الخميس، مايو 18، 2006

جمال الجمال

يقف خالد على شاطىء البحر يراقب مشهد غروب الشمس فى إستمتاع شديد , يبدو على عينيه التأثر , يقترب منه أحد الأشخاص ( على ) , يقف بجواره تماماً ويبدأ فى نقل النظرات من خالد إلى مشهد الغروب ثم يحدق بشدة فى خالد
خالد ينتبه له : فيه حاجة با أستاذ , حضرتك بقالك عشر دقايق متنح فيا
على : أسف جداً يا أستاذ أنا بس لقيتك مستمتع جداً بمنظر الغروب مرضتش أقطع حبل أفكارك
خالد يتنهد : الصراحة المشهد جميل جداً الألوان خرافة , قرص الشمس وهو بيغرق فى البحر , تحس إنها صورة مرسومة , سبحان الله فعلاً , أيه الجمال ده يا أخى
على : إنت فعلاً مقتنع إنه مشهد جميل ؟؟؟؟؟؟؟؟
خالد فى ثقة : أكيد طبعاً حد يقدر يقول حاجة غير كده , مشهد الغروب ده بعتبره معجزة من معجزات الخالق جمال حقيقى يرد الروح فيك , حضرتك مش شايفه منظر حلو ولا أيه
على : أنا شايفه منظر عادى جداً , هو أكيد شكله حلو بس مش شايفه جميل للدرجة دى زى حضرتك كده
خالد يمط شفتيه : يعنى وجهة نظر
على : حضرتك عندك أولاد
خالد ينظر له فى ضيق ثم يعود لمنظر الغروب ثانيةً : اه محمد تمن سنين و رنا تلات سنين
على : ربنا يخليهملك معلش بس ما إتعرفتش على حضرتك , أنا على
خالد فى بعض الضيق : خالد
على : فرصة سعيدة بصُ يا أستاذ خالد إسمحلى إنى أكون حشرى و أتدخل فى حياتك الشخصية
خالد ينظر له فى إستغراب و ضيق
على لا يبدو عليه أنه لاحظ ضيق خالد فيستأنف كلامه : إنت يا أستاذ خالد واضح عليك إنك راجل من الطبقة المتوسطة زيى يعنى ومقضى اليوم بيومه , إسمعنى بس يا أستاذ متبوصليش كده أنا قولتلك حبقى صريح إنت النهاردة طلعت من شغلك كفران كالعادة , لأى سبب من الأسباب يعنى مش حندقق فى النقطة دى قولت تيجى تقف على البحر شوية وتستمتع بمنظر الغروب قبل ماتروح بيتك علشان تهدى أعصابك , بس يا سيدى بعد كده حتروح البيت , تلاقى الولا محمد عامل دوشة كالعادة و رنا قارفة مامتها برضوه , المهم إنك حتوهم نفسك إنك كنت لسة عالبحر بتتمتع بمنظر الغروب و إن أعصابك هادية , هية يا يادوب ساعة وحتلاقى نفسك بتسب وتلعن , عارف ليه علشان وهمت نفسك إنك حسيت بالجمال
خالد : لحظة واحدة يا أستاذ انا بحاول أجمع كلامك فى دماغى
على يبتسم ويضع يده على كتف خالد فى حميمية : عارف بقى فعلاً لو كنت حسيت بالجمال كنت حترجع البيت أعذرنى فى اللفظ تبوس مراتك وتلعب عسكر وحرامية مع محمد و رنا تركبك و إنت تقولها قولى شى يا حصان يا رنا وهى تضحك وتقولك سي يا حومال ( خالد يبتسم ) عايز تعرف إنت فعلاً إستمتعت بالجمال ولا لأ فعلاً
صدقنى عمرك ما حتعرف وقتها لأن الوقت اللى بتستمتع فيه بالجمال , مابتحسش بيه صدقنى حتحس بس إن إنت مبسوط لسبب غير معلوم , بعد إسبوع من دلوقتى أراهنك إنك مش حتفتكر منظر الغروب ده , حتفتكر بس جملة كان قالها واحد صاحبك و إنتوا قاعدين على القهوة ساعتها كنت إنت فعلاً حاسس بجمال , جمال الصُحبة

