الاثنين، أغسطس 21، 2006

خَمس دقايق - لون رومانسى

محمود يجلس على شاطىء البحر فى ميامى .....رضوى قادمة فى إتجاهه تصافحه
محمود : صباح الخير يا رضوى
رضوى : صباح الخير يا محمود أيه الميعاد الغريب اللى إنت جايبنى فيه , حد برضوه يدى ميعاد تمانية الصبح على البحر , وكمان إنت مروحتش شغلك ليه
محمود : قُلتلهم تعبان شوية , زوغت يعنى من الأخر و كمان كُنت عايز أشوفك , وحشتينى يا ستى أعمل أيه فى الحب وسنينه
رضوى : أيوة أيوة حَور يا خويا حور مانا مبخدش منك غير الكلام
محمود : يمكن علشان كده جايبك النهاردة يا رضوى جايبك علشان نتكلم , أيه رأيك لو فتحنا قلبنا لبعض خمس دقايق يا رضوى
رضوى : و إنت قبل كده ماكونتش بتفتحلى قلبك يعنى
محمود : الواحد مهما فتح قلبه يا رضوى بيبقى فيه حاجة بيخبيها ورا الباب علشان محدش يشوفها انا جايبك النهارده علشان نشوف اللى ورا بيبان بعض
رضوى : مش عارفة يا محمود حاسة إنك مش مظبوط النهاردة , عموماُ عادى إنت إمتى كان مخك مظبوط
محمود : بصُى بس و إسمع طريقة الكلام حتكون غريبة شوية إحنا حنتكلم خمس دقايق بس حنفضل نتكلم نتكلم و أول ما نحس إن الكلام حيبقى مش طالع من القلب حنسكت ونبدأ دقيقة تانية , خمس دقايق بالظبط يا رضوى صدقينى حيفرقوا يامة أوى معانا
رضوى : مفيش مشاكل يا محمود , أى نعم أنا مستغرب العملية شوية بس مين قالك يمكن مع الكلام أقتنع و أندمج أكتر منك , عموماُ يلا بينا نتكلم و إحنا بنتمشى , تبتسم إبتسامة خفيفة لزوم الرومانسية و الفضفضة بقى

الدقيقة الأولى

محمود : عارفة يا رضوى لما بييجى فى الأفلام و الروايات وحتى فى حياتنا دى ويقولك إنك ماينفعش تحبى شخص علشان فيه ميزة معينة لأن الميزة دى ممكن تروح مع الوقت و إنك لازم تحبى الواحد كله على بعضه و إن مفيش سبب معين للحب و الكلام ده
رضوى : عارفة الكلام ده و مقتنعة بيه جداً كمان
محمود : أهو أنا بقى يا رضوى بحبك علشان سبب معين
رضوى : كَمل
محمود يبلع ريقه : عارفة انا بحبك ليه علشان معاكى بحس بالحنان , زى ما تقولى كده انا مُصاب بنقص فى الحنان بس فعلاً لما ببقى معاكى بحس كده و حياة والدك ما تقلسيش بحس إنى عيل صغير ومرمى فى حضن أمه
رضوى : كَمل يا محمود انا سامعاك وحساك والله بس مش عايزة أقطع إسترسالك
محمود : فيه موقف على طول بتخيله بعد مانتجوز إنشاء الله , إنك تكونى قاعدة على سرير أودة النوم لابسة قميص نوم لونه هادى و أنا نايم فى الإتجاه العمودى , حلوة الأتجاه العمودى سامحينى مهندس بقى المهم انا حاكون مريح راسى على رجلك للأمانة العلمية على إحم أقولهالك إزاى وركك يضحك فى عصبية بس يا ستى و إنتى عمالة تلعبى فى شعر رأسى بإيديكى و فى نغس الوقت نكون مشغلين التلفزيون بنشوف أى حاجة فيه
رضوى : ألعب بإيديا فى شعرك
محمود : صدقينى مفيش عشر دقايق وحتلاقينى نايم , عارفة الحنان ده بيدفى جداً بيخليكى تنامى متصالحة مع الحياه و أول ما تلاقينى دخلت فى النوم
رضوى : حأقوم شايلة راسك من على رجلى بس أكتشف إن راسك تقيلة أوى ومش عارفة أنقلها حبتدى أضحك وحيصعب عليا إنى أصحيك من نومك حبدأ واحدة واحدة أحرك فى جسمك لحد ماتنام مظبوط
محمود : ماتنسيش ساعتها تبوسينى على خدى لو سمحتى شوفى أنا حكون نايم وممكن ماحسش فيها بس الأبتسامة الصغيرة اللى حتلمع على شفايفى حتكون كافية أوى
رضوى : دقيقتين وحاجيبلك حاجة أغطيك بيها و أقعد جنبك مقرفصة على السرير و أبتدى أبوصلك من وقت للتانى كده و أضحك على منظرك و إنت نايم
محمود : و انا حتلاقينى بأقوم مادد أيدى من تحت الغطا وماسك أيدك , متعرفيش حيكون أيه الأحساس ساعتها بس أكيد الحركة دى بتدينى دفا من جوا
رضوى : ربنا يخليك ليا يا محمود

