الخميس، يناير 04، 2007

إيموشنز

كوكو أونلاين على الإم إس إن , بندق يدخل أونلاين
بندق: إزيك يا كوكو
كوكو: إزيك يا بندق , أنا وقعت من السما و إنت إستلقفتنى , أنا فى دنيا غير الدنيا
بندق : فيه أيه يا إبنى مالك بتتكلم زى بتوع الأفلام الأبيض و أسود كده فيه أيه
كوكو : أنا بحب يا بندق , حبيييييييييييييت ويا ريتنى أنا ما حبيت
بندق : ليه كده يا منيل مانت كنت ماشى كويسسسسسسسسسسسسسس
كوكو : بنت يا بندق إتعرفت عليها من عالنت شقلبتلى كيانى , غيرتنى تماماً , إتصور إتصور إنى بقيت بكتب عربى بدل ما كنت بكتب فرانكوأراب
بندق : أيموشن ذهول , أنامش مصدق للدرجة دى أثرت فيك , يا إبنى دى تلاقيها إشتغالة إنت على طول هدف للإشتغالات على النت , مش فاكر أخر واحدة رحت تقابلها و إكتشفت إن إيديها الإتنين شمال
كوكو : أيموشن خجل , ماتفكرنيش يا بندق دى كانت تجربة أليمة
بندق : يا كوكو فكك من الحوارات دى , أراهنك إنها بعد كل ده حتطلع شبه وش الشبشب ومش حتلاقى ليها فايدة غير إنها تموت بيها الصراصير
كوكو : أموت بيها الصراصير أيه يا عم , إنت شايفنى بشات مع بيروسول , ولعلمك بقى أنا شفت صورتها
بندق : يا راجل , و أيه النظام
كوكو : جمالها هادى أوى من النوع اللى يخطف عينيك من غير ما يطلب فدية , روحى بتطلع مع كل ندج بتتبعتلى منها علشان إتأخرت ثانية فى الكتابة , قلبى إتفتحلها مع أول بوكس شات إتفتح بينا
بندق : قلبك إتفتحلها ممممم طب خلى بالك بقى لحسن دبانة تدخل ولا حاجة
كوكو : لأ مانا أمنت نفسى من الأول و ركبت شبكة , أنا من ساعة ماعرفتها وكل حاجة فى حياتى إتغيرت الإمساك راح , الراجل بتاع الوصلة عدل صورة الموفى شانل , الموبايل مابقاش بيفصل شحن ,زى ما بيقولو كده يا بندق الحب بيعجن المخبوزات , تعرف أيه إنت عن الحب يا بندق , يا إبنى إنت الست الوحيدة اللى حبتها وحبتك فى حياتك دى كلها هى أمك
بندق : أيموشن حزن , من فضلك ما تدوسش عالكرح , طلعت فى الأخر ماشية مع أبويا وعينى عينك كده أدام عينياالمهم كملى أيه وضعها الأجتماعى و المادى
كوكو : هية قعدت تلات سنين فى طب و بعد كده حولت هندسة
بندق : ليه كده
كوكو : هية بتقولى إنها كانت بتطلع الأولى فى طب على طول فعدم وجود أى منافسة أحبطها جداً فحولت هندسة بس برضوه لسة مفيش فايدة و بتطلع الأولى برضوه
بندق : إيموشن حزن ,يا حرام تصدق بجد صعبت عليا . ووضعها المادى
كوكو : بنت ناس طحن , أبوها عنده سبع عربيات مرسيدس , عربية لكل يوم شغل
بندق : لألأ وسعت منك دى شوية عايز تفهمنى إن أبوها بيشتغل سبع أيام فى الأسبوع من غير ما ياخد أجازة