خالد يتنهد
على : أيه مالك
خالد : لا أبداً يعنى لسه بس بحسبها فى دماغى
على : إنت عندك كام سنة يا أستاذ خالد
خالد : تمنية وتلاتين سنة
على : أنا عندى إتنين و أربعين سنة يعنى مش أكبر منك أوى , أنا كنت زيك كده بأنبهر بالحاجات اللى الناس بيقولوا عليها جميلة , منظر الغروب , صورة عيل صوغير حاطط صوبعه فى بقه , منظر طبيعى , النسيم اللى بيدخل فى صدرك و إنت نازل الصبح بدرى , مش عارف الرجفة اللى بتجيلك لما تمسك أيد اللى بتحبها وهلُم جركل الحاجات اللى الناس بيقولوا عليها جميلة كنت بردد وراهم و أضحك على نفسى زى الحمار و أقول إنها جميلة , عارف أيه اللى خلانى أبتدى أفكر كان فيه ممثل إسمه " بيلى كوساك " أكيد سمعت عنه لو ليك فى السينما المهم أنا و أصحابى وزى كل الناس كنا مقتنعين إن الراجل ده تمثيله مرعب ومالوش حل ويا ما هنا و يا ما هناك , لحد من حوالى سبع سنين كنت قاعد بتفرج على فيلم أنا و ناس أصحابى ويظهر إننا فاتنا جزء كبير منه قُلنا نكمله والسلام أهو وقت وبنقضيه ماطولش عليك , اللى فاهمناه إن البطل بتاع الفيلم كان سليم وبعد كده حصلتاه حادثة ووشه إتحرق تماماً وعمل عملية تجميل وملامحه الأصلية تاهت تماماً , بس و الفيلم بقى عمال يقولك إزاى الناس معاملتهم إتغيرت ليه و البنت اللى كان بيحبها سابتوه و عمال يوضحلك معاناة الراجل وألمه النفسى , المفروض فى فيلم زى ده تتعاطف مع البطل ,إحنا على العكس تماماً كنا ميتين من الضحك على الأداء المفتعل بتاعه , خلص الفيلم يا سيدى أنا و أصحابى صممنا نستنى التترات علشان نعرف إسم الراجل ده أيه , مش حتصدق طلع مين
خالد : بيلى كوساك
على : الله ينور عليك طلع إبن الهبلة , الحكاية دى فوقتنى خلتنى أعرف إن كنت بشوف بعيون الناس , خلتنى أحس أد أيه أنا كنت منافق مع نفسى , إنت لو كنت بتحب القراية حتلاقى ناس عمالة تكتبلكك عن جمال الطبيعة والسكون النفسى و الأرتقاء الروحى وجو الريف اللى بيرجع الأنسان لفطرته وكلام كبير أوى , طب بذمتك عمرك شفت حد من الناس دى ساب حياته المدنية وعربيته ورصيده فى البنك و راح قعد فى الريف ولا فى حضن الجبل , كله كلام فى الهوا , إشتغالات , الناس بتكدب وبتصدق كدبها وبتيجى ناس تانية تعيش على كديها إتفو على دى دنيا وسخة
خالد : إنت سوداوى أوى يا أستاذ على
على : بالعكس أنا بفكر صح بفهم وبحس بقلبى وعقلى كلهم مع بعض مش كل واحد لوحده , إنت عارف أنا فعلاً بحس بالجمال فى أيه
خالد : فى أيه يا أستاذ على أنا فعلاً مشتاق واحد زى حضرتك بيحس بالجمال فى أيه
على : فى أى حاجة والله , دى الغلطة اللى بيقع فيها الناس إنهم بيسرقوا مواطن الجمال من ناس تانية الجمال هو اللى بيلاقينا إوعى تدور على الحاجات الللى بلاقى فيها الجمال مش حتحسه والله , كل واحد ليه مناطقه الخاصة , وده مايمنعش إنها ممكن تتقابلوتتاقطع ,كان لية واحد صاحبى إسمه كريم كانت غيته يفتح براد الشاى والمية بتغلى ويتفرج على منظر الفوران , إحنا كنا بنألس عليه مع إن ده كان جمال بالنسبة له الجمال مش إنك تلاقى بنت صغيرة ماشية مع أهلها و تقعد تلاعبها و إنت فاشخ ضبك وتقعد تقول نفسى أرجع عيل صغير , إنت بتردد الكلام و إنت حافظه مش فاهمه , ماتدورش عالجمال يا إبنى صدقنى , ماتروحش تتفرج على الغروب علشان الناس بتقول عليه منظر جميل صدق نفسك ما تصدقش الناس
صمت لعدة دقائق
خالد فى صوت مخنوق : إنت عارف أنا شايف قرص الشمس ده أيه دلوقتى
على : أيه
خالد يضحك بصوت عالى : قرص فلافل كبير أوى حيغرق فى البحر ولازم حد يلحقه
على : حلاوتك يا سلام بقى البحر ده كمان لو بقى طبق طحينة كبير
خالد : اه إنت كدة عملتلى البحر طحينة
على يضحك: يلا بينا بقى نروح نجيب عيش قبل ما الأكل يبرد
يضحك الأثنان , يودعان بعضهما البعض , ثم ينصرف كل منهما إلى طريقه
.........................................................................................
بيلى كوساك : شخصية وهمية لا وجود لها

