الاثنين، أغسطس 17، 2009

و أقول إنتى اللى باقيالى

تقديم :
أفتكر إن 100 تدوينة فى مدونة بقالها 4 سنين ده عدد ضئيل جداً , ده طبعاً راجع لكسل شخص ماشى الطريق فى موضوع الكتابة و راجع برضه لأن فيه حاجات بكتبها و بحس إن غرضى منها إنتهى بمجرد كتابتها و انى مش محتاج لنشرها

انا ممتن لكل واحد حب اى حاجة فى المدونة , لكل شخص ساب تعليق لطيف بسطنى و رفع من روحى المعنوية و لكل شخص كتبلى إيميل يقولى كلام مدح أو يسأل عليا أو يقولى انت مبتكتبش ليه يا عم


متشكر تانى و تالت للناس اللى إرتبطت بيهم عن طريق المدونة , ممنون جداً للناس الحلوة اللى عرفتهم عن طريق التدوين و اللى بتمنى إنهم يفضلوا معايا طول العمر

إهداء : التدوينة المية دى بتاعتك إنتى وبس مش لحد تانى دى حتى مش بتاعتى إنتى اللى كتبتيها بخط إيديا
التدوينة دى ليكى للبنت اللى خلتنى أفرح بعد سنين إكتئاب , للبنت اللى قولتلها إنى مسامح فى كل اللى فات علشان لو ماكانش ده حصل ماكناش حنعرف بعض, لأول حب حقيقى فعلاً فى حياتى لحتتى الحلوة الناقصة ليكى و بس.

