منسى

يوميات

السقعة الجامدة الصعلكة فى الشوارع لوش الفجر الأيدين اللى مبتطلعش من الجيوب السجاير العيون الحزينة و أنا و الطريق إشارات المرور و زمامير العربيات و صفارة لأغنية قديمة و عبدالحليم و السينما و تليفونى المقفول و الأرق و النسكافيه و مجات النسكافيه و حضن أمى , والنضارة المكسورة والأبتسامة اللى ملهاش معنى و الكلام اللى مش مترتب والكتابة والقلم والورق المتقطع و القراية و الكتاب اللى جنب السرير و السرير والبطانية والشيكولاتة و البحر والكورنيش و المصحف و سجادة الصلاة و أذان الفجر و مفتاح الشقة والبنات الحلوة وعينيكى العسلى و ديل الحصان و الدبلة و الياسمين و الكمبيوتر و الأنتظار و الملل والفراغ و الوحدة والبكا والخوف و الضياع و الجرى و الأكل و الصحاب و الاشىء و الأمان و الأمل و الضحكة الحلوة

رفيق
الفكرة غريبة جداً أنا مش قادر أصدقها ولا أقتنع بيها لحد دلوقتى , فكرة إنك تقرر إنك تمحى شخص من حياتك ومن حياة ناس تانيين عن طريق إن الناس اللى بتحبه تقدر تنساه بالمعنى الحرفى للكلمة ,
إزاى إن إحساسكم بإن وجوده بيرمى ظل كئيب على حياتكم
أسف جداً على التعبير الصعب ده بس هو مُعبر جداً و إقتناعكم بإن أفضل حل بإنه يخرج من حياتكم بالنسيان
حتشيل كل تفاصيله المتشابكة معاك فى حياتك أى تفصيلة بسيطة ممكن تفكرك بيه متستغربش لما تلاقى نفسك بتلاحظ حاجات غريبة بتربطك بيه ولكنك وبكل إخلاص حتقدر تنزعه منها
إنت لوحدك علشان تقدر تنسى حد بتحبه فده صعب وعلشان هو بيحبك فصعب أوى إنه برضخ لفكرة إن اللى بيحبوه عايزين ينسوه , فاهمنى ........ لو كان فيه لسة ناس بتحبه ماكانش حيتنسى
فى الأول حتبتدى تتجاهل إنك بتفكر فيه حتلاقى نفسك عندك حنين ليه أكتر حتى من قبل كده بكتير
منطقى مش كده برضوه ؟؟ الحب اللى بينكم بيقاوم رغبتك فى إنك تنساه وعلشان كده حتلاقى إننا منين مابنتجمع بنتفادى الكلام عنه , بنتعمد كده بكل قسوة , الأستمرار فى التجاهل بيخليه يتلاشى فعلاً و يختفى من كلامنا ومن قلوبنا ومن حياتنا تماماً , هو نفسه حيسحب نفسه واحدة واحدة من حياتنا
شعورى فى الوقت ده مممم الحكاية مش تأنيب ضمير والله بس ألعن حاجة فعلاً إنك حتحس إنك خسرت نفسك حتحس بإنك بقيت ميال للعزلة حتلاقى إنك علشان تنسى واحد أٌجبرت إنك تنسى نفسك