الدقيقةالثانية

رضوى تتكلم بنفس طريقة الإعلان : محمود إنت ليه ما بتقوليش كلام حلو
محمود يضحك
رضوى : لأ بجد والله إحنا مخطوبين بقالنا ييجى سنة و نعرف بعض من فوق السنتين وعمرك ما قولتلى غزل أى حاجة من حاجات الأغانى دى , أنا عارفة إنت حتقولى أيه " حتقوم عادل نضارتك و تعيش دور الفيلسوف الهندى سامحنى بقى إحنا بنتكلم من القلب و تقولى الحب مش لازم يتقال يا رضوى ممكن تحسيه فى نظرة عينيا و أنا بحط أيدى فى أيك علشان أعديكى السكة و أبقى مطمن عليكى أكنك بنوتة صغيرة
محمود : مش عارف يا رضوى أنا عُمرى ما فكرت فى حكاية الكلام دى أنا على طول كُنت ببقى متأكد إن إحساسى واصلك من غير أى توصيلات
رضوى : واصل يا سيدى والله بس أنا بنت يا محمود بحتاج أسمع الكلام الحلو ده من حبيبى زى أى بنت , أفتكر الكلام و انا حاضنة مخدتى بليل قبل مانام , لما أقعد مع البنات وكلُ واحدة تقعد على الكلام اللى بيقولهولها خطيبها ولا جوزها , ببقى عايزة أقولهم إن خطيبى بيحبنى قد الحب اللى واصلهم كلهم , بس هو عيل ترباس مبيعرفش يوصل المعلومة
محمود يضحك : ترباس عيب والله يتقدم خطوة عسكرية للأمام يقف أمام رضوى وقفة عسكرية
محمود : رضوى يا بنت الأستاذ محمد سالم
رضوى : أيوة يا خويا أنيي رضوى
محمود : بدى أالك شى
رضوى فى لهفة : قل ها الشى
محمود لا يتمالك نفسه من الضحك : انا مبحبكيش
رضوى فى سخط : يا رذل
محمود : انا بموت فيكى
رضوى : متشكرين يا سيدى
محمود يعتدل : أسف يا رضوى بجد بس بأمانة مقدرتش أمسك نفسى من إنى أرذل عليكى
رضوى : خلاص يا محمود مفيش مشاكل
محمود فى صوت خفيض : على رأى أمى طول عمرى مدَب مبعرفش أتكلم
رضوى تبتسم : خلاص بقى يا حودة بحبك حتى و إنت مدَب

الدقيقة الثالثة .
محمود : فكرتى يا رضوى قبل كده إننا ممكن نسيب بعض فى يوم من الأيام
رضوى : بصراحة اه وفيه أوقات بتعدى عليا بحس إننا ما ننفعش لبعض و إننا عُمرنا ما حنتجوز
محمود يضحك : بتخيلك ساعتها كده و إنتى ماشية فى الشترع ساحبة فى أيدك عيل مراخيره سايحة وجوزك سابقك بعشرة متر وولا فى دماغه القمر اللى هوا متجوزه
رضوى تضحك : وساعتها حتقول أيه لأميرة
محمود : أميرة مين
رضوى : مراتك اللى حتكون قاعدة جنبك عمالة تكلمك و إنت سرحان فية أنا و جوزى أبوشنب بريمة
محمود : مش عارف حأقولها أيه بس أكيد حأقولها يلا بينا عالبيت , انا مصدع أوى يا أميرة و ممكن برضوه الأقى نفسى متخيلك إنتى مكانها و أقعد أقولها كلام حب على إنها إنتى و جايز جداً إنى أغلط فى الأسم و أقولها يا رضوى و أضيع فرحة البنت بالكلام الحلو , أنا على طول بحس إن إحنا لو إفترقنا يا رضوى و إرتبطنا بناس بعد كده أكيد حيتظلموا أوى معانا



