريف:أشكرك بس أنا نفسى أعرف أنا بقالى سنين بغنى للوطن و الإيمان والصداقة و حاجات تانية كتير ,نفسى أعرف حد فيكم مرة أثرت فيه أغنية خلته يغير من نفسه أو يعمل حاجة كويسة
سكوت تام من الجمهور
شريف:من فضلكم إتكلموا أنا بقالى ست أشهر مش قادر أغنى حاسس إنى مابقدمش أى حاجة مفيدة فى حياتى إيه فايدة إنى أغنى أغانى ليها معنى طالما الناس مش حاسة بيها, خلاص بقى أغنى هلس أحسن
يقف أحد الشباب:يا أستاذ شريف أنا حضرت الحفلة اللى غنيت فيها "لما ترجع" أول مرة ,وكنت متخانق مع أقرب أصحابى وحلفت إنى بعد م أطلع من الحفلة حاروح أصالحه على طول على بال ما وصلت شارعه قولت لنفسى إشمعنى أنا اللى أبتدى بالصلح وليه مش هوا
أحد الحضور:يا شريف إنت مهما غنيت صعب أوى إن حد يتأثر بكلامك صعب أوى الناس تتغير من كلام حلو بس
"لماذا توقف لسانى عن الكلام ,الدموع تخنقنى,أتنفس بصعوبة بالغة"
أحد الحضور:أنا فعلاً تأثرت بأغنية" أرضىٍ" و قررت إنى أشتغل علشان البلد مش علشانى أو علشان عيلتى ,بس بعد أسبوع قلت لنفسى هوا أنا يعنى اللى حاصلحها لوحدى أياكش تولع
واحد تانى:مش عارف أقولك أيه بس شيخ الجامع عندنا اللى إسمه رجل دين كل يوم جمعة يوعظنا ويقول كلام حلو ,بس عمرى ما عملت بيه

يبدأ الهرج والصخب يتزايد والأصوات ترتفع فى غوغاء وشريف يقف ممتقع الوجه يتلقى الضربات
يبرز صوت:وكمان الموسيقى حرام
صوت أخر:أيوة يا أخى إزاى عايزنا نسمع كلامك وهو قايم على باطل أساساً
صوت ثالث:وبتيجوا ليه يا ولاد الكلب طالما هى حرام
صوت أخير:يا شريف ده شعب إبن جزمة عمره ماحيتص
لح
شريف يقع مغشياً عليه فوق خشبة المسرح
كل تلك الأحداث التى وقعت قبل عام من الأن كانت تدور فى رأسى و أنا متجه إلى شركة شريف سلامة
أصعد سلالم شركته و أتوجه إلى السكرتيرة
تسألنى إن كان هناك موعد سابق, أقول لها إنه لا وإننى أريده فقط لخمس دقائق
تسألنى عن إسمى أجاوبها بإنه لن يتذكرنى ولكنى أعرفه جيداً ,تغيب لدقائق فى غرفة شريف ثم تأذن لى بالدخول
أدخل الغرفة
حقيقةً تغير شريف كثيراً ,أصبح ممتلاءً قليلاً,إرتدى نظارة طبية ,نظرة عينيه خاوية تماماً لا تحوى أى ذكرى من شريف القديم
رحب بى ودعانى للجلوس ,وطلب لى عصير ليمون
شريف بكل ود و ترحاب: متعرفناش بحضرتك
أنا فى حسرة:كنت فاكرك حتفتكرنى
شريف فى خجل شديد:أسف جداً هوا الصراحة الشكل مألوف بنسبة كبيرة بس مش قادر أتذكرك كويس
أنأ:أنا حضرت كل حفلاتك
شريف ينقلب وجهه فى لحظة:أسف جداً يا أستاذ هنا مكان شغل و أنا قفلت الموضوع ده من زمان
أنا:أنا كنت عايز أقولك بس حاجة واحدة
شريف فى نفاذ صبر:إيه
أنا:أنا إسمى عادل عبد السلام بأشتغل فى الجمارك و الصراحة أنا مرتشى باخد عمولات بسيطة فى مقابل إنت فاهم طبعاً
شريف بنظر لى فى إحتقار شديد
أتابع كلامى :بس أقسم بالله العظيم من ساعة حفلتك الأخيرة و أيدى ما لمستش الحرام,إنت يا أستاذ شريف ورتنى إن فيه لسة فى الدنيا ناس كويسة ,أنا بقيت إنسان تانى بسببك يا أستاذ شريف ,بقيت إنسان نضيف
أرى الصراع داخل عينيه
بريق ما يحاول إزاحة الغشاوة من فوق عينيه
فرحة تغشو وجهه لثوانى معدودة
شريف:تقدر تقولى حضرتك إيه المطلوب منى دلوقتى
أنا:مش مطلوب من حضرتك حاجة بس أنا كنت شايف إن ده حقك إنك تعرف إنك قدرت تحول إنسان فاسد زيى لإنسان كويس بفضل أغانيك
شريف:شكراً جداً يا أستاذ عادل بس تقدر تقول إنى نسيت الموضوع ده
أرى المعاناة الشديدة على وجهه,هو يعانى الأن كل مشاعر الفرحة و الألم و الحزن
لوحة سريالية للحياة رٌسمت على وجهه
أقف معلناً إننى لن أخذ من وقته أكثر من هذا و إننى أديت مهمتى و أرضيت ضميرى
شريف يقف مودعاً:فرصة سعيدة يا أستاذ عادل مسرور جداً بمقابلتك دى والله
أغادر غرفته وفى نهاية الرواق المؤدى إلى غرفته أسمع صوته ينادى بإسمى
يسرع الخطى إلى ويقول أنا قولت عيب برضوه لازم أوصلك لحد باب شركتنا
أنا:حضرتك ذوق جداً مش لازم تتعب نفسك
شريف:يا راجل عيب دانتا ضيف عزيز
يتأبط ذراعى ونبدأ فى السير
أبدأ فى غناء أحب أغانى شريف إلى قلبى بصوت خفيض
صدقنى يا صاحبى
لسة الأمل موجود
أن الحياة تبتسم
وأن الورود تترسم
فوق خد طفلة جميلة

