السبت، مايو 27، 2006

لولى

لمزيد من التفاصيل عن إكس واى و زد راجع البوست ده
للإنجاز : إكس واى يمثل بالنسبة لى الجزء الواقعى , زد يمثل بالنسبة لى الجزء الخيالى
لعدم اللخبطة : أى حوار يدور بين إكس واى و زد أو أى كلام من أحدهما للأخر يكون باللون
الأسود
أى كلام من زد موجه إلى لمياء يكون باللون الأزرق
أى كلام من إكس واى موجه إلى لمياء يكون باللون الأخضر
انا حاسس إنى كده لخبطت العملية أكتر ربنا يستر
فى المكتب الهندسى الذى أعمل فيه
زد : ولا يا إكس ولا يا إكس واى فيه بنت قمر إبتدت تشتغل معانا فى المكتب من النهارده
إكس واى : فُكك منى انا مش فاضى عندى شغل كتير
زد :بيضة شعرها إسود فاحم وعينيها عسلى اخخخخخخخخخخخخخخ
إكس واى : ورينى كده , أيه ده دى حلوة أوى بجد , أيه النمش الخفيف ده دى مرعبة بجد وعندها نغازات كمان يا لهوى يا لهوى
زد : مش بقولك أول ماتبوصلها كده تحس إنها بتدخل القلب من غير إستئذان , تحس إنك مش شايف غيرها و
يقاطعه إكس واى : خلاص بقى حتقعد تقولى كلام الروايات الخايب بتاعك العود الملفوف والأنف المعقوف والصدر الحلوف , بس الصراحة انا عاجبانى أوى , هى إسمها أيه
زد : إسمها لمياء انا مكونتش بحب الأسم ده بس من النهاردة حاحبه الله لمياء ده إسم جميل فعلاً ولما أدلعها أقولها لولى الله حلو أوى إسمى لولى كده ظبطنا إسم البوست , يبدأ فى الغناء لولى يا لولى يا لولى ليك محتاجة , تصدق دى أول مرة انا و إنت نعُجب بنفس البنت , نكونش بنحب
إكس واى : أيوة إحنا بنحب تيرارارارا , وبعدين يا زد عايزين نصطاد البنت دى قبل ما يطمع فيها الذئاب الجائعة اللى فى المكتب
زد : عيب عليك إعتمد على أخوك زد الصايع , حوقعها فى هوايا فى مينت , حادوبها زى السكر ما بيدوب فى الشاى بالنعناع , حاخليهم يبدلوا مصطلح فارس الأحلام ب مهندس الأحلام
إكس واى : طب وليه إنت اللى تحاول معاها , ليه مش انا
زد : ماكونتش عايزك تسأل السؤال ده والله , ليه تحرج نفسك يا إبن الحلال , تِنكر إنى جبتلك كذا بنت خالصة قبل كده و إنت كنت بتقعد أدامهم متنح لحد ما كلهم سابوك
إكس واى : خلاص خلاص بلاش إحراج , البت معديا أهيه إلحق ثبتها
زد : أثبتها , ليهم حق البنات يهربوا منك
زد ينادى : بشمهندسة لمياء
تلفت لمياء متسائلة : أيوة
أمد يدى بالسلام : انا بشمهندس محمود أهلا بيكى معانا فى المكتب
لمياء لا تمد يدها : اهلاً وسهلاً معلش مبسلمش على رجالة
إكس واى : أوههههههههه عل حلاقة يا جدعان
زد : انا من أول ماجيت المكتب النهاردة حاسس كده براحة نفسية فظيعة حاسس حاسس إن المكتب منور من غير ما نولع النور
إكس واى : أكيد يعنى ماحنا فاتحين الستاير و الساعة إتناشر , لما تحور حور مظبوط
لمياء : ميرسى جداً على ذوقك يا باشمهندس
زد يقف صامتاً يلاحظ إن لمياء تتململ فى وقفتها و إنها سترحل : إنتى سمعتى عن المدونات يا بشمهندسة
لمياء : لأ الصراحة , أيه دى
زد : ده يا ستى بتعملى كده صفحة على الأنترنت خاصة بيكى تكتبى فيها أى حاجة عايزة تقوليها دين سياسة أدب فن تتكلمى عن نفسك إنشالله حتى تتكلمى عن الخنازير الصغيرة
لمياء : وبعدين
إكس واى : الحوكشة شكلها إتخنقت منك ياض سرع الرتم انا حنام منك