الدقيقة الرابعة
رضوى تضحك فجأة : فاكر أول يوم إتقابلنا فيه
محمود : ياه يا رضوى ليه كده
رضوى فى إندهاش : أيه اللى ليه كده
محمود : أسئلة الأفلام العربى دى , أول مرة إتقابلنا فيها و أول بوسة و أول كلمة بحبك
رضوى : بس إنت عُمرك ما بوستنى
محمود : يا ستى مش الفكرة قصدى الحاجات اللى الناس إتعودوا يقولوها فى مشاهد الحب , عارفة يا رضوى انا لو حخرج فيلم حب عن علاقتنا مش حختار المشاهد الرومانسية و بس حختار مشاهد طبيعية جدا , زى مثلاً من يومين لما كنُا معديين السكة و إحنا سرحانين و سواق المشروع اللى طلع شتمنا من شباك المشروع
يضحكان
محمود : إلا قوليلى يا رضوى إنتى كٌنتى سرحانة فى أيه , هاه قوليى يا بِت
رضوى : مش شغُلك
محمود : ممكن مثلاً تكونى كُنتى بتفكرى فى بلوزة شُفتيها وعجباكى , الحب اللى بينا يا رضوى مش مشاعر و بس , تقدرى تقولى كده معاٌدلة شاملة حاجات كتيرة أوى , عارفة ليه علشان إحنا عايشين فى مجتمع واقعى و الحب للأسف تسعة و تسعين فى الميه منه خيال و مشاعر حاجات متقدريش تتعاملى بيها مع بياع الطماطم
رضوى : محمود أنا صدعت فعلاً يا ريت بلاش الحٍكم و المواعظ اللى كل ما تلاقى فرصة ترازينى بيها
بما إننا فى ساعة صفا أحب أقولك إنى مبحبكش لما بتلعب دور الحكيم , الصراحة إنت ساعات بتقول كلام كويس و منطقى بس أنا شايفة إن الحب حاجة أبسط بكتير أوى من كل الحوارات دى انا بحبك إنت بتحبنى خلاص خٍلصت
محمود فى ضيق : ما كُنتش عارف إن كلامى بيضايقك أوى كده متأسف جداً يا ستى

الدقيقة الخامسة
محمود و رضوى يسيران بدون أن يتبادلا الحديث
محمود ينظر لرضوى فى غضب , بينما رضوى تسير وهى تنقل عينيها من وقت للأخر من البحر إلى موضع قدميها و العكس
محمود : رضوى
رضوى : أيوة يا محمود
محمود ينظر فى غضب إلى رضوى فجأة يبدأ فى اللعب بحواجبه و عمل بعض الحركات المصحكة بوجهه , رضوى لا تستطيع المقاومة و تبدأ فى الضحك
محمود : حاجة مقرفة فعلاً
رضوى : أيه بس
محمود : مبعرفش أزعل منك , كل ما يحصل زعل بينا أجى أنا اللى أصالحك , الواحد مش تقيل خالص ....حاجة نيلة أوى
رضوى تضحك محمود ينظر لها يضرب كف بكف ثم يشاركها الضحك

