الثلاثاء، نوفمبر 21، 2006

مُجرد حلم

كان نفسى أكون شاعر عامية , فعلاً دى كانت واحدة من ضمن الأمنيات اللى بتمناها لنفسى بس للأسف طلعت أوت
حاولت كذا مرة الصراحة بس على طول كانت بتطلع النتيجة مخيبة جداً للأمال لحد ما إقتنعت إنى أدى العيش لخبازه و أكتفى بدورى كقارىء.
النهارده وانا بدعبس فى الكمبيوتر لقيت البتاعة دى ومن الواضح إنى فى لحظة بجاحة و إعتداد شديد بالنفس جاتلى الجرأة إنى أحتفظ بيها على الكمبيوتر
عموماً من منطلق الحرية الشخصية التدوينية ومن منطلق إنى لقيتها متأيفة مع الحالة النفسية ليا , قررت إنى أنزلها وزى ما تيجى تيجى بقى

مُجرد حلم
أن البحر يغنى أغنيه
للبنت اللى بتحلم بيا
علشان لما تغنيها ليا
يمكن قلبى يبطل يأس
مجرد حلم
أن الأرض دى تطرح ورد
ف كل زقاق وف كل مدق
علشان عينى لما تشوفها
يمكن مره تبطل يأس
مجرد حلم
أن السما تبعتلى خيوط
أشبط فيها وتاخدنى لفوق
علشان روحى لما حتطلع
يمكن لحظه تبطل يأس
ملحوظة : الصراحة بعد مانزلت البوست و قريت البتاعة دى إكتشفت إنها كئيبة أكتر من الازم , لدرجة إنى قعدت أحاول أفتكر أيه أوسخ فترة مريت بيها فى حياتى علشان أكتب حاجة بالكأبة دى ماعرفتش
الحاجة الغريبة اللى لاحظتها إنى لقيت بوستاتى ماشية فى سكتين عكس بعض تماماً لإما كأبة و ضلمة لإما كوميديا و مسخرة
وتقريباً المود مبيختلفش كتير و أنا بكتب كده أو بكتب كده
عموماً نهاركم حليب

11 Comments:

Anonymous غير معرف said...

الدمعة هاتفر من لاموخذه عينى
يا كئيب يابن ال... الناس الطيبين

جامده يا حوكا الصراحة قدرت توصلى الاحساس باليأس و الكاًبه

21/11/06  
Blogger Z_Diva said...

:/, h2oul eah, elly feh da2 :P,aked inta 3ref r2yey :P, esara7a ya3ny ya5oya, ana bafdl sho3'lk elcomedy, fe3lan byda7k, blash k2aba 3ashan hya mesh talba aslan :P

21/11/06  
Blogger nephthys said...

ana mesh shayfaha ka2eeba lel daraga. I liked it.

مجرد حلم
أن السما تبعتلى خيوط
أشبط فيها وتاخدنى لفوق

i liked that:)

22/11/06  
Blogger ماشى الطريق said...

ملك
عيييب محسوبك كئيب كئيب يعنى
z-diva
ياستى إنتى تؤمرى فيه كوميدى جاى إنشاء الله
بس يستوى الأول بس
نفتيس
والله ربنا يكرمك يعنى
والله أنا برضوه بحب الحتة دى وشايف إنها مش سيءة للدرجة على الأقل مقارنةً بباقى العصيدة

22/11/06  
Blogger sha3'af said...

هيه مش كئيبة على الاطلاق يعني


بس بصراحة
كتاباتك النثرية أفضل كتيير

خليك قاريء في العامية أحسن
حتى حين ع الأقل
أو اقرا كتيير و جرب و شوف أراء الناس و كده ، ده لو واخد الموضوع بجدية

22/11/06  
Anonymous غير معرف said...

هى مش كئيبة بل رديئة جدا
كتاباتك النثرية جيدة

23/11/06  
Anonymous غير معرف said...

ماشى يا عم طالماشوية كدة وشويه كدة ما فيش مشكلة
على العموم الكلمات حلوة وليها معنى
بس أكيد فى المدونة حاجات كتير أحلى
مش مهم مدونتك وأنت حر فيها

23/11/06  
Blogger ماشى الطريق said...

shaghaf
أنا متفق جداً معاكى
بس أهوه أدينا بنجرب
anonymous
الللللللله
وبتقولها فى وشى يا عم طب قولها واحدة واحدة
عموماً هو حقك برضوه وأنا كمحب للعامية عارف إنهيا رديئة
بس حقى برضوه إنى أكتب يا عم
شكراً على رأيك فى باقى كتاباتى
وبالعند فيك بقى حنزل حاجات عامية تانى هه
وجع دماغ
الله ينور عليك مدونتى وأنا حر فيها

24/11/06  
Anonymous غير معرف said...

برنارد شو و غيره من أشهر كتاب الكوميديا كانت شخصيتهم على النقيض.. و لما كتب مرة تراجيدي كل أصحابه قالوله إنه يكتب كوميدي أحسن لأن عمله التراجيدي بدون مصداقية !!

25/11/06  
Anonymous غير معرف said...

احنا نكده نرفض المتاح ، ونجرى وراه لما يبقى غير متاح ، ليه متمشيتش مع والدتك لما طلبت منك ؟؟ خساره

14/12/06  
Anonymous غير معرف said...

hi ana sara ana fahma ele katabto awe bas lazem t3aned el ya2s da 7'leh yksab mara w y7'sar kter w matb2ash kaslan dawar 3ala el 7agat ele bt7ebaha w e3melha

17/4/07  

إرسال تعليق

<< Home

Free Web Site Counters