12 Comments:

Blogger M. El-Hajj said...

يا سلام لو لقينا علي دا علي دماغ كل واحد عايش الدور علي نفسه كدا يديله قلمين يفوقه من أوهامه
و نعم يابني و الله
حسبي الله و نعم الوكيل فيك و في عقدك يا معقد :D

19/5/06  
Blogger Sala7ef said...

يابن القردة... شخصية علي جامدة موووت و طلعتها جامدة... بس كان ممكن تحتفظ بكلامه الجامد مع الاحتفاظ بشخصيتة الغبية زي ما حسيتها في أول القصة.... رسم الشخصيات جامد و الحوار جامد و بيلي كوساك جامد و الموضوع جامد...
و ليا تعقيب على خطأ علمي في القصة و هو ان الشمس مش بتنزل في المية ... ممكن أشرحلك الموضوع ده باستفاضة بعدين

20/5/06  
Anonymous غير معرف said...

المرة دى حاسة انك سفسطائى اوى فى وجهة نظرك
وكمان بالرغم من حبكة الحوار بس مش مقتنعه و مش حاسة انه طبيعى
كان ممكن تسرد وجهة نظرك بشكل افضل من غير سيناريو
يعنى تطرحها كموضوع .. وجهة نظر شخصية
الحوار اخد من المعنى شوية
خللى بالك يا فنان
عشان انت بجد فنان

20/5/06  
Blogger MrMr said...

حلو قوي بس عارف انا لو حد حاول يتدخل في حياتي كده ممكن ارميه في الطحينه :)
بس حلو الموضوع
انا عايزه اعرف حاجه بعيده عن الموضوع
يعني ايه جومه؟
اعذروني انا مش اسكنرانيه و ماشفتهاش غير 3 مرات بس

20/5/06  
Blogger السهروردى said...