الدقيقة السادسة
رضوى : بقولك أيه يا محمود إشمعنى إخترت خمس دقايق بالظبط
محمود : يعنى مش عارف والله يا رضوى مش علشان سبب معين بأمانة ممكن علشان رقم مميز يعنى كنت ممكن أختار سبع دقايق أو عشر دقايق
رضوى : بأمانة يا محمود انا متضايقة منك جداً
محمود : ليه بس
رضوى : يعنى فِكرة إنك حصرت العلاقة بينا خمس دقايق , إزاى تهون عليك حياتنا كده , إيه اللى خلاك تفكر إن الخمس دقايق دول هما اللى حيخلونا نقرب لبعض , انا كنت فاكرة إننا قريبين جداً من بعض أكيد ساعات بنكدب على بعض و ساعات بنخبى حاجات لينا بس تقدر تقول ده ملح العلاقة اللى بينا مهما إن كنا بنحب بعض ما ينفعش أوى نفتح نفسنا على بعض أوى كده لأن أكيد حنقول كلام مش المفروض نقوله كلام بيدوب تحت الحب و الثقة و التفاهم اللى رابطين بينا , فاهمنى يا حودة
محمود : أنا فاهم إنتى قصدك أيه يا رضوى بس إنتى عارفة أنا عندى مشكلة كبيرة فى الثقة يا رضوى , ساعات بحس إن مفيش حد بيحبنى
رضوى : متقولش كده يا محمود , أنا بحبك والله
محمود : عارف يا رضوى إنك بتحبينى و عارف إن فيه ناس تانية كتير بتحبنى بس أنا مبقدرش أحس بالحب ده
رضوى : مالك يا محمود أول مرة أشوفك حزين كده
محمود : عادى يا رضوى عادى انا بحس الحب ليا فى حاجات بسيطة أوى صدقينى , بس اليومين دول كنت محتاج أتحب أوى و لقيت إنك أقرب حد ليا ممكن يحتوينى و أنا فى حالتى النفسية الزفت دى
رضوى : محمود
محمود : أيوة يا رضوى
رضوى : انا بحبك أوى , بجد والله مش بقول كده علشان أبسطك بس أنا فعلاً بحبك , مش عارفة أعملك أيه علشان أطلعك من الحالة دى غير إنى أحبك أكتر
محمود : وانا برضوه بحبك يا رضوى

38 Comments:

Blogger Lasto-adri *Blue* said...

لاء ماشى

انا اتثبت كدة

طبيعى الحوار بشكل لا ممكن ابدا

لا....... فظييييع ماشاء الله

25/8/06  
Blogger ملك said...

يا ريت تكون فيه علاقة على المستوى ده
و عامة على رأى عدوية أديك تقول مخدتش

25/8/06  
Blogger sha3'af said...

أنا معترضة .. معترضة ... معترضة
مش عارفه ليه دايما البنت بتتصور - بالحس الرجولي طبعا - ان ما يهمهاش غالبا غير الكلام الحلو و بس

سواء في الكتابة او الافلام او .... الخ

بس مش كده يا جماعه
بوظتوا الموضوع خاااالص

مع ان بالعكس

ساعات آخر حاجة البنت تكون عاوزاها هيه الكلام
لان مافيش أسهل منه
و مافيش أسخف منه

بيتهيألي لو اهتم بانه يسمعها و يفهمها يبقى أحسن من مليون كلمة حلوة
لو بصت له على فجأة و لاقته متابعها من بعيد في وسط ناس كتير
يبقى الدنيا و ما فيها

لو الاتنين جمعتهم نظرة فهم لنفس الشيء في نفس الوقت
يبقى ايه فايدة الكلام اصلا ؟.


دي نقطة

النقطة الثانية بقى
انت كده ظلمت الراجل بتاع الطماطم خاالص
يا بني
و بما اني لسه كنت باشتري طماطم انهارده
كانت لحظات مليئة بالرومانسية و المشاعر و الست بتنادي ع الطماطم بتاعتها
الحب موجود في كل حاجة و عند ناس كتيير
بس محتاجين نشوفه و نحسه
و نقدره

25/8/06  
Blogger Zengy said...

هو أنت شبهي كدا ليه يا محمود


هي ليه القصة دي بتمس الواقع بالشكل ده

تكونش بتكتب نفسك ؟؟

25/8/06  
Blogger Ezz said...

يا باشمهندز، الدقيقة التالتة عبقرية بشكل خاص بي شخصيا. بس بجد هو في حد كده زي رضوى؟؟ تصدق الحوار ده حسسني إن الدنيا لسه بخير. عز

27/8/06  
Blogger AZ said...