زد : بس وفيه ناس كتير عاملة مدونات بتبتدوا بقى تعلقوا على بعض وتتناقشوا و تتفاعلوا مع بعض وتطلعوا كل المكبوت جواكم , انا حاسس إن شكلك رومانسية جداً ممكن تكتبى عن الحب
لمياء : لأ غلط الحقيقة انا مش رومانسية خالص
إكس واى يكتم ضحكة : شكلك وحش أوى يا كابتن
لمياء : انا عايزة أعرف أيه فكرة إنك تتعب نفسك و تقعد تكتب و ناس تتفاعل معاك , ليه الدوشة دى مش عندك أصحاب ما تتفاعل معاهم بالصوت والصورة أحسن
إكس واى : أوبة زنقتك فى اليك يا ريسى
زد : العالم الأفتراضى صادق أكتر من العالم الحقيقى الناس هنا مش محتاجة تكدب و بتتكلم بصراحة أكتر
لمياء : ممممم العالم الأفتراضى أنا كان ليا إبن خالة كان بيقعد يكلمنى عن العالم الأفتراضى ده وعن الحقيقة وجوهر الأنسان والكلام الغريب ده
زد : وبعدين حصله أيه إبن خالتك ده
لمياء : عادى يعنى لسة عايش بقالى فترة مابشوفوش , والنبى لو شفته إبقى سلملى عليه
إكس واى : بأمانة يعنى قسمت عليك بالطول وبالعرض
لمياء : سلام بقى يا بشمهندس علشان داخله للدكتور
إكس واى : لأ يا إبنى فِتك بجد البنت خلاص كانت حتعيط بين أيديك
زد : ماشى يا روميو لما نشوفك حتعمل أيه
بعد قليل لمياء خارجة من الحمام
إكس واى يفاجئها بإبتسامة لزجة : شفيتم
زد ل إكس واى : إنت حمار , فيه واحد يقول لواحدة برضوه شفيتم
إكس واى : لا يا راجل تفتكر كده دانا كنت لسة حسألها شدت السيفون ولا لأ
إكس واى : انا كنت عايز أعرض عليكى يا بشمهندسة مساعدتى فى أى حاجة تطلبيها بصفتك نيوكامر يعنى
لمياء : مممممم إنت بقالك أد أيه هنا فى المكتب يا بشمهندس
إكس واى : حوالى ست أشهر كده
لمياء : طب ست أشهر يعنى لسه عضمة طرية , عايز تساعدنى إزاى يعنى
زد يضحك بطريقة مُبالغ فيها : أيوه يا جدعان إكس واى طلع عضمة طرية , ماتسندش على الحيطة أوى بقى علشان ضهرك
إكس واى : شفتى الكليب الجديد بتاع بهاء سلطان
لمياء : الصراحة مبحبش أتفرج على الكليبات بتبقى مليانة مناظر مقرفة
إكس واى : سبحان الله انا زيك بالظبط , الكليب بتاع بهاء سلطان ده فيه بنت كده بتعمل حركات بوسطها وبعينيها أعوذ بالله حركات مقرفة , الواحد بيبقى قاعد على أخره الصراحة
زد : يا إبن المنافقة
إكس واى : أمال بتحبى مين من المطربين
لمياء : انا ماما مربيانى على أغانى الموسيقى العربية و أغانى عبدالوهاب و أم كلثوم , انا بحب من الجداد محمد ثروت جداً
إكس واى : الله محمد ثروت المطرب الوطنى العظيم , انا متربى على صوته
زد : ممممم متربى على صوت محمد ثروت كويس والله , كنت فاكرك متربى على السيريلاك يا روح أمك , يبدأ فى تقليد محمد ثروت وهو يغنى لو ميلتى كده الدنيا تميل حد يسندها يا جدعان
لمياء : بقولك أيه يا بشمهندس الدكتور لوشافنى كل شوية واقفة بتكلم معاك ممكن يهزئنى وانا لسة فى أول يوم كده , و الصراحة ده مكان شغل مش مكان نتكلم فيه عن الأغانى و المدونات و الكلام ده , تنهى كلامها و تنصرف
إكس واى : انا مليش دعوة بالمدونات والله , ده زد هو اللى كان بيتكلم عنها
إكس واى : بقولك أيه يا واد يا زد انا شايف أحسن حل إننا نتحد مع بعض
