الأربعاء، مارس 04، 2009

هى هى الحواديت

1

دايماً بتنحصر حواديته على البنت اللى بيحكيلها
البنت اللى بتعرف تفتح قلبه من غير ما يحس وتدخل و تدعبس و توضب بعد الدعبسة دى
حتحط الأبيض جوة أوى و الأخضر عالوش و الرمادى حتسيبه فى مكانه فى النص
وحتاخد الأسود معاها و هى طالعة
حتغسله فى قلبها
وترجع تدخل لقلبه من تانى من غير ما يحس
حتفتح الباب بالراحة بمفتاح من المليون مفتاح اللى مسلمهوملها
و تحط الأبيض مع الأبيض جوة أوى
و قبل ما تطلع من قلبه حتسمعه و هو بيهمس ويقولها يسلم قلبك

2

مليون مرة يكتب حواديت عن البنت اللى بيقف أدامها و يبقى نفسه يتكلم و يقولها عاللى فى قلبه و ميعرفش
مليون مرة يحاول يخلى لسانه ينقل اللى جواه و ميقدرش
اللى كان دايماً على لسانه بس إنه يقولها إن جواه أجمل من براه ,

الدنيا و همومها بس هى اللى قدرت تحشر نفسها فى النص ما بين الأتنين

و تفصل ما بين جواه و براه و تخليه يقف صنم قدام جمالها كده
و عشان كده ولما شاف الزهق و الملل فى عينيها المرادى وهو ماشى جنبها و مبيتكلمش حضنها أوى و أخدها جوة قلبه
محسش بأى أنانية فى إنه بيحرمها من الناس اللى بتحبهم و بيحبهوا قد ما كان واثق إنها حتتبسط و هى جوة قلبه
الأكتئاب اللى عنده ده بس علشان هو بيحن أوى لصوتها و وحشاه ضحكتها و نفسه يلمس شفايفها بإيديه

3

النهاردة و بكل شجاعة جَمع أى حاجة ممكن تفكره بيها
القصاقيص و الأفكار و الأحلام و الألوان و الأفلام و الكتب و المزيكا اللى بتحبها
كله كله جمعه و حطهم فى سلة واحدة وولع فيهم
كان حاسس دلوقتى إنه عمل القرار المناسب و حس إنه قوى كفاية
حط دماغه على المخدة و حاول ينام
خمس دقايق و لسة مش عارف ينام
عشر دقايق و برضوه مش جايله نوم
بعد ربع ساعة طلع صورتها من تحت المخدة بصلها شوية و مقدرش يمنع نفسه إنه يبتسم , باس الصورة و حط راسه عالمخدة و راح فى النوم

4

النهاردة وقبل ما ينام إتصل بيها ردت عليه راح متكلم بسرعة على قد ما يقدر علشان ميترددش ولا ثانية قالها أنا إمبارح مسحت نمرتك و صورتك و أى حاجة ممكن تفكرنى بيكى بس إكتشفت إنى نسيت إنى أمسح نمرتك من على السيم كارد بس معلش حسألك سؤال سريع , إمبارح حسيتى بأى حاجة حسيتى بأى فقد , حسيتى إن حد كان بيحبك أوى شالك من حياته
ردت عليه بإندهاش و هى متاخدة : بصراحة لأ بس لي......
مستناش لحد ما تكمل كلامها قفل المكالمة بكل صفاقة و قلة ذوق , مسح نمرتها من عالسيم كارد و قدر ينام و باله خالى

5

متستغربيش لو صحيتى الصبح و لقيتى إسمك مرسوم فوق فى السما و على ورق الشجر و على جدران البيوت

و متستغربيش برضوه لو لقيتيه على أسفلت الشوارع و على إزاز المحلات

انا أصلك بعد ما خلصت الحدوتة و بعد ما المسافات ما بينا زادت إشتقت إنى أحكيكى

و بعد ما البشر زهقوا من سماع حكايتى بقيت بحكى للهوا و البحر و الجمادات

فمتستغربيش لو عديتى فى يوم جنب البحر و لقيتيه فاتحلك حُضنه

6 Comments:

Blogger محمد المصري said...

You can erase someone from your mind. Getting them out of your heart is another story. !!

بطل حكاوي للبشر وللجماد وفكر تحكيلها هيّ كل الحواديت وتقولها إنها كل الحاجات

وقوله يحطها جوا الحكاية ويسيبها هيّ تختار عشان عمره ما هيعرف يخرجها منه بمجرد قراره إنه يعمل ده

"اشتقت إني احكيكي"

يخرب بيت الجمال !!

ربنا يريّح قلبك يا محمود

4/3/09  
Blogger Nour said...

:)))))
حبيتها قوي يا محمود.. بجد :)

5/3/09  
Blogger حنين said...

هيييييييييه :)

وأنا بانبسط أوي لما باقرا حاجة جميلة جدا جدا زي كده.. بس هو مافيش زي كده، يبقى بانبسط لما أقرا دي :):)
...
جميلة جدا، بالفعل، حقا .. :)
...
"اشتقت أحكيكي".. إنت بجد؟
..
تسلم إيدك

5/3/09  
Blogger ماشى الطريق said...

محمد المصرى :
You can erase someone from your mind. Getting them out of your heart is another story. !!
فيلمى المفضل :)
هو مشكلته إنه جبان يا محمد و بيخاف يحكيلها و تصده و تنهى الوهم الجميل اللى عايش فيه
هو بيخسر من عمره و بيغرق فى وهمه يوم بعد يوم ...مشكلة
نور :
أثلجتى صدرى يا بُنيتى :)
حنين :
ربنا يكرمك يا بنتى وإنتى رافعة روحى المعنوية دايماً كده

6/3/09  
Blogger amira said...

حمد الله على السلامة، أنا قلت أصبتك بعدوى الكآبة المزمنة :)

7/3/09  
Blogger ماشى الطريق said...

الله يسلمك يا أميرة
لا يا فندم العفو إحنا بنصدر الكأبة مبنستوردش من برة أبداً
:)

11/3/09  

إرسال تعليق

<< Home

Free Web Site Counters