شغف انت بنفسك قلتيها "ساعات".. يعنى استثناء ومن الطبيعى جدا جدا جدا ان يبقى فى استثناء طبيعى لدرجه ان مش كل واحد اما يتكلم لازم يقول ان فى استثناء لكلامه... وحتى البنات ياستى اللى "ساعات "بيبقوا عايزين حاجات تانيه بيبقوا عايزينها زياده عن الكلام.. يعنى احتياجهم لائياء اخرى لا يمنع احتياجهم للكلام الحوناين.. روقى يا شابه
الحوار واقعى يابنى بطريقه بنت ستين فى سبعين..

27/8/06  
Blogger Moia said...

الله :)
وجعت قلبى . بس وجع حلو :)

28/8/06  
Blogger kalam said...

سـ يـ نـ مـا

سيادتك ما ينفعش تشتغل في حته تانيه

تحياتي للفنتازيا الواقعيه اللي كلنا عشناها بس ما عبرناش عنها زيك

28/8/06  
Blogger Ensan said...

عندى تعليق صغير , هو يمكن كلام مكرر
الحوار طبيعى بشكل بشع علشان كده كله معجب بيه ,
ال 5 دقايق جامدين

وبعدين انا مقدرش اقول غير ان الدماغ متكلفة

28/8/06  
Blogger Ensan said...

توضيح , انا كان قصدى بالكلام المكرر تعليقى انا مش الحوار بين محمود ورضوى

28/8/06  
Blogger فنجان قهوة said...

متفقة جدا مع شغف
يا بنتى و الله حاسة بيكى جدا
الكلام مافيش أسهل منه و مافيش أسخف منه
إكبروا شوية بقى و بصوا للموضوع بنظرة أكثر عمقا .. الواقع مش سطحى أوى للدرجادى
و مع ذلك أنا متأكدة إن الحوار واقعى جدا و فيه استرسال عالى وعفوى جدا
فعلا يابنى إنت مش نافع غير فى السينما

30/8/06  
Blogger ماشى الطريق said...

لستُ أدرى :
متشكر جداً
ملك :
فيه فيه
شغف :
يا ستى أنا ما قولتش إن البنت محتاجة الكلام الحلو على طول , أنا بقول إنها ساعات بتبقى محتاجة تسمع كلام حلو و بيبقى أهم بالنسبة لها من حاجات تانية كتيرة
زنجى :
هية فيها حاجات يامة أوى منى
مقدرش أقول غير كده

30/8/06  
Blogger ماشى الطريق said...

عز :
متشكر جداً يا عز على كلامك الحلو ده
AZ :
وجهة نظرك بالنسبة لكلام شغف منطقية جداً, و أنا موافقك فيها جداً
مويا :
يا ستى سلامة قلبك
خلاص مش حكتب كده تانى عشان خاطرك
:)))))))))))))
كلام
أيدى على كتفك
إنسان
مجاملة رقيقة جدا يا عم إنسان و مرحب بيك فى أول فيسيت
فنجان قهوة :
مش نافع فى حاجة غير السينما
متشكر جداً يا ستى
عموماً راجعى ردى و رد أيه زد على شغف

30/8/06  
Blogger piano whispers said...

to7fa begad , begad beyshedeeny fe ketabtak enha begad tabe3eya awi we baseeta awi we betwsal el alb besor3et el sarou7' ;) , we el 7ewar dah mawgoud begad mesh 7aga 7'ayaleya wala mostan3a bas lel asf mafeesh 7aga betkmal le a7'rha mesh 3arfa leyh!!!

30/8/06  
Blogger Ezz said...

سيد الحرافيش و الحكائين و سيد الناس فخر العمر و منتهى الشرف.. نجيب محفوظ أبي و سيدي و معلمي.. إلى رحمة الله.

مقطع من ثرثرة فوق النيل التي كتبت عام 1972:
(.. عليكم اللعنه .. ليس أعدى للكيف من التفكير . وعشرون جوزة كادت أن تضيع هباء . ولا شئ يبدو راسخ الايمان كشجرة البلح ، كما ان اصرار الهاموش يستحق الاعجاب ، ولكن اذا فقدت أنات عمر الخيام حرارتها فقل على الدنيا السلام ، وجميع هؤلاء الساخرين تكوينات ذرية ، وهاهو كل فرد منهم ينحل الى عدد محدود من الذرات . فقدوا الشكل واللون ، اختفوا تمام ، ولم يعد منهم شئ يرى بالعين المجردة ، وليس ثمة هناك الا أصوات .. "

30/8/06  
Blogger sha3'af said...