زد : هى فكرة والله المشكلة إن البنت تنحة أوى ولا هى متوافقة معايا ولا معاك بس مش عارف ليه واقع فى هواها بنت الكلب دى
إكس واى : الحريم دول حاجة مقرفة يا أخى , على رأى الأغنية أحبه مهما أشوف منه , أهم حاجة يا زد إننا نبقى واثقين فى نفسنا , إحنا إتحادنا قوة لا يستهان بها
يبدأن فى الغناء معانا ريال ريال
أتحرك فى خطوات واثقة تجاه لمياء
إكس واى بثقة : معلش بس يا بشمهندسة فيه حاجة عايز أوريهالك فى الأوضة اللى هناك
لمياء تنظر فى زهق ثم تتحرك معى , أشير لها على كمرة فى السقف
إكس واى بمنتهى الجدية : شايفة الكمرة اللى فى السقف دى يا بشمهندسة , انا لازم أقولك معلومة مهمة عن الكمرة
لمياء : أيه يا بشمهندس
إكس واى بمنتهى الجدية و الأهتمام : مش عارف إذا كنتى حتستوعبى اللى حاقولهولك , بس انا لازم أفهمك العملية كويس
لمياء : فيه ايه يا بشمهندس , ماتقول إسم اللى قتل أبوك و تخلصنا
إكس واى : الكمرة بتذهب العقل
لمياء فى ذهول : أيه الكمرة بتذهب العقل ( إكس واى يؤمى براسه فى حزن ) تستوعب لمياء الموقف فتضحك :
اهههههههه فهمتك قصدك الخمرة بتذهب العقل ( ثضحك ثانيةً ) والله يا بشمهندس من أول ماجيت المكتب وانا حاسة إنك مهتم بيا وعايز تفيدنى وتخفف عنى رهبة الموقف , انا من دلوقتى حعتبرك زى أخويا بالظبط
إكس واى : لأ لأ لأ انا مش أخوكى
لمياء : ليه بس مالك متضايق أوى من إنك تكون أخويا
إكس واى : هه
زد : أخوكى بقى وتستغلينى وتنزليلى أجيبلك الحاجات , و أروحك من الشغل بليل علشان , و أخلصلك ورقك اه يا مستغلة واخدانى على طمع اخوكى هه
إكس واى: صايع ياض لميت العملية
لمياء تضحك : لا والله مش قصدى كده خالص
زد : بصىُ يا ستى , إعتبرينى إبن الجيران , أنا إبن جارتك إبتسام انا أهوه واقف على باب شقتكم دلوقتى عيشى الموقف معايا من فضلك
يصطنع إنه يرن جرس الباب ويصدر صوت ببقه : تررن تررن تررن تررن تررن تررن تررن
لمياء : مين إبن الهبلة اللى معلق إيده على الجرس ده , وشرف أمى لاسحله
إكس واى : إبن الهبلة , دى طلعت بيئة أوى ياض
زد : ايوة يا لمياء انا جيت
لمياء تهمس : عايز أيه بابا قاعد فى الصالون
زد : انا أخدت الموبايل أبو كمرة بتاع أخويا وجيت علشان أصورك , وبعد م أصورك حاورى صورتك للكمر اللى فى السما و أقوله دارى نفسك يا كمر , على فكرة انا جايبلك معايا شريط كمر الغرام بتاع محمد فؤاد
تضحك لمياء : والله إنت دمك زى العسل مع إنك شكلك أعذرنى يعنى رخم حبتين
زد : لا والله ده إكس واى بس اللى شكله رخم لكن انا روش و أعجبك
إكس واى : ماشى يا واطى , أول مالسنارة غمزت ضربت تحت الحزام
يرن المحمول الخاص بلمياء , لمياء تنظر لشاشة الموبايل وتقول : ده خطيبى أسامة مش عارفة إذا كان بيتصل ولا بيرن أصله بيشتغل فى السعودية , إنت مالك لونك أصفر كده ليه
إكس واى : هه معلش أصلى بشجع المقاولين العرب
لمياء ترد وهى تبتعد : أزيك يا أسامة عامل أيه
خمس دقائق صمت
إكس واى : إلا بقولك أيه يا زد يا أخويا هو البلانتى بتاع الزمالك فى أخر ماتش كان بلنتى ولا لأ
زد : هه والله مش فارقة يا إكس هو كده كده يعنى القبانى ضيعها
إكس واى : طب فكرنى المرة الجاية نبقى نشوف اللى بيشوط البلانتى ده لابس دبلة فى أيده ولا لأ