عابر
أيه السبب اللى يخليك عايز تنسى حد بتحبه و إنت واثق و متأكد من إنك بتحبه زى ما إنت واثق و متأكد من إنه بيحبك
تفتكر إن وجوده ممكن يكون بيشكل عامل ضغط نفسى و عصبى عليك للدرجة اللى تخليك عايز تحذفه من حياتك
لو قلتلك إن هو ده السبب ممكن يكون ليك الحق ساعتها إنك تتهمنى بالأنانية و بإنكار أى علاقة جميلة بتربط ما بينا و أكيد حتقولى كمان إنى كان المفروض إنى أمدله أيدى و أساعده ووو
حرد عليك و أقولك إن ساعات التحرر من علاقة الحب ده بيكون ممتع و ضرورى جداً التحرر من العهود و الألتزامات متعة لا يستهان بها صدقنى
حتقولى طيب و الحب اللى فى قلبك , سيبك من الشخص التانى يتحرق يولع يا سيدى طيب أنا مش حيأثر فيا غيابه ده
أكدب عليك لو قلتلك إن غيابه مش حيأثر فيا و يحز فيا جداً مش تأنيب ضمير والله أنا مش واطى أوى كده أنا فعلاً كنت بحبه
واحشنى مممم واحشنى واحشنى واحشنى المرحلة اللى بتوصل فيها إنك تقدر تنسى الشخص ده فعلاً هى المرحلة اللى حتبقى فيها كلمة واحشنى كلمة عادية جداً , دلوقتى أقدر أقولك بكل صدق إنه مش واحشنى و إنى فعلاً قدرت أنساه

حبيبة
ساعات لما بتلاقى حد بيحبك أوى و إنت مش قادر تحبه بالمثل مش قادر تديله الحب اللى بتشوفه فى عينيه فى نظراته فى لمساته فى كل كيانه
فى وقت معين لما بتلاقى إنك حاسس إن فيه جواك طاقة كبيرة و الشخص اللى بيحبك مش عارف يخليك تطلعها حتحس بالطمع حتحس إنك تستحق أفضل من كده و إنك تستحق شخص أحسن منه
الواحدة مننا لما بتلاقى واحد بيحبها و مبيتقلش عليها لأنه بيبقى عارف إن كل حاجة فيه بتقولها إنه بيحبها
مش حيقدر يمسك نفسه و حيقولها أنا بحبك و حيبتدى يرقص , هو مجرد إنه قدر يطلع الأربع حروف دول
ب ح ب ك ده ممكن يكون أكتر من اللى بيتمناه وهو فى عز رقصته حيبتدى يستنى منها الرد
هو و هى عارفين إنه بكلمة منها تقدر ترفعه سابع سما زى مابكلمة منها برضوه تقدر تنزله سابع أرض
الواحدة مننا بيبقى صعب أوى عليها إنها ترد فى موقف زى ده و غالباً بترد رد مايع زى خليك مكانك شوية حفكر
خلاص حتوصل لقرار حتنساه , هى فكرت مرة و إتنين و تلاتة و حسمت أمرها حتنساه
الغريب فى الأمر إنها حتكتشف إنه صعب فعلاً إنها تنساه حتستغرب بس حتحاول مرة و إتنين و تلاتة
مع محاولاتها المستمرة حتلاقيه إبتدى يساعدها إنها تنساه , إبتدى يلقط طرف الأشارة و يخرج واحدة واحدة من حياتها
وقتها ولما يختفى فعلاً من حياتها حتلاقيها بتسأل نفسها يا ترى ريحها ولا ألمها إنه عينيه مكنتش فيها أى عتاب ولا لوم وهو بيتنسى من عينيها