بٌصى من هنا و رايح انا مش حسأل هو ليه الناس الحلوة بيبقى لازم تمشى من حياتنا
خلاص إتعودت على كده , تلاقى حد تحبيه و تستريحليه جداً فى حياتك العادية أو فى الشغل أو حتى من أيام الدراسة و فجأة تلاقيه مشى , إختفى من دُنيتك أو على الأقل وجوده بقى بسيط جداً بحُكم مشاغل الحياة بُحكم السفر ساعات بٌحكم إنتهاء أيام الدراسة و أسباب كتير أنا و إنتى ممكن نقعد نعدهم سبب سبب من غير ما ينتهوا
هى دى سنة الحياة مش كده الناس الحلوة بتمشى و ييجى ناس غيرهم يسيبوا حتة منهم جوانا و بعدين يمشوا هما كمان
فاكرة لما كنت بحكيلك على نظرية الحتت ان كل حد بنقرب منه لازم يسيب حتة جوانا و احنا كمان بنسيب حتة من روحنا جواه غصباً عنه و عننا
حتت صغيرة لما بنبقى قاعدين مع نفسنا بنطلعها من جوانا و نقعد نتفرج عليها و نَحن للشخص ده و نقول والله ده كان إبن حلال
حتت ساعات بتوجعنا ده اكيد لما بنقول إننا تجاوزنا الشخص ده خلاص و المفروض ما يبقاش باقيله حاجة معانا , بس غريزتنا البشرية بترفض ده و تفتكره بالحلو قبل الوِحش
بس انتى سبتى كٌل نفسك تبقى جوايا , هو إنتى إزاى عملتى كده ؟؟
يعنى لسنين الواحد حيقعد يحب و يفكر و يكتب و يتفرج على أفلام و يبقى حاسس إنه فاهم كل حاجة , تيجى انتى بكل بساطة و تشيلى كل ده و تقوليلى إن اللى فات ده كله كان تحت الصفر من اللى المفروض تحس و تأمن بيه انا و انت حنبدأ من بعد ما إنتهينا بألف خطوة
حنعدى كل اللى فاتنا ده بلحظة واحدة مش حنسرقها من الدنيا
بالعكس دى هى جات لوحدنا اكنه كان حقنا و رجع لاصحابه انا و إنتى
فاكرة اللحظة دى , فاكرة الذهول اللى كنا فيه من اللى إحنا اللى كنا حاسينه
وقتها وقت ما مسكنا اللحظة دى و كنا فاكرين اننا فوق أوى أوى
دلوقتى بنقول اننا اعلى بكتير عن الفلاش اللى حصل بينا فى اللحظة دى و ان اللحظة دى اللى كانت مليانة مشاعر قد اللى حسيناها طول عمرنا اقل بكتير عن اللى إحنا فيه دلوقتى و حنبقى فيه بعد كده
مش كده برضه ؟؟؟ قولى إنشاء الله
انا ابتديت من الصفر معاكى كله كان بيتكون و بيتبنى من أول و جديد كأن ماكانش فيه حاجة قبل كده خالص بجد
مش انا بس ....انتى كمان انا شفت فى عينيكى الحلوين اللى بحبهم أوى كده
أكيد العينين دى ماكانتش سعيدة قبل كده زى مانا شايفها سعيدة معايه
لأول مرة ابقى واثق من إحساسى كده و أقهر قلة ثقتى بنفسى و ابقى واثق من اللى شايفه و اللى حاسه ده
بصى انا سرحت فى الكلام مفيش مشكلة خالص على فكرة , الكلام اللى بقالى شهور بكتبه ضاع منى للأسف
وزى ما بقيت بقول لنفسى ليه اكتبلك طالما انى ببقى معاكى قادر انطق كلامى المكتوب انا بتبسط جداً جداً بده بتلاقينى ساكت فجأة و بعدين ببتدى اتكلم .. دقيقتين تلاتة خمسة عشرة , انا ببقى عارف انى بقول كلام حلو ببقى مش بقول كلام حلو أكليشهات بيبقى الحبر ممزوج بلسانى فاهمة اكنى بكتب بصوابعى عالهوا كلام انتى بتسمعيه و بيبسطك , انا حتى بقولك ساعتها انا قولتلك كلام حلو مش كده مش بيبقى قصدى انى اقولك انى قولتلك كلام حلو قد ما بكون عاوزك تأكديلى ان الرعشة الجامدة اللى جوايا عن حق , انا ببقى شايف عينيا ببقى حاسسهم حلوين اوى و ببقى حاسس بنفسى أجمل و أجمل
أقولك حاجة انتى اللى باقيالى
انا بصبر نفسى عالناس الحلوة بيكى , كل ما حد يمشى مزعلش عليه زى قبل كده و اقول لنفسى مفيش مشاكل انتى اللى باقيالى
انا بيكى قادر استغنى عن حاجات كتيرة اوى
, انتى الحتة الحلوة الناقصة , الضحكة الحلوة , و العينين اللى بحبها , و الدفا و الحنان , طب انا عاوز ايه تانى
لازم دنيتنا يبقى فيها ناس حلوة , و الناس الحلوة بتيجى و تمشى
معلش حقول تانى و تالت إنتى اللى باقيالى بتصبرينى عاللى بيمشوا
غلاوتهم بتتضاف لغلاوتك عندى فبحبك أكتر و بتُمسك بيكى أكتر و أكتر
بزعل على اللى بيمشوا ده اكيد و بشتاقلهم و بحنلهم , و بكلمك وقتها و ببقى زعلان و متضايق و أقولك فلان راح فين و مش حقدر أشوفه زى الأول تانى
تقوليلى معلش و تاخدينى فى حضنك و مقدرش وقتها غير إنى أقولك ان إنتى اللى باقيالى

التسميات:

21 Comments:

Blogger Nisreen Basiouny said...

الله
أنا بحبكم أنتوا الأتنين
أنتوا جُمال أوي
يارب تبقالك و تبقالها
(f)

17/8/09  
Blogger Z_Diva said...

awalan.. mabrouk 3lik el post # 100

sanyan.. allah hallah hallaaaaaaaaah.. 7ewa awy ya baheeg.. best of luck isa ;D

18/8/09  
Anonymous فاطمة سيف said...

