الأربعاء، مايو 06، 2009

خمس دقايق

بُصى انا حعمل معاكى إتفاق , لما نكون بنتكلم و تقوليلى و إحنا بنقفل المكالمة إنك حتكلمينى كمان خمس دقايق إعملى حسابك إن الخمس دقايق دول عندى معناهم 300 ثانية مش أكتر، ممكن أقل مفيش مشكلة

و إنى باخد كلمة الخمس دقايق بمعناها الحسابى و ليس معناها المُتعارف عليه إن خمس دقايق دى ممكن تبقى عشر دقايق أو نص ساعة أو ساعة أو أى وحدة زمنية أكبر من النص ساعة

لأنى من بعد ما أخلص المكالمة معاكى مخى حيتحول لأستوب ووتش أوتوماتيك و حيبتدى يعد عد تنازلى مع نفسه 300 299 298 الثوانى حتكون بتعدى عليه ساعات بالمعنى الحسابى فعلاً و مش حيقدر يفكر فى أى حاجة تانية فى الفترة دى من الحاجات اللى هو من المفترض إنه يكون بيفكر فيها

ساعتها حتظهر فجأة الفكرة البسيطة إنى أكلمك مع إن العداد لسة فى الميتينات بس إنتى وحشتينى فعلاً و نفسى أسمع صوتك و حيث إن التٌقل و اللوع و كل السخافات العاطفية دى مش موجودة ما بينا فأنا حطلع نمرتك و حفضل حاطط صوباعى على زرار الأتصال ، 145 ثانية اللى فاضلين كتير مش كده , حقول ممكن تكون مشغولة فى حاجة و مش حعطلها و كده كده لسة فاضل 130 129 128

يخرب بيت كده بصى ما تقوليش بطّل سجاير أو حتى قلل مع إنى بحاول لأنك عارفة إنك لما تيسيبنى فى رحمة ثوانى

حلحم سجارة فى أختها من قبل ما أخلص الأولانية حتى

55 ثانية هانت , يعنى أول مرة ألاقى نفس فى الموقف ده و أجرب قسوة الأنتظار دى , بس عادى حقول لنفسى إنك بتتعاملى مع الخمس دقايق ك مصطلح عن إنك حتكلمينى بسرعة

حريح نفسى بالفكرة و حروح أعمل كوباية شاى

فاضل ثانيتين حبص للموبايل بأمل بس صورتك مش راضية تظهر

420 ثانية سبع دقايق بالظبط صورتك و إسمك حيظهروا حرد عليكى و حقولك إنى كنت لسة بفتح شاشة الكمبيوتر علشان أكتب عنك

حقول لنفسى سبع دقايق مش كتير على فكرة و حفتكر إننا قضينا أغلب عمرنا بعيد عن بعض

حيبقى نفسى أسالك سؤالنا المعتاد هو إحنا ليه ما إتقابلناش قبل كده ؟؟

التسميات:

13 Comments:

Blogger أحمد جمال said...

خرافة يا محمود

6/5/09  
Blogger Z_Diva said...

howa da ba2a elly 7asal ;) mashy ya 3am, we b3den eh elly bt3mlo dah, mesh keda ya baheeg, 3ayz elbonya t2oul 3lik eh, meet marra olna in elto2l salsa.. allah :D

6/5/09  
Blogger جابري said...

هو إحنا ليه ماتقابلناش قبل كده؟

9/5/09  
Blogger ماشى الطريق said...

أحمد جمال :
الله يكرمك يا أبو حميد متشكرين جداً على ذوقك :)
Z_DIVA
مفيش حاجة إسمها تقل يا أم سامية إفهموا بقى :)
جابرى :
مسير الحى يتلاقى يا محمد :)

17/5/09  
Blogger enas said...

من اروع ما قرأت في حياتي

18/5/09  
Blogger مايو said...

جعلتنى فى انتظار اتصالها
جميلة أوى:)

22/5/09  
Anonymous القلوب said...

تقبل مروري

24/6/09  
Blogger التى هى نفسى said...

جميــــــــــــــــــــــــــل

26/6/09  
Blogger بـسة .. و شهرته عم بسة said...

جامد يا هندسة ! سبع دقايق صحيح بس جامدين جداااااااا ! فيهمس يجارتين و كوباية شاي بس لكن هوه ده التكثيف اللي بيقولوا عليه !

11/7/09  
Blogger نعكشة said...

قعدت أدور عليها لحد ما لقيتها

بجد معبرة جداً

سلام عليك

26/7/09  
Blogger Epitaph1987 said...

Till now..I keep passing by, reading that marvellous post, and just leave silently...since you first published it ..till this very moment..

I just wanted to Thank You for the beauty of your letters in describing this whole situation...

:)

2/8/09  
Blogger dandana said...

وانا ازاى ماجيتش هنا قبل كدا..؟

حلوة اوى

بهرتنى فعلا

19/8/09  
Blogger medhat kadeib said...

كلمني يا محمود ضروري لو سمحت .. مدحت مصطفى

31/12/13  

إرسال تعليق

<< Home

Free Web Site Counters