يوميات
مؤلم جداً إنك تحس إنك معدش ليك مكان فى قلب حد بتحبه و مؤلم جداً إنه فى حد بيحاول ينساك
فى الأول حسأل نفسى ليه .... أنا عملت أيه
ماشى أوكى مفيش مشاكل علشان أكون موضوعى مع نفسى و أحدد المساؤى اللى فيا حبتدى أضغط على نفسى أكتر و أكتر و أكتر حعيط ححس فعلاً إنى المفروض أتنسى ,
فى وسط العياط ححس بإنى شخص كئيب جداً و إن كلام اللى قرروا ينسونى صحيح
ماشى مفيش مشاكل حستقبل الأمر بروح رياضية
فى الأول حقاوم رغبة الشخص اللى بحبه و بيحبنى إنه ينسانى
حبتدى أقوله لأ و حقاومه بعنف بس بعد فترة فيه ناس فعلاً حكتشف إن الأسباب الى تخليهم يفتكرونى أقوى من الأسباب اللى تخليهم عايزين ينسونى , فى لحظة زى دى حتبقى فى حيرة ما بين إنك فرحان بإنك إطمنت إنك ليك مكان فى قلب حد و شعور بالأسى لأن فيه حد بيحيك حاول ينساك و يشيلك من حياته
عارف دايماً الناس اللى بتبقى عايزة تنساك و بتقدر فعلاً إنها تنساك هى الناس الأقرب ليك , مش عارف ليه بس غالباً لأن مش بتكون متخيل إنه حييجى يوم و يقرر إنه ينساك بيكون قريب جداً ليك فمبتديش خوانة خالص علشان كده لما بيقرر إنه يخرجك من حياتك المفاجأة بتكون عنيفة جداً عليك بتكون أقوى من أى قدرتك على المقاومة
الشخص الثانى بيتصور إنك بتقاوم فكرة نسيانك مع إنه لو يعرف إنك فى الوقت ده بتكون فاقد القدرة على المقاومة و إنه هو نفسه من غير مايحس هو اللى بيقاوم إنه ينساك

رفيق
الحاجات اللى بتقع واحدة ورا التانية الحب و الصداقة و كل حاجة حلوة جوايا بتروح و أنا بنساك , كل الذكريات اللى كانت بينا زى ماهى ماراحتش على فكرة لسة فاكرها كويس بس خلاص مبقاش ليها طعم بجد والله , إنت مبقتش موجود جوة الذكرى أنا فاكر إنك كنت فيها بس إنت خلاص بقيت برة الصورة
كلامى مش مفهوم معلش سامحنى ولا أقولك لأ متسامحنيش ليك حق تزعل أنا عارف
يا ريت يا أخى ذكرياتنا دى كانت إتمسحت
عارف أنا دلوقتى بقيت بكتب يومياتى بجد والله عارف إنك حتضحك للصبح لو سمعت الجملة دى حتقول معقول مسك قلم و ورقة وبيكتب يا ماشاء الله يا ماشاء الله
أنا بس حاسس إنى بتنسى حاسس إنى مبقاش ليا وجود فبقيت بكتب بوثق حياتى بربط نفسى بالدنيا حتى ولو كان بحبر وورق

عابر
على فكرة هو كان عايز يتنسى بجد والله أنا مبكدبش
فيه ناس بتبقى عايزة كده , بتبقى عايزة تحس بكده إنها مغدور بيها , فيه ناس تحب تبان أدام نفسها إنها مظلومة و إن الزمن و الدنيا و الناس على طول قاسيين عليها
مش حنظلمه فى الأول هو حيبقى مش عايز حد ينساه . حاجته للحب حتبقى قوية جداً و تمسكه بالعلاقات الأجتماعية بس لما بيلاقى إن مقاومته بتضعف شوية بشوية خلاص بيرمى أوراقه و يبتدى يلعب دور المهزوم ببراعة تامة
حيسلم أسلحته وعينه فى الأرض يجر رجليه لورا
أكيد ساعتها حيقولك جملة يكسب بيها نقطة جوة نفسه حيقولك حاجة زى أنا أسف حيبتسملك إبتسامة مُرة و حيحاول بأقصى جهده إنه يبينلك إنك على حق و إنك مش غلطان و إنه فعلاً شخص سىء أو أو و يقعد يذم فى نفسه و يحاول إنه يحسسك بتأنيب الضمير , سعادته إنه يشوف نظرة الأحساس بالذنب جوة عينيك وهو بيشوفها حيعرف خلاص إنه كسب نقطة لصالحه و ساعتها مش حتفرق معاها حكاية نسيانك ليه .

حبيبة
عارف أيه المشكلة اللى بتحصل و بتبقى عارف إنها حتحصل كده كده إننا بنبتدى نحس باللى بيحبنا لما بيبعد عننا نبتدى نشوف فيه حاجات حلوة مكوناش شايفنها فيه لما كان قريب مننا
حفتح جواباته وحبتدى أقرا فيها , ححس دلوقتى بس أد أيه كان كلامه حقيقى و صادق
حيرجع ؟؟؟ حقنع نفسى إنه حيرجع وعلشان كده حقرا جواباته كل يوم
حيرجع ؟؟؟ مفتكرش , صعب أوى إنك تكتشف إنك مش باين فى عينين اللى بتحبه
حيرجع ؟؟ كل ما أقرا جواب من جواباته أعشم نفسى و أقول صعب أوى إن حد يكتب كلام زى ده و ينسى حبيبه حتى لو حبيبه نساه
و أرجع أسأل نفسى السؤال بشكل مباشر أيه أكتر ممكن يجرحك ويتألمك أكتر من إنك تعرف إن أمنية اللى بيحبك إنه يقدر ينساك
ممكن يسامحك لو كدبت عليه غدرت بيه لكن تقوله إنك بعد ما فتحتله حضنك مش قادر تحس بيه و إنه أصلاً مالوش وجود فى حياتك , صعبة مش كده برضوه

جواب قديم
أنا مبعرفش أقول كلام حب ومبعرفش برضوه أكتب كلام الحب و الغزل و الغرام إلخ إلخ إلخ , بس على فكرة أنا قبل ما أعرفك , كنت حبيب كبير اه والله لأ أعجبك يعنى و أعرف أكتب معلقات فى الكلام ده
و على فكرة كلامى حتى و لو كان بيبان مفتعل ف أنا ببقى حاسه فعلاً مش ذنبى إنه ممكن يبان كده مش ذنبى إنى مبعرفش أكتب يعنى سيبك إنتى بصُى أنا حقولك من الأخر
أنا بحس بالكلام العادى اللى بكتبهولك أكتر من أى كلام تانى زى لما أكتبلك مثلاً عن يوم عادى فى حياتى , يوم روحت فيه الشغل و حصلت فيه حاجات عبيطة زى إنى نسيت المفتاح فى باب الشقة أو إنى مثلاً فضلت مستنى الأقى مواصلة لمدة ساعة , كلامى أهبل و عبيط صح حقك تقولى كده
بس المشكلة اللى بتواجهنى إنك بتكونى معايا فى كل لحظة فى يومى بتلومينى مثلاً على إنى نسيت المفتاح فى الباب و تدوسى على زر ستوب بتاع الأسانسير على بال محصلك فى الباركنج بتبقى واقفة بتتكلمى معايا و بتونسينى . فهمتينى أنا من الأخر قصدى علشان أنا عارف إنك عبيطة و مش حتفهمى الكلام سورى سورى عارف إن كلمة عبيطة دى بستفذك قصدى يعنى إنك بتكونى معايا فى كل لحظة
فهمتينى ؟؟؟ يا عبيطة
إحم كنت ناوى أختم الجواب على كده بس الصراحة إتكسفت إن كلمة عبيطة تكون هى أخر كلمة
بقولك أيه صح أنا ب ح ب ك

علشان منساش

شارعنا أهدى شارع فى المنطقة و ضلمته بعد تمانية بليل واللمب اللى متصلحتش من بعد ما بطلنا نلعب فيه , عبد الناصر من أول النفق بنزلايته ولحد الأكاديمية العربية , الشجرة اللى قدام بيتنا , إسكندر إبراهيم بالقهاوى بتاعته و الحريم بتاعته برضوه , بالسهر فيه لحد الصبح , بعجيبة اللى ميحلاش عليها الشاى إلا بعد واحدة بليل و الجو رايق وجميل, بزحمة و دوشة المنطقة دى فى الصيف ل أبوربيع و ساندويتشات الفول بالسدق للمصطبة اللى جنب أبو ربيع اللى كنت باكل عليها ل شوارع ميامى الجوانية و التوهان اللذيذ
فيها بالنفس اللى تطلب جاتوه إتناشر بليل من عند كلاسيك و تشكيلة شرقى من عند شهد الملكة
تحية من قلبى لكل جامع حاولت أحفظ فيه القرأن ومكملتش للأسف و صلاة العيد فى شرق المدينة و الشارع مردوم ناس بتكبر للأنتعاش اللى بحس بيه و أنا راجع من صلاة الفجر
سلام كبير لمدرسة على إبن إبى طالب بس مجدى كامل لأ علشان هيثم جار القمر مايزعلش ولا أنا كمان أزعل الصراحة للعب الكورة قبل و بعد المدرسة بالكورة البلاستيك أم نص جنيه لبتوع النشان للناس اللى بطلت تبيع قصب لعصام السحرى و القصص بتاعته والكورة البوليتكس أم تلاتة جنيه و نص لمحلات البلاى إٍستيشن وبحر ميامى و سيدى بشر للمشوار المبهج و إحنا شايلين الشماسى و رايحين البحر للحفرة اللى بتتعمل لحد ما توصل إيطاليا , لسندويتشات الكفتة و السدق اللى بتتاكل و هى مليانة رمل من كُتر الجوع والجمل المعتادة اللى بتسمعها أول ما تدخل الشط زى البحر حصيرة النهاردة ., البحر فيه سحب , البحر فيه قناديل , الموج عالى النهاردة , المية صافية النهاردة إنت لو وقفت فى المية حتشوف رجليك , المية معفنة النهاردة الله يخرب بيت المصييفين , ماهو يا جماعة قولتلكم عايزين تنزلوا البحر الساعة سبعة الصبح قبل الشمس و الزحمةو بير مسعود ,و الناس اللى بترمى فيه فلوس و تتمنى أمنية و العيال اللى بتنط فيه و تطلع من الناحية التانيةو الكورة عالرملة و الفرهدة بعد ربع ساعة و راجل يعدى بالكاميرا بيصور الناس , عُمره ما أخدلى صورةلشارع خليل حمادة لمحطة قطر سيدىبشر و الناس المتدلدلة من القطر الساعة سبعة الصبح لبتاع الجرانين و للمنتزة و أيام الصحة لما الواحد كان بيروح يلعب كورة من سبعة لسبعة للمعمورة اللى حبتها و أنا صغير و كرهتها لما كبرت وحسنى بتاع المشويات اللى عمرى ما حبيته ل فلفلة أجدع بتاع عصير فى إسكندرية و أحلى سودانى باللبن و سلام كبير للعيال اللى بطلوا يلعبوا فى شارعنا بحجة إنهم كبروا على اللعب فى الشارع لفريق شارعنا للشاب المتطوع اللى بيقف قدام محل خميس علشان الكورة متدخلش عنده و سلام تانى لنفس الشاب اللى بيزهق بعد شوية من الوقفة و يبتدى يقولك نزلنى بدالك جون للناس اللى بتذعقلنا علشان الدوشة و إحنا بنكبر دماغنا و الأمهات اللى بيتنبح حسها فى المنادية على عيالها علشان يطلعوا يتغدوا و إحنا برضوه مكبرين دماغنا و كل واحد عربيته تعطل فى شارعنا و يقولك والنبى زقة يا كابتن ومحطة فيكتوريا الترام و أيام عبد الناصر و بنات ثانوى حدا الله ما بينى و مابينهم و سلسبيل بتاع العصير اللى قضى عليه الدكر بتاع العصير اللى فتح قدامه لمحل الكاسيت اللى بيعمل كوكتيلات غريبة للشارعين اللى بيطلعوا على المشاريع اللى ياما إحتارنا مين فيهم أقصر للناس اللى بتستنى المشروع الكبير اللى بيودى محطة مصر علشان هو بنص جنيه و الصغير اللى ناس مسمياه النينجا و ناس مسمياه التوناية و اللى أجرته واحد جنيه كامل سواء نازل فلمنج نازل المحطة أو إنشاالله حتى تكون نازل أول شارع الأقبال لسواقين المشاريع و هما بيجروا علشان الظابط جاى ل أبو خالد بتاع الفول رفيق أيام الثانوىو تحية عالية أوى لسور مدرسة عبد الناصر اللى ياما رفعوه علشان التلامذة متزوغش بس برضوه ولادنا قدروا يعدوه , سلام لعبد الناصر برضوه علشان متزعلش , أحمد إسماعيل بتاع الفيزيا و اللى عقدنى فيها لأ لأ لأ و شارع الأقبال بنضافته و روقانه
ل خالد إبن الوليد و خد عندك بقى من غير ترتيب سينما المنتزة اللى إتشالت من زمان و لسة إسمها موجود للرصيف اللى متقدرش تحط رجلك عليه فى الصيف لقهاوى خالد إبن الوليد ل أبو شوشة اللى بطلنا نقعد عليها بعد ماحط يافطة مبايعة حسنى مبارك للبيت الكبير و الناس اللى بتهيص كل ما برشلونة يدخل جون و نفس الناس برضوه تهيص لما يدخل فيه جون للدومينو و الطاولة اللى مينفعش تلعب بيهم برة للكوتشينة الممنوعة فى القهاوى فى إسكندرية متعرفش ليه لشارع محمد نجيب أجدع ملقف هوا فى إسكندرية للوسعاية اللى اللى ما بين محمد نجيب و البحر اللى ياما لعبنا فيها كورة و اللى حاطوا فيها حاجات غريبة علشان الناس متعرفش تلعب ل شيش طاووق مؤمن سيدى بشر أكتر محل أكل طلع عليه إشاعات فى الدنيا و المحل اللى فتح جنبه على طول و سمى نفسه مسلم للبحر و الكورنيش بجلالة قدره اللى مينفعش يتنسى و مينفعش يتكتب عنه لبياعين الدرة و اللب و السودانى و الفريسكا لشارع للوران و زيزينيا و سان إستفانو و قصر الصفا الوجه الأرستقراطى لأسكندرية لمول سان إستفانو اللى بقالهم عشر سنين بيبنوا فيه لبوكلى و قهوة الكيخة و عم على اللى مبيخافش من حد و بيزعق فى الكل و خطوط الترام الداخلة فى بعض متعرفش مين بيودى على فين وترام واحد و ترام إتينين اللى طول عمرى بتلغبط بينهم بس أنا فاكر إنى كنت بركب اللى يافططه زرقة علشان كان بيوصل أسرعو التاكسيات الأصفر ف أسود اللى بيروحوا سيدى بشر بالعافية علشان الطريق زحمة لكوبرى إستانلى اللى بيتلزق فى أى مسلسل أو فيلم علشان المخرج يقولك شفت علشان تصدقنى لما أقولك إننا بنصور فى إسكندرية
الناس اللى بتيجى تعدى البحر فتلاقى أقرب نفق على بعُد نص كيلو فتتشاهد و تاخده جرى على نفس واحد و عندك شارع سوريا و شياكته و المعسكر الرومانى بإشارته الواقفة على طول للست اللى بتشحت فيها بالعافية لمكتبة النحلة و تصوير الورق إتنين بليل لسيدى جابر قلب الأسكندرية لسموحة حيث البنات الحلوة و الشباب الروش و الحكاوى القديمة عن سموحة الأرض الخراب اللى التاكسى كان بيخاف يدخلها لزهران قبلة أهل سموحة قبل ما جرين بلازا يفتح و ياكل منه الجو , لجرين بلازا أجمل المولات المفتوحة لكفر عبده و الجملة السخيفة و الضحكة اللزجة من كل غريب عن إسكندرية و هو بيقولك معقول أنضف حتة عندكم فى إسكندرية إسمها كفر عبدهالجزويت و نادى السينما و حفلات الجمعة ,الشاطبى و كلية الهندسة و العياذُ بالله و شارع بورسعيد اللى لازم تزوغ قبل الساعة إتناشر من الكلية علشان تعرف تركب منه و أبو قير و زحمته و دوشته
سلام من القلب لكل شاب ظريف متعرفوش يعرض عليك إنكوا تتشاركوا فى تاكسى بدل الوقفة البطالة دى
لمكتبة إسكندرية اللى ياما روحت فيها حفلات بس ولا مرة جالى نفس أقعد أقرا فيها كتاب للمجمع النظرى اللى مادخلتوش غير مرتين و شبابه اللى بيروحوا يقضوا يوم ظريف محطة الرمل و سمعنى أحلا سلام لمحطة الرمل و النبى كمان سلام لمحطة الرمل و صفية زغلول و سعد زغلول و الفوضى الخلابة بتاعة محطة الرمل و الناس اللى بتروح محطة الرمل من يمة الكورنيش و الناس اللى تروحها من شارع أبوقير تنزل عند المطافى و تخَرم منها تطلع عند سينما أمير و خدُ عندك بقى سينمات محطة الرمل و مكتبات الرصيف مركز الأبداع و مسرح سيد درويش و قهوة القاهرة و كابتشينو كافيه دى لابيه و الجرسون اللى أقنعنى إن الكابتشينو هو هو النسكافيه و إن دى بس شكليات ,روسترى ,شارع البطالسة لجوتة و الأسبانى و الفرنساوى و الروسى كمان ولأمريكانى اللى عمرى ما دخلته لطلبة الجامعة اللى بيزوغوا بدرى و يروحوا السينما تعظيم سلام كبير أوى ليهم للولاد و البنات اللى مشبكين إيديهم فى إيدين بعض و عايشين الوهم للركنة على السور الحديد أدام سينما أمير مستنين الصالة تفتح للفلاح و كبدته العظيمة للنبى دانيال و البياعين اليامة و الهلال اللى بتقفل حداشر الصبح لمحطة مصر اللى على طول بتوه فيها و نفسى أفهمها و حكاوى أمى عن الحتت اللى مدوستهاش فى إسكندرية زى راغب و غيط العنب و كرموز و كمان المنشية و محلاتها و اللخبطة وسط الشوارع لنص ساعة مشى لبحرى و قهوة فاروق و صوبية طلعت و ناس كتيرة رايحة و جاية و النسكافيه فى كافيتريا الدايفنج و إنت سرحان فى البحر للقلعة و القعدة الحلوة قدام القلعة و الراجل الوحيد اللى بيبع حلبسة و شوية الهوا الحلوين
سلام كبير لدهب اللى بتستنى الفطيرة بتاعته لمدة ساعة لصواريخ فى بحرى لألبان عليكة الأكتشاف المتأخر جداً لقهوة الهندى اللى مينفعش توصفها للبن البرازيلى قبل التجديدات و بعد التجديدات لخروب أمال بعد كبدة الفلاح سلام كبير أوى لهريسة أحمد حسنين بكل فروعها الراجل اللى عُمره ما زود فى السعر
و أكتوبر و السهر لوش الصبح و الكوتشينة و لمة الأقاريب و الصحاب و الناس الغاليين أوى للعجمى حيث البيطاش حيث بيانكى حيث الحريم الجامدة و شقة صاحبنا اللى باعها بلاش
سلام و حنين جامد أوى لفيلم حلو حفلة إتناشر بليل يوم الجمعة فى سينما أمير تطلع منه ياخدك شارع صفية زغلول بالحضن
سلام كبير أوى للمشى فى الشوارع بليل مع الناس اللى بتحبها جنب شريط الترام أو على الكورنيش سلام كبير للأحلام الجميلة والفرقة اللى متعملتش و الأفلام برضوه اللى متعملتش ولا حتى إتكتبت للبنات اللى إتحبت من بعيد ومتقالهاش
سلام كبير للمطرة و إنت بتتفرج عليها من إزاز بيتكم و إنت بتجرى تحتها علشان تتحمى فى مدخل عمارة للشوارع الغرقانة فى شبر مية

سلام من قلبى لكل حاجة نسيت أكتبها غصب عنى مع إنى أكيد مش ناسيها