الخميس، أكتوبر 26، 2006

أنا فى إنتظارك

الساعة : السادسة و ثلث
محمود نائم فى سريره , يرن موبايل محمود , محمود ينظر لشاشة الموبايل , تبدو على عينيه نظرة دهشة
يرد على المكالمة

رضوى : أنا أسفة جداً والله يا محمود إنى صحيتك الصبح بدرى كده
محمود بصوت نصف نائم : خير يا رضوى
رضوى : لأ أصلك أنا كنت مسافرة القاهرة إسبوعين كده تبع الشغل و قولت أسلم عليك قبل ما أمشى
محمود : طيب يا ستى , تروحى و ترجعى بالسلامة إنشاء الله
رضوى : محمود ممكن تركز معايا فى الكلمتين الجايين دول علشان أنا حقولهم على بعض وما تقاطعنيش من فضلك, إحنا لما سبنا بعض يا محمود
محمود : قصدك إنتى لما سيبتنى
رضوى : أنا فعلاً الللى سبتك يا محمود بس أنا قعدت أفكر كتير أوى قبل ماأعمل كده كنت عارفة إن العلاقة بينا ماينفعش تكمل و تستمر . كانت حتبقى الخساير كتيرة أوى , و و و ماتيجى تسلم عليا قبل ماركب القطر
محمود : أيه
رضوى : خلاص خلاص حقك , أنا من إمبارح طالعة فى دماغى فكرة إنى أكلمك أقولك تيجى تسلم عليا , بس عمالة أقول لنفسى أكيد حيرفض بس جيت فى الأخر قولت أقولك و أريح نفسى هاه حتيجى
محمود : لأ طبعاً
رضوى : إحم صباح الإحراج طيب روح كمل نومك يا بشمهندس و أسفين عالأحراج

الساعة : السادسة والنصف
موبايل محمود يرن , محمود ينظر للشاشة , يرى نمرة رضوى تظهر على وجهه علامات الملل , يرد عليها

محمود : أيوة يا رضوى
رضوى : بُص يا محمود فاضل ربع ساعة على ميعاد القطر , إنت ليه ماتجيش طاير
محمود فى دهشة : طاير
رضوى : إنت مش بتحب الفانتازيا , شغل خيالك كده و تعالى طاير
محمود : والله يا رضوى كان بودى بس الجناحين مسلفهم لواحد صاحبى ولسة ماجبهمش
رضوى (تضحك) : أناأصلك من مدة كده دخلت على الصفحة اللى إنت بكتب فيها على النت دى ولقيتك كاتب موضوع إسمه شيكولاتة , إنت كنت تقصدنى بيه صح؟؟
محمود : إشمعنى يعنى
رضوى : أنا فاكرة أصلك حاجة زى كده لما مرة كنت بتكلمنى مرة و أنا فى القاهرة وكنت باكل شيكولاتة وقولتلى إنك عايز تيجى تاكلها معايا
محمود : أيه الذاكرة و الإحراج ده يخرب بيتك , مكدبش عليكى ساعتها فعلاً كان نفسى فى كده , كان بودى إنى أنزل أركب أول حاجة و أجيلك , يعنى يمكن الواحد كان موده عاطفى شوية فى ساعتها , بس للأسف الفكرة الجميلة إنتهت على الورق مش عالطبيعة
رضوى : تفتكر لو كنت جيت و أكلت معايا الشيكولاتة كنا حنسيب بعض
محمود : أيه العلاقة
رضوى : يعنى فكرة إنك تعمل حركة رومانسية زى كده بيخلى من الصعب جداً عليا إنى أسيبك , شوف إحنا نعرف من بعض يا محمود , بس عمرى ما قدرت أحس بمشاعرك الحقيقة تجاهى , حبيبة صديقة أخت تسلية , يمكن حركة زى دى كانت تقربك منى أوى , كُنت محتاجة لأى دلالة لحبك ليا
محمود : تفتكرى بأمانة إنتى كنتى بالنسبالى أيه
صمت
محمود : ألو إنتى معايا
رضوى : مشكلتك يا محمود إن مشاعرك ماكنتش باينة , كنت بتبقى معايا ومش عارفة إنت معايا ولا مع نفسك ولا مع مين بالظبط , أوقات كنت بتقعد ما بتتكلمش تطلع الموبايل و تقعد تلعب فيه و تقولى إتكلمى يا رضوى أنا سامعك , على طول لابس ماسك كأبة , الأوقات اللى كنت بشوف فيها محمود اللى أنا بحبه كانت أوقات قليلة بس هى دى اللى كانت بتخلