وجهة نظرى فى الوضع الحالى

1- انا مبحبش اتكلم فى السياسة أو أناقش لأنى مؤمن إننا فى مرحلة كُل واحد فيها مقتنع إنه صح و ثبت بالتجربة إنك عُمرك ما حتعرف تغير موقف أى شخص و لو بالأدلة و البراهين و أى إن كان درجة إحترامه و تقديره ليك " من باب أولى كُنت غيرت من موقف أهلك الفلول أيام حسنى مبارك 

2- سياسة إصطياد الأخطاء للأشخاص عُمرها ما حتخليك تشوف شخص نضيف و أنا بحمد ربنا إن عبد الوهاب المسيرى مات قبل ما اليوتيوب ينتشر علشان تفضل صورته حلوة بدل ما كنت حتلاقى عالم ولاد وسخة مصطادينله لقطات و هو جوة حمام بيتهم 

3- الأخوان ناس زبالة عندك حق الأخوان ناس زبالة ب إلا ما رحم ربى , الأخوان باعونا مية مرة من أول الثورة و بينا و بينهم دم و هما اللى وصلونا للوضع ده , مفيش فصيل ملايكة و فصيل شياطين , و حتى لو فصيل ملايكة حيدخل سياسة خلاص حيتلوث , السياسة نجسة ووسخة أيه اللى وداكم هناك 

4- ناس كتيرة جداً وقفت مع مرسى ضد شفيق و عصروا ليمون بس انا عايز أقول إن مُرسى لو كان غلط بنسبة 80% فى المية فالناس و الأعلام وصلوهم 200% و الحقيقة إن غالبية عاصرى الليمون كان نفسهم مُرسى يقع من أول يوم الناس كانت عاوزة تطلع إن مرسى حمار و أن الأخوان ولاد كلب بأى شكل حتى ولو بالكدب , سياسة ترصد غير طبيعية لأى شخصية دينية عموماً , التنقيب فى دفاتر أى شخص علشان نقولوا إن ده راجل وسخ , عندك باسم عودة بمجرد إن الناس حست إن فيه شخص ممكن يعمل حس للأخوان الناس إبتدت تشمشم وراه فى كل حركة 

5 - أنا مقتنع إن اللى حصل ده إنقلاب و إنقلاب بغباوة من جميع الأطراف , مُرسى كان المفروض من البداية يا إما يتنحى يا إما يقولك حعملك إنتخابات مبكرة فى التاريخ الفلانى يا إما يدعوا لإستفتاء برضه فى تاريخ معين , الناس ماكنتش حتروح فى حالة الأستفتاء أو الأنتخابات المبكرة بس فى الحالة دى الجيش ماكنش حيقدر يقلب الطرابيزة على مرسى و كان حيرضى بأحد الأختيارين و غالبية الشارع " فلول و كنبة " كانت حتروح بيتها إمتثالاً لأوامر الجيش 

6- الجيش إتعامل مع غباوة مرسى و الأخوان بغباوة أشد و قرر إنه يخلعه بمنتهى العنف بحضور لفيف من طوائف المجتمع بإستثناء الحرية و العدالة و بحضور حزب النور ضيف الشرف الهام جداً اللحظة الحاسمة كانت محتاجة حكمة اكتر من وجهة نظرى الجيش كان المفروض يقول إنه حيعمل إستفتاء " أنا شايف إن ده الحل الواقعى الأفضل و ليس الحل الثورى الأجمل " بس الجيش قرر إنه يعمل الحل الثورى الأجمل و ده كفيل إنه يشكك فى الحل الثورى الأجمل

7- المقارنة ما بين مؤيدى و معارضى مرسى مش محتاجة لكاميرات و حبشتكانات المعارضين و بعين بتحاول تكون محايدة أكتر بأضعاف , بس الناس المؤيدة هم جزء كبير من أهل مرسى و للعلم فيهم ناس بتكره مرسى عمى بس هم ضد إن الحكاية تمشى كدة مينفعش تبقى العملية فى أيد الجيش , الناس المؤيدة متستناش منهم أى حاجة للبلد و متتكلمش فى نسب تصويت ولا أى حاجة الناس دى أصلاً ممكن تروح تولع فى لجان الأنتخابات و حيبقى حقهم الناس المؤيدة لمرسى مش كلهم أخوان ولا كلهم إسلاميين و الناس دى غالبيتهم مقتنعين أن مرسى هو رئيس كويس و الواقعيين منهم يقولك هو فيه غلطات بس بيتحسن ده رأيهن و قناعتهم دون أى إستفادة أو مغنم من إنتخاب مرسى و مش من حقك إنك تزايد عليهم 

8- لازم تبقى فيه قناعة إن حسنى مباربك جَرف البلد تماماً و إحنا بقالنا سنتين عمالين نكتشف كم السواد اللى جوة الشعب المصرى العظيم و إنعدام الكفائات بشكل مُحزن و مُذهل 

9- إختيار البرادعى رئيس وزراء هو من وجهة نظرى المتواضعة هو غباء سياسى فشيخ مبدئياً إنت بتسخن ناس هى والعة لوحده ده ناس إنت طيرت الراجل بتاعهم ببساطة و جبتلهم راجل ضد مبادئهم و قناعاتهم بنسبة كبيرة , على الطرف الأخر البرادعى حرق نفسه و عليه إنه يتعامل مع حرب أهلية و يشكل حكومة توافقية مرفوضة مبدئياً من تلت الشعب و عليه إنه يقابل ناس حتتعامل مع كل غلطة ليه على إنها كبيرة من الكباير عليه إنه يتعامل مع كل ده و هو عارف إنه ما أُخذ بالقوة يُسترد بالقوة

10 (نقطة شخصية) عزيزى حسن مصطفى 

انا نزلت الشارع يوم 30 و مشيت حوالى ساعة و كان فى دماغى سؤال واحد " ليه عُشر العدد ماجاش وقف معاك ايام محاكمتك ليه واحد على مية واحد على 1000 من أى طرف ماجاش وقف جنبك , هى الناس دى مش شايفاك ولا على عينيهم غشاوة و مش شايفينك ولا هم ولاد كلب

إنت ليك حق عليا أنا عارف انا مرحتلكش غير مرة واحدة و غير كدة ظروف الشغل و أكل العيش هى اللى منعتنى أقولك حاجة العلوقية هى اللى منعتنى هية العلوقية يا حسن تسوى أيه الدنيا لو ماوقفناش جتب الرجالة مش كدة يا حسن أنا دعيتلك والله فى كل دعوة كنت بدعيلك كل جلسة كنت ببقى ناوى أكتب عنك بس انا مبقتش بعرف اكتب من زمان سماح يا حسن