كوكو : بقولك بنت متكاملة يا بندق هى و أهلها , لما بتكلمنى كده بحس إن حروفها كلام بسمعه , بسمع ضحكتها لما بتبعتلى إيموشن سمايل
بندق : طب ماخدتش تليفونها , إنت لازم تسمع صوتها مش فاكر البنت اللى كان بيكلمها زيزو . اللى طلعت ناقلة حنجرة من معزة
كوكو : ماهى بتقولى إنها معندهاش موبايل , بتقولى إنه إختراع بيقضى على العلاقات الإنسانية بين البشر و بيخلى العلاقات عبارة عن رنات و مسجات , للدرجة دى جميلة هى يا بندق , و مثقفة جداً جداً , تصور إنها قرت كل أعداد تان تان
بندق : إيموشن ذهول , بتتكلم بجد
كوكو : اه والله زى مابقولك كده , دى عندها كمان تان تان و البيكاروس اللى بدور عليها بقالى سنين إيموشن سمايل
بندق : طب إوعى تقولها بقى إنك بتدور على القصة دى لحسن تفتكرك طمعان فيها
كوكو : عيب يا مان محسوبك مصحصح أوى إيموشن غمزة , بس أنا متضايق أوى اليومين دول يا بندق علشان هى حزينة إيموشن حزن
بندق : ليه كده مالها
كوكو : يعنى أصلهم بيمروا بمشاكل كتيرة بعد ما باباها إتوفى
بندق : يا حول الله يا رب مش إنت كنت لسة بتقول يا إبنى إن أبوها عايش و عنده سبع عربيات و كده
كوكو : أيموشن إستغراب , يا راجل تصدق فعلاً غريبة الحكاية دى , مات إمتى الراجل إبن الكلب ده
بندق : المهم هى عاملة أيه دلوقتى
كوكو :حالتها النفسية متدمرة علشان أبوها طبعاً بالأضافة لأنها إضطرت تبدل المرسيدس بتاعتها بعربية ب م دبيو,الظاهر الصدمة المالية كانت عنيفة شوية
بندق : لأ حاجة تضايق فعلاً أنا مقدر شعورها
كوكو : هى كانت بتسألنى إن كنت حتخلى عنها بعد ما إتفقرت
بندق : تتخلى عنها؟؟؟ إوعى تكون عملت معاها غلط
كوكو : إيموشن خجل , يعنى مرة واحدة كده بعتلها إيموشن بوسة
بندق : إيموشن غضب بعتتلك إيموشن بوسة اه يا سافل يا دنىء , ماهى البنات مبقتش تعبرنا فى النت من تصرفات الناس المنحلة اللى زيك كده
كوكو : هى مرة واحدة والله يا بندق , و كمان أنا قولتلها إنى راضى بيها بالبى إم زى ما رضيت بيها بالمرسيدس, و إنى بحبها لشخصها للنيك نيم بتاعها للصورة اللى بتحطها فى البروفيل بتاعها , البنت كانت خلاص حتبعتلى أيموشن واحدة بتبوس رجليا , قعدت تبعتلى أيموشن الوش اللى بيبكى لحد ما خلتنى أطلع أوفلاين من كتر العياط
بندق : بقولك أيه يا كوكو كنت عايز أستفسر منك عن حاجة هى البنت دى إسمها ندا و بتحط فى البروفيل بتاعها صورة كلب بيلعب محبوسة مع خنزير و النيك نيم بتاعها قليل من الشاى كثير من الناى
كوكو : إيموشن غضب يا إبن الكلببببببببببببببب إنت عندك تان تان و البيكاروس و ماقولتليش
بندق : إيموشن خجل , والله لسة جايبها مفيش إسبوع يا كوكو يا أخويا