بجد كلام طلع من القلب
و وصل للقلب

18/8/09  
Blogger حررروووف said...

الله حلوة اوي

انا حتى بقولك ساعتها انا قولتلك كلام حلو مش كده مش بيبقى قصدى انى اقولك انى قولتلك كلام حلو قد ما بكون عاوزك تأكديلى ان الرعشة الجامدة اللى جوايا عن حق , انا ببقى شايف عينيا ببقى حاسسهم حلوين اوى و ببقى حاسس بنفسى أجمل و أجمل
كلامك حلو اوي اوي مبسوطة اني جيت هنا بصدفة ومش حتكون اخر مرة انشاء الله كل سنة وانت طيب

19/8/09  
Blogger Epitaph1987 said...

God bless both your hearts :)

21/8/09  
Blogger نعكشة said...

ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا رب

ما يبعدكوا عن بعض أبداً ولا يفرقكوا

ربنا يخليكوا لبعض

..........

مفيش كلام ينفع يتقال صراحة غير ربنا يهنيكوا ببعض طول العمر

سلام عليكما

21/8/09  
Anonymous غير معرف said...

مفترض ان كل كلام الحب و المعاني اللي عايزه تترص حروف و كلام يعبر عن احساسي بيك تتقلص و تتفعص وتتلاشي ادام جملة واحده بتحمل كل تعابير الدنياو مشاعر حلوة تجاه كل لحظه باكون فيها حباك و مرتبطه بيك و سعيده معاك اوي اوي .. اد ما عمر كانت عنيا مبستمه و سعيده
"يا حوكه . . بحبك اوي "

22/8/09  
Anonymous Nehal said...

ya 3am ya 3am ;) eyh el post el gamed da
rabena ye7'aleeko ba3d :)

26/8/09  
Blogger camera_girl said...

هنا لذيذ اوى(Y)

18/9/09  
Blogger حنين said...

النهاردة عيد ميلادك يا محمود
كل سنة وانت طيب، وبتكتب حاجات حلوة كده :)

3/11/09  
Blogger بياترتس said...

الله

21/11/09  
Blogger حنين said...

يا ابني غيابك طول أوي

فينك؟

4/1/10  
Blogger محبة الرحمن said...

100 تدوينه فى اربع سنين بس

ما شاء الله

وتقولوا كسل

امال اقول على مدونتى ايه

نوووووووووووووووووووم عميق

جزاكم الله خيرا كلام جميل فعلا

26/1/10  
Anonymous غير معرف said...

أنا سعيد ليك جداً...


في ذكرى أخر يوم للجيب يا حوكا (;

أحمد عارف

31/3/10  
Blogger Borsa said...

بلاك بيري
البلاك بيري
يوتيوب
يوتوب
اخبار مصر
اخبار الرياضة
العاب بنات
اسعار الذهب
الذهب
فودافون
فودا فون
Internet Marketing Strategies

4/10/10  
Blogger زهراء الفاطمية said...

انت بقالك اكتر من سنة مكتبتش
يا ريت تكتب حاجة قريب

8/1/11  
Blogger زهراء الفاطمية said...

بقالي سنتين مستنياك تكتب حاجة
ارجوك
اكتب

20/8/11  
Blogger بنوتة مصرية said...

انت لية مش بقيت تكتب طريقتك جميلة وفيها راحه ياريت ترجع تكتب تانى يااااااااريت

16/10/11  
Anonymous الصحيفة الصادقة said...

موضوع جميل

3/4/12  
Blogger زهراء الفاطمية said...

اسفة التعليق متأخر
بس اول مرةاحس بالتدوينة دي الان
احس بمعني كل كلمة فيها
شكرا علي التدوينة دي
كتبت اللي انا عاوزة اكتبه بس مكنتش عارفة

25/6/12  
Anonymous mekano said...

موضوع جميل وكلام من القلب

13/5/14  

إرسال تعليق

<< Home

Free Web Site Counters