و ألحق العصفورة...بص ياريس ...كلام جميل و كلام معقول مقدرش أقول حاجة عنه
أنا نفسى فيا شوية من عمو على دا
و برضه بحاول أعيش نفس إحساس عيشة ناس تانية عاشتها و ماتت و بستمتع جدا
و مش أى حد بيحب و عاجبه الغروب يبقى راجل مبتذل و إحساسه مستهلك
أنا فاهم قصدك كويس
بس الكلمات خانتك إلى حد ما
عموما أنت إستنانى لما أقرالك الأعمال الكاملة و بعدين يبقى لينا حديت طويييييييييييييييييييل
علشان أنت راجل فى الجون
مساك عسل

20/5/06  
Blogger ماشى الطريق said...

zengy
أنا حاسس إنك بتلقح كلام ياض
عموماً أنا مش معقد أنا عندى بس كام عقدة صغيرين
ماتحرجنيش تانى كده لو سمحت
gamalone
على فكرة أنا مش عامل شخصية على غبية ولو وصلتلك إنه شخص غبى تبقى دى غلطة منى
وبالنسبة لموضوع الشمس اللى بتنزل فى المية فاحب أسمع وجهة نظرك
فنجان قهوة
هو فعلاً أنا كنت ناوى أعمل زى مانتى بتقولى و أكتبه كموضوع بس حسيت إنى لو عملت كه ممكن تبقى وجهة نظرى مش باينة أوى زى لو كتبته كحوار
mrmr
يا نهار أبيض أفهمهالك إزاى دى
جومة =أستيكة= ممحاة
السهر وردى
واللهي يا عم أنا مش قصدى أطلع إن مشهد الغروب مستهلك ولا حاجة
انا كل الفكرة بس إنى مش عايز الناس تحبه من غير ما تكون حاسة إنه فعلاً منظر جميل و إن العملية تبقى تقليد و السلام

20/5/06  
Blogger shababik said...

عاجبني سردك لوجهة النظر ف موضوع الجمال والاحساس بالجمال وبحس بالنسبة لي ان الجمال عمرة ما كان ف ذاتة ولا في الاشاعات اللي بيطلقها معظم النا=س عنة بس بحس انة اصغر مما نتصور وابسط
وكنت عايز اكمل بس مش عايز اطول
انا متضامن مع فنجان ف تعليقها الي حدما ف البوست دة حاسس انك في مقاطع سبت نفسك فيها شوية وبلغة قليلة شوية اتفقست كدة
بحب اتابعك اوي علي فكرة شفت ازاي بقي انا مش بحب الكلام الكتير!.

20/5/06  
Blogger kalam said...

عندك حق جدا
انا كمان مش باحب اخد حاجات من المسلمات واصدقها
التجربه الشخصيه هى اساس كل شىء

23/5/06  
Blogger Bahz.Baih said...

الكبير كبير يا عم و الفانتازيا فانتازيا ..و اللى ماشى ماشى
و الفكره حلوه مووت بس لوكانت خواطر ماشى الطريق مش أفكار على مانت بقت أحلى
بس سيبك من الصياغه عاجبانى قوى فكرخ أستمتاعك بالجمال بطريقتك

ليا واحد صاحبى بيستمتع بأنه يسمع الناس فى طابور العيش لدرجه انه بيقف بالساعه و الاتنين لما الراجل يزهق منه بيجبله العيش و يمشيه

بس حلو موووووووت

25/5/06  
Anonymous غير معرف said...

أنا بكيت بجد!! و دموعي نزلت مرتين مره من الضحك المر و مره من الحقيقة المستخبيه جوه كل واحد فينا ورافض يلاقيها مع أنه عارف هو مخبيها فين و إزاي. أعتقد أن راح أزورك قصدي مدونتك كل ما أحتاج أحس أني لسه عايش و أن لسه في ناس عايشه!!! ربنا يوفقك من كل قلبي ولا أنكر لقد شعرت أيضا بالغيرة و تمنيت أني أنا اللي كتبت اللي كتبته ده.

15/6/06  
Blogger Yamen said...

bravo
bravo
bravo
keep on

27/6/06  
Anonymous غير معرف said...

hi ana sara zay ma2al [ezz]ana ba7eb age hena 3alashan a7'ale nafse tsada2 en fi nas zayak bgad ana bat3alem menak mesh 3arfa kter aw shwaya bas ana 3arfa enak 3'ayart nazrete 3an 7agat kter w 7'aletne ashof 7agat kter shokran

21/4/07  

إرسال تعليق

<< Home

Free Web Site Counters