22 Comments:

Anonymous غير معرف said...

ههههههههههههههههههههههههههههههههه
والله من أول سطر وأنا حاسة انها هترسى على كده فى الاخر بس جامدة يا حودة ضحكتنى قوى
إيموشن كركرة

4/1/07  
Anonymous غير معرف said...

ملعوبة صح يا مان

كمل كمل ده انت تحفة بس بلاش ابن ...... دي

4/1/07  
Anonymous غير معرف said...

ماشي الطريق
قادني الخطو الى هنا، لم اتوقع ان يفاجءني البوست بهذا الكم من الضحك.. ضحكتني من قلبي خاصة ايديها الاتنين شمال
شكرا للضحكة المباغتة

4/1/07  
Blogger Nour said...

LOOOOOOOOOOOOOOOOOOOOOOOOOOOOOOL
لأ حقيقي يعني
LOOOOOOOOOOOOOOOOOOOOOOOOOOOOOOOOOL

بس "إيموشن حزن " قتلتني فعلا

محمود.. إنت فظيع جدا
:)))

4/1/07  
Blogger ساعه الغروب said...

تجنن

بجد تحفه موووووووووت

جميله جدا جدا

انت بجد رائع

لا بس حلوه الحب بيعجن المخبوزات دى

5/1/07  
Blogger Z_Diva said...

to7fa awy, ms5ara bgd :D

5/1/07  
Anonymous 3alya2 said...

looool
صباحك تهييس يامان
جامده جدا ...بجد تهييس على اعلى مستوى

بس اكيد التفاهة متوافرة فى معارف النت ...بس انت صغت الامر بطريقة رائعة


تحياتى
ست المرتفعات

5/1/07  
Blogger sha3'af said...

ايموشن واحد بيصفق
و ايموشن بنت صغننة معاها وردة

حلوة
و ملعوبة جداا
و صادمة ربما لمساكين النت و الشات

بس أهم ما في الموضوع ان كوكو طمعان فعلا في تان تان و البيكاروس

5/1/07  
Anonymous غير معرف said...

يلهوىىىىىىىىى
هههههههههههههههه انا كنت هموت على روحى من الضحك بجد انت مسخره
وتان تان دى كنت بقراها زمان ههههههههه
بجد بتكتب حلو اوى

6/1/07  
Anonymous غير معرف said...

يا فاااااااااااااقد



هههههههههههههههههههه


فاااااااااااااااجرة



صحيح يا ولاد.., الحب بيعجن المخبوزااات


دمك زى العسل


واللذاذة فى ان الكلام كله مش متوقع

زعل علشان مقالوشعلى تان تان


فااااقد


على فكرة انا حطيت لينكك عندى فى المدونة ., بعد اذنك يعنى

6/1/07  
Anonymous غير معرف said...

جاااااااااااامده

مش ممكن انت عبقرى

فاااااااااااااقد

بس على فكره يا مان اللى حصل ده مش أصول

ينفع كده يعنى

كان المفروض إنه ميهرش كده على طوول يعنى

يستدرجه شويه فى الكلام

جامده فحتتتتتتتتتتتت

8/1/07  
Anonymous غير معرف said...

ههههههههه

مسخرة

8/1/07  
Anonymous غير معرف said...

جامده يا مان حلوة يا زميل قشطة يا غالى و ملعوبة يا برنس و ميدان رمسيس و مية ميسا على احلى شباب القاهرة و المحافظات
لووووووووووووووووول
ولا مين يوسف بتاع البوست اللى فات ده ياد انت خلفت ولا ايه؟؟

10/1/07  
Blogger sabrina said...

ايموشن كركره
!!!!!!!!!

11/1/07  
Anonymous غير معرف said...

جامدة يامان

هي كان لازم تبقي نهايتها كدة
عشان الانت اتزحم اوي

ولو كانت انتهت نهاية سعيدة
مكانوش هيلاقوا مكان يعملوا فيه فرح

11/1/07  
Blogger taima said...

ايموشن ابتسامة كبيرة

مقلب زي العسل

29/1/07  
Blogger مش أنا said...

ده التطور الطبيعي للتشات عال ام اس ان

6/2/07  
Anonymous Mahmoud said...

يخرب عقلك يا مجرم
هاحطلك لينك عندي انا كمان

15/2/07  
Blogger naryoma said...

:D
لابجد مقلب جامد اوي
ميجيش من اي حد يعني

29/3/07  
Anonymous غير معرف said...

hi ana sara el 7eta bta3et el bosa de gamda gedan 7elw awe bas 3'areb shwaya 3n ketabatak ele 2aretha eshtat salam

14/4/07  
Anonymous غير معرف said...

helwa awy
begad mskhara ya wad
ba s estfsar eshm3na nada y3ny
bas begad gamda

4/3/08  
Blogger Unknown said...

.
.
.
.
.
.
.
.
.

16/3/16  

إرسال تعليق

<< Home

Free Web Site Counters