ساعات ساعات

بصوا بقى ... أنا لسه معترضه
أنا يمكن حطيت الاستثناء القائل بان ساعات البنت بتكون محتاجة أشياء أخرى غير الكلام الحلو ، لأن الصورة العامة المرسخة للبنت هيه كونها حد مستهلك لحلوى الكلام و بس

يمكن غلطت في تركيبة الكلام
لكن اللي أقصده فعلا ، حاولوا تحطوا الاستثناء - اللي هوه برضه طبيعي جدا و واقعي جداا جدا - لصورة البنت في الكتابة نفسها
احنا مش كده

الحاجة التانية ، اني ما أنكرش ان كل انسان طبيعي في الدنيا بيحتاج يسمع كلمة حلوة من حد بيحبه
لكن المشكلة هيه في دلالة " كلمة حلوة " دي اللي اتحصرت بكل سخافة في كلمات محددة اتعلمنا بيها ازاي نعيش الدور

أما الحاجة التالتة بقى
فبالرغم من كل شيء
معاهم جدااا ، و من زمااااااان - من تدويناتك الأولى - انك ما لكش مكان / انت و بعض القليلين الآخرين من المدونين / غير السينيما

30/8/06  
Blogger BaTresYa said...

ماشاء الله صدقني كل كلمه انت كتبتها انا حسيت بيها قبل كدا مش عارفه ازاي
محمود ورضوى كانوا في يوم جزئ من حياتي مش عارفه ازاي
كلامهم شفته في الحقيقه وعرفته
استمر وربنا يوفقكـ

30/8/06  
Blogger *-* Egypti@no *-* said...

الحوار جميل جدا وواقعى - بس عندى تعليق صغير وهو موضوع الثقة ده لأن فعلا أى شاب دلوقتى اللى مخوفه من حبيبته هى حتة الثقة - وده نتيجة اللى بنشوفوه طول اليوم ع الفضائيات واللى كمان بنقراه فى الجرايد ليل ونهار - وأصبح الشاب معندهوش ثقة فى حبيبته بعد ما بيشوف أن الزوجة بتخون ثقة زوجها فى مجتمعنا دلوقتى
وكمان موضوع أنها بتحب محمود حاسس أنه عريان جدا أو بمعنى تانى أنها مش بتحبه من كل قلبها وده برضه نتيجة خوفها أنها ممكن تاخد صابونة فى أى لحظة
بس الحوار روعة جداوأثر فيا لأن حبيبتى برضه اسمها رضوى

31/8/06  
Blogger *~Daisy~* said...

:D gameela awi



AWI

31/8/06  
Blogger moony said...

gamel gdan we zay ma3ala2oo fo2 7lawetha enha tabe3ya gdan

1/9/06  
Blogger ماشى الطريق said...

piano whispers :
للأسف عندك حق مفيش حاجة بتكمل للأخر
shaghaf :
لأ والله أنا مش مقتنع أحلى حاجة بالنسبة لها إنها تسمع كلام حلو يمكن كان زمان الكلام ده لكن دلوقتى البنات بقوا واقعييين جداً ومبقوش بياكلوا من الكلام ده
وده مايمنعش برضوه من إنهم بيحيبوا يسمعوه
إنتى عارفة إنتى عندك حق إن الكلام الحلو فى الحب بقى مكرر بس إنتى مين قالك إن البنت بتكون عارفة الكلام اللى حيتقال ومع ذلك بتستناه و بتحبه
batresya
متشكر جداً على كلامك الحلو ده

1/9/06  
Blogger ماشى الطريق said...

egypti@no :
هى الصراحة حكاية الثقة دى على طول عاملالى صداع فى دماغى مش قادر أهرب منه
daisy :
إنتى أجمل
moony :
شكراً على الزيارة و الكلام الحلو ده

1/9/06  
Blogger bliatsho said...

تصدق فكرتني بنفسي فعلا ..
لا و الله زين

2/9/06  
Blogger moony said...

فانتازيا انا بعتلك التاج ممكن ترد عليه

6/9/06  
Blogger حنين said...

