مبتقدرش تنسى
فاكر الحفرة اللى كنت بتحفرها عالشط و أمك طلعتك من قلبها علشان إنتو مروحين
فاكر صويطك و عياطك و الفضيحة اللى عملتها عالشط
يمكن ما تفتكرش الموقف ده تحديداً بس أكيد حتفتكر مواقف تانية
مانتا ياما أمك طلعتك من حفر عالشط وياما عملت فضايح
ها أهوه شايف شبح إبتسامة عالشفايف
ساعات بتحس إن الأبتسامة دى بالذات هى اللى مقترنة بأى حاجة حلوة بتفتكرها
طب راقب نفسك كده حتلاقى مع كل ذكرى حلوة بتفتكرها ركن شفتك اليمين بيعلى شوية
معلش أنا عارف إنها ملاحظة عبيطة وممكن برضوه تكون لسة مش واخد بالك منها بس ده ما يمنعش إنها بتحصل
شكلك إبتديت تفتكر
ولاد خالتك اللى كانوا شغالين معاك بمنتهى الذمة
ومحاولاتك الطفولية لأثبات رجولتك على بنت خالتك اللى هى أصلاً أكبر منك
بصُى الحفر ده مش للبنات ده متعب جداً إنتى ممكن تروحى إنتى و البنات تملوا مية من البحر علشان الحفرة حتحتاج مية
غية عندك تعمل الحفرة وتملاها مية بعد كده
طب أيه الحكمة فى إنك تعمل حفرة و تملاها مية بعد كده
أهبل من يومك
ساعات بتقول لنفسك الواحد ساعتها كان خالى البال و منفض للدنيا
الحفرة أولاً و قبل كل شىء
سميها ذكرى أيام حلوة على كيفك إختار الأسم اللى يريحك
أنا عن نفسى بسميها حياتى
posted by ماشى الطريق @ السبت, أكتوبر 07, 2006
9 Comments:
غير الابتسامة الي علي النص اليمين بنحس ان الوش كان صافيييييي ونقي ودلوقتي السنين معلمة علي كل حتة ف وشنا
وشنا بقي شوارع يا بشمهندس
فاكر لما كنت انت بتزحف و انا يا دوبك ب امشى و كنت بستهبل و امشى وراك و انت بتزحف
:)
ركن شفتك اليمين بيعلى شوية .. وتلمع عينيك ببريق مختلف .. ويمكن تدمع شوية
يمكن مش فاكرة كتير من أيام طفولتى .. وفاكرة إن عمرى ما قدرت أعمل حفرى ولا أبنى قصر
لكن الحياة أكيد كانت أحسن من دلوقتى
شكرا على البسمة الجميلة والحزن النبيل
يغويني " الفرح " في " بكاء " الآخرين على ماضي جـ م ي ل !
وليه ننسى !! اصل الحياة بدون ذكرى أو حياة ملهاش معنى..
شبابيك : بكرة تروح و تحلى إنشاء الله
ملك : زور فى التاريخ بقى
violina :
نفسى أعرف ليه على طول الذكريات بتبقى أحلى من الأيام اللى عايشين فيها
hymns:
و أنا كمان
ezz :
عندك حق ومين ينسى و مين يقدر فى يوم ينسى
على فكره انا برده خدت بالى منها ومش بحب افتكر الذكريات دى لانها حلوة احلى كتير من دلوقتى
انت عارف مش الغريب اننا بنفتكر اللحظات الحلوة دي ..الغريب ان في لحظات تانيه عاملين لها بلوك و بعدين تيجي حاجه صغيرة اوي تلغي البلوك ده و نلاقي شلال ذكريات اتفتح
شكرا علي البوست الرائع
hi ana sara ra3'm ene matbahdeltesh awe fi 7ayate w malesh tagarob aw mo3'amarat kter tt7eke laken kol lama akbar ba7es b 7ozn w waga3 w we7da w 7agat kter tanya 3ashan kede aw2at kteer bb2a nefse arga3 tefla w aktashef el 7ayah bshakl tane
إرسال تعليق
<< Home