31 Comments:

Blogger ملك said...

انت مش مصدق ان فيه خنازير صغيرة
... ...
طب اسأل حملجه

27/5/06  
Blogger 451 فهرنهايت said...

بوست زي العسل
:)
تعازي الحارة بخصوص لمياء اللي بتذهب العقل ... و ع الدبلة دور

27/5/06  
Anonymous غير معرف said...

الصلا على الصلا ....اهنيك يا حوديدو على روح السخرية اللى بتبظ من اللولى الحلوة دى
واحب اقول للاخ عمرو وانا بهز راسى بعنف احة اجحة طاب اسأل حملجة برضووووووووو

elrashidy

27/5/06  
Blogger Bahz Baih said...

زد (بتاعى)البوست ده جامد جدا
أكس واى (بتاعى) يا عم دى كلها تراهات شخصيه
زد: وانت مالك يا سئيل
اكس واى:بس من الواضح ان البنت حلوه
زد: لا دا ماشى الطريق اللى فنان بجد
اكس واى:بس ...يعنى
زد: اسكت انت ..هتودينا فى داهيه
يلتفت لماشى الطريق و يقول
متقلقش يابنى ربنا هيرزقك ببنت زى الكمر علشان خاطر الضحكة اللى خلتنا نضحكها

29/5/06  
Blogger kalam said...

تحيه لاكس وواى وزد
وكل الحروف اللى زى العسل

29/5/06  
Blogger bosbos said...

يا عيني صعبو عليا قوي

معلش باه هارد لك المره دي يا ولاد

29/5/06  
Blogger مفقود said...

نيااااااه
يا سيدي إسمح لي أن أقول لك تعيش و تشرب غيرها
بعد كده ركز شوية في موضوع الدبلة

مدونتك مميزة جدا

كن بخير

29/5/06  
Blogger The Great Pretender said...

أول مرة اخش عندك البلوج
بجد جامد يابني
ظريف جداً موضوع اكس واي وزد ده

30/5/06  
Blogger shababik said...

لذيذ اوي البوست يتاكل والله

30/5/06  
Blogger فنجان قهوة said...

ممممممممم
انت ايه اللى بيجرالك بالظبط؟
انت ماكنتش كده

1/6/06  
Blogger غادة الكاميليا said...

ههههههههههه
تصدق بالله أنا كل مدخل البلوج الحلو ده بمووووووووووت من الضحك
يخرب عقلك لذيذ موت
تعيش تاخد غيرها
تصدق ولا أنا بحب إسم لمياء ده خالص

1/6/06  
Blogger Hadeel said...

سجل عندك:
معجبة من السعودية !!

1/6/06  
Blogger Mohamed Yousef said...

very very funny post... :-D

2/6/06  
Blogger santakarim said...

very nice & funny post, i really liked it :-)
yamkn 3lshan wla d kar wa7d :-)

3/6/06  
Blogger hesham said...


ايه يا عم الحلاوة و الجمال ده
بوست رهييييب
سطحتنى على الارض من كتر الضحك يا معلم
تعمل كده فيا برضه من اول مرة ازورك
بس انا شكلى كده هابقى زبون
سلامى ل اكس واى و زد
و قبلاتى للمياء
و بحقد على اسامة..ابن المحظوظة

4/6/06  
Blogger هوميروس said...