انا كمان حاسة بالشبه ده أوي أوي .. جميلة بجد , وواقعية جدا
و شفافة , يعنى بتوصل للقلب على طول , من غير جواز سفر و لا اسئذان ..
شبهنا ناس كتير ..
حلوة أوي أوي

11/9/06  
Blogger ihapoof said...

So romantic ..
u r very talanted ..
or u really loving someone so much

very good work

14/9/06  
Blogger karakib said...

اكثر من رائع !!!
ده سيناريو مكتوب بحرفيه عاليه اوي
جامد جدا علي فكره
انتوك

17/9/06  
Blogger الوردة السوداء said...

ربنا يوفقك أنت ورضوى

21/9/06  
Blogger zordeak said...

اشكرك كثيرا على خمس دقايق الرومانسية اللى اديتهوملى دوول .., كنت محتاجهم فى الوقت ده
بهنيك عالحوار الواقعى الجامد جدا
انا شايف ان فيا كتيير من محمود .., يا ريت الاقى واحدة زى رضوى ..
بجد انا كنت مبسوط قوى وانا بقرى الحوار ده .., والفكرة جميلة جدا
تحياتى ليك

22/9/06  
Anonymous غير معرف said...

الحوار ده بيوجع في القلب
يخرب بيت الحب و سنينه

22/9/06  
Blogger Guevara said...

جميل جداً بجد .. بس خلاني نفسي أسأل سؤال مخيف : هو الحوار طبيعي فعلاً؟
و لا احنا اللي:
Freaks؟؟؟

4/10/06  
Blogger محمد بدرى said...

جامدة موووت، واحلى حاجه في البوست انه اتكتب وهوا مش بيتكتب

6/10/06  
Blogger sendrlla said...

صدقنى بدات اشك فيك حاسه انا رضوى دى انا وان انت او محمود بقى الشخص اللى انا ارتبط بيه نفس الحوار يمكن يختلف فى حاجات بس اكتر النقط متشابه المعاد الغريب بس ممكن يكون السابعه فى الموقف هنروح الجامعه مع بعض بس ممكن يكون فى دموع وقلبه السكشن علشان يتكلم معايا هنفتح قلبنا لبعض هتكلم معاكى مافيش غير بس انه ممكن يسمعنى بحس انك امى واختى وحبيبتى بحس انك كل حاجه ليه فى الدنيا حاجات كتير وانه يتخيل انه راجه تعبان من العياده وانا اخده فى حضنى واقوله مالك يا حبيبى واطبطب عليه بس هو عايز يسمع منى انا كلام حلو مش بعرف اقوله اعمل ايه وان حكايه حبنا تنفع فيلم عربى لو مش اتجوزنا بعض ونفس الموقف انه يقابلنى فى الشارع وانا معايا بيبى بس هوقالى انه مش هيستحمل يشوفنى كده فعلا وبرده بفس الزعله ونفس الحركات ويقولى نفس الكلام دا يا جماعه والله الموقف طبيعى جدا ومش ممكن يكون من خيال المؤلف الا لو كان بارع او واقع ممزوج بالخيال بس يا خساره

28/10/06  
Blogger Ahmed Essawy said...

اكتر من رائع
ربنا يفتح عليك

9/11/06  
Anonymous غير معرف said...

sweeeet :)

13/12/06  
Blogger Mahmoud said...

على فكرة أنا إسمى محمود و فيا أغلب الصفات اللى إنتا أيلها فى الشخصيه اللى أؤدامنا
بس للإسف مش لائى ولا بنت ممكن تحس بيه

يعنى للأسف نقسى أحب بس مش لائى...للأسف

16/2/07  
Anonymous غير معرف said...

enta aked 3aref en 7ekayatak gamela w bett7as w btwsal l2ay 7ad w aked 3aref en da naga7 gamed gedan bas ele mesta3'rabalo mn el ta3le2at en ma32ol kol enas de bedawar 3ala 7ad y7esohom w y7ebohom w ma32ol kolohom lesa tayhen w ana ele kont fakra en da 7ale ana bas

13/4/07  
Anonymous غير معرف said...

فيها كتير من الواقع انا مثلا من النوع اللى مش بتكلم ولا احب اسمع كلام من ده بس الاجمل لغه العيون

30/5/07  

إرسال تعليق

<< Home

Free Web Site Counters