شريف ينظر إلى و أنا أغنى
أتوقع أن يشاركنى الغناء ولكنه يصمت تماماً و تبدأ الدموع فى غزو عينيه
على باب الشركة يقول لى شريف:أستاذ عادل الشركة دى شركتك تيجى فى أى وقت ومكتبى دايماً مفتوحلك
أودعه شاكراً كرم ضيافته
أخرج من الشركة إلى الشوارع
أسير وأنا أصفر واضعاً يدى فى جيوبى كأنى فى بدايات شبابى
لأول مرة أشعر أنى عملت عملاً صالحاً فى دنياى
حقيقةً أنا لا أزال كما أنا
مرتش حقير
الحياة تثبت دائما ضعفى الشديد
لازلت أتقاضى الرشاوى
أشعر أنى أريد أن أخنق هذه الحياة التى تتفنن فى إذلالى

أقر فى نفسى أن شريف لا يصلح لهذه الحياة
كان بودى أن أكون شخصاً صالحاً لأجلك أنت فقط يا شريف













الخميس، يناير 05، 2006

للأسف

كنت قد تركت مدونتى الأصلية ملك وكتابة دون سابق إنذار دون حتى أن أعتذر لزميلى فى المدونة ملك
صراحةً كان تصرف فى قمة عدم الذوق منى
أعلم هذا جيداً
ولكن كان لدى أسبابى الشخصية لترك المدونة التى كنت قد إرتبطت بها
والإنتقال إلى مدونتى الحالية ماشى الطريق
من وقت لأخر كانت نفسى تناوشنى بالرجوع إلى مدونتى الأصلية ملك و كتابة
ولكنى قررت لغلق أى باب للتراجع تغيير إسمى من كتابة إلى
ماشى الطريق
وأن يرتبط مشوارى فى التدوين بهذه المدونة فقط وشكراً

الأحد، يناير 01، 2006

برقيات

بمناسبة السنة الجديدة قررت أبعت برقيات للناس اللى لعبوا أو لسه بيلعبوا دور فى حياتى
الصراحة كان فيه ناس كنت مستخسر فيهم ثمن البرقية
بس قولت المسامح كريم يا واد يا كتابة


حمادة إبن أختى
برقية أولى يا إبنى إعتقنى واللهى حالعابك بالكمبيوتر
برقية إتنين يا إبنى عيب أنا إسمى خالو مش عم الحنجرة
مريم بنت أختى:أخر كلام الشوكولاته بالمعلقة بعشر بوسات,حتقوليلى البوس خلص حاكلها أنا
أم براء ربنا يخلليك كل اللى بتحبيهم ويخليكى لكل اللى بيحبوكى
مؤمن
برقية أولى هات نفس
برقية إتنين اللى يشرب لوحده يسكر
كريم الخنازير الصغيرة بتقولك كل سنة وأنت طيب
أحمد عارف يا إبنى بطل تفتى بقى نفختنى
توتو يا إبنى ركز شوية ماتكررش مأساة إبن خالتك
أحمد كامل يو ار ويلكم إن إيجيبت
عمرو كامل ذلتنى على كود الخرسانة يا أخى كل سنة وأنت ظابط
وليد كامل بطل تلعب بالوينكس على الم إس ان يا بابا
مؤمن عارف معلش ملكش نصيب فى الجاتوه
مهاب
برقية واحد من غير كلام وحشتنى
برقية إتنين أموت وأشوفك بالغطرة و العقال
بسنت
برقية واحد أسف
برقية إتنين أسف
إنجى الصراحة أنا مش قادر أفهمك ممكن تساعدينى
رضوى
برقية واحد كل سنة وأنتِ طيبة
برقية إتنين الصراحة كان نفسى أروح علشان عارف إن ده هيسعدك أنا أسف جداً
برقية تلاتة إنجزى يا ماما إنتِ طبعاً فهمانى
مصطفى أحمد إنت أجدع واحد شفته فى حياتى
علاء أنا لسة باعتلك مسج بدعيك فيها إنك تبطل جندلة وتعرف تسوق كويس والإتحاد مرة يرفع راسك ومصطفى يبطل ينفخ عليك
عبدالله الوحش أكيد إقتنعت دلوقتى إن العقيد أكبر من الوحش
معتز يوم بعد يوم بتأكد إنك شخص كويس بس ده مايمنعش إنك تخلص الهارد بسرعة
شريف زهيرى سواء أنا واحشك أو مش واحشك إنت واحشنى كتير أوى
رمضان
برقية واحد حسام بيقولك ينزل حجر تانى ولا لأ
برقية إتنين يا حريمك يا ضانى
زيكس إنت يا إبنى ضحكة إسكندرية
البرى ربنا يزيد من حبنا لبعض
مؤنس إنت أخر الرجال المحترمين
محمد خميس حضر البلاى إستيشن على بال مأكروت البوست ده
أحمد عبد القادر شايفك يا وسخ سيب البت الروسية يا ولا
محمود سعيد هى مطروح سقعة أوى فى الشتا زى ما بيقولو
شحاتة أيوة يا عم فيه جزء خامس من لورد أوف رينجس مصدقك طبعاً
شعبان الخمس أدوار اللى فاضلين يخلصو الإسبوع الجى فاهم
جمعة الجيش للجدعان
باسم هوا فين الجبل الأحمر ده .........هو ده الجبل الأخضر ولونوه........... إسود واللهى
هشام فتح الله بص أنا أهوه ببعتلك برقية مع إنى عارف إنك حتبقى نايم إصحى بقى السنة خلصت
مدحت بقالنا كتير ما إتكلمناش بقالنا كتير ما إتقابلناش
حازم فاروق مع إنك حرقت دمى فى المشروع بس كل سنة و إنت دماغك أكبر
حجازى السنة دى إن شاء الله حِلوة
إسلام فتحى يا ريت قبل ما تنادينى علشان النت الواقف تبقى تركب الكابل الأول
أمير وحمادة اللى حيعمل دونلود فيكم حأطلع بوزه
باشمهندس محمد حسن إستحملتنى كتير معلش لسه حتستحملنى كمان
باشمهندس أحمد حسن ربنا يكون فى عونك
أستاذ شريف أموت وأعرف ليه بعاملك ببرود أسف يا عم
أحمد سالم صباح تلفيق الشغل والتزويغ
دكتور خالد إنت بجد قدوة ليا
دكتور زكى أبوسك إيديك تنزلنى موقع يا دكتور
أشرف الكبير بدعيلك من قلبى إن ربنا يشفيك
أشرف الصغير عالحلوة والمرة سوا

نوال الزغبى بكرة تروق وتحلى يا جميل
أنغام بأمانة أحلى شريط السنادى
بريان دى بالما وحشتنى أفلامك يا عم متشوف شغلك بقى
تيم برتون صباح الفانتازيا
شارلى هوفمان أنا برفعلك القبعة إحتراما لعبقريتك
أحمد البيه يا ريت تبطل كتابة علشان إنت حمار كبير
بلال فضل أموت و أعرف إنت كويس ولا وحشٍِ
إبراهيم عيسى لمن تقُرع الأجراس

برقيات خاصة
كلية الهندسة ............................................................ كلام أبيح البنت اللى بتكتب البرقيات مرضتش تكتبه
عاطف الطيب الله يرحمك
زرياب إوعى تبطل كتابة
أولاد شارعنا:عزوتى
إخوانا السودانيين اللى ماتوا دمكم فى رقبتنا أظن كده عدانا العيب
مرسى عطا الله:ياااااااااااااااااااااااااااااااا رب
محمد عيسى يا إبنى إنت لو جسمك مات فأنت روحك معايا على طول
الراجل بتاع الوصلة
برقية واحد يعنى يا إبن الحمار إنت عندك قناتين بس شوتايم تحطلنا على واحدة فيهم أنيمل بلنت
برقية إتنين الله يحرق دمك زى ما بتحرق دمى
المدونين وقارئى المدونات كل سنة وأنتم بخير ومصر بخير
البت اللى بتكتب البرقيات إنتِ صوتك حلو أوى إنتِ إسمك أيه

Free Web Site Counters