مساء الجمال اكس واي زد تاني
بقولك ايه كنت عايز استعير شخصيتك الافتراضية في اخراج ماتش كورة بين المدونين ياريت توافق؟

10/6/06  
Blogger ماشى الطريق said...

هويروس:
مفيش أى مشاكل يا باشا
بس انا عايز ألعب وسط مهاجم يا ريت

10/6/06  
Blogger sha3'af said...

أنا بصراحة كتييير قوي شفتك وانت ماشي الطريق في مداونات تانية ، بس ما خطرش على بالي أجيي مداونتك

وبالصدفة البحتة / أدخل اليوم هنا - مع اني كنت مقاطعة النت والتعليق لفترة - وآلاقي كل خفة الدم ، والذكاء ، و" الاهتمامات السينيمائية " المدفونة ، واللي بتظهر غالبا في تقسيمة العمل ، وتصميم المشاهد / أول حاجة بدأت قرايتها (إبراهيم وياسمين ، فيلم تسجيلي)


بس فعلا أحسن حاجة بالنسبة للبوست الأخير ده انك راسم ال 3 شخصيات بشكل رائع
وكأنهم 3 شخصيات منفصلين تماما عنك

ليك مستقبل يا بني

12/6/06  
Blogger عشقك ندي said...

حلوة بجد ما قريتش حاجة تضحك من زمان
الاسكندرانية برضه يا جدعان خفة الدم

14/6/06  
Blogger shababik said...

اية يا باشمهندس انت مش بتردألا علي هوميروس بس ولا اية؟ أنا هبدأ أغير
عموما بهزر طبعا مستنيين الجديد يا باشا

15/6/06  
Blogger ماشى الطريق said...

شكراً جداً والله لكل الناس اللى علقت على البوست ده
كله كله ماعدا الولا شبابيك
بهزر يا جدع متكشرش كده
وفيه حاجات جديدة إنشاء الله
بس مستنى اكتبها على الكمبيوتر
طريقكم أخضر بالصلاتو عالنبى

15/6/06  
Blogger FrEe.PhArAoH said...

جاااااااااااااااااامدة

بجد حلو اوى .. تعيش وتاخد غيرها يا زد .. معلش يا اكس يا خويا

21/6/06  
Blogger sasha said...

البلانتى جيه فى الأوت . . . و ابقوا خالى بالكم المرة الجاية يا شباب . . . لحسن الكمر طلع فيه عيب والسقف كان هايقع على راسكم.

22/6/06  
Blogger shabaskandrany said...

بوست جامد جدا

23/6/06  
Blogger هوميروس said...

تعرف من غير قرع ولا مجاملة ولا تثبيت دي المرة السادسة اللي اقرا فيها التدوينة اوعي تكون زملكاوي وتزعل من انها المرة السادسة

29/6/06  
Blogger sabrina said...

انتوا بقي تجيبوا حد ثالث معاكو
وياريت يبقي لأبس نظارة علشان يبقي يشوف كويس ولأ عدسات ملونة علشان التظبيط
really i love it alot

1/7/06  
Blogger Eman M said...

:)))))))))

بس خلى بالك انها ممكن تكون مخطوبة و مش لابسة دبلة:)

7/7/06  
Blogger BaTresYa said...

ههههههههههههههههه رووعه مش ممكن بجد بوست جميل جداً .. وكتابه رائعه بأسلوب مضحكـ وجميل ..
في إنتظار جديدكـ

21/8/06  
Anonymous غير معرف said...

hi ana sara a7la 7aga 3agabetne lama bet7ako 3ala ba3d lama tekbeshom w 7elw etasmem enohom lazem ykalemoha ma3a enaha kanet re7'ma ma3ahom

20/4/07  
Anonymous mahomed said...

هااااااااى الرنس لولى محمد شلبى محمد على

9/12/07  
Anonymous غير معرف said...

البرنس بوسكة الباشا محمد جمال حسان

31/8/09  

إرسال تعليق

<< Home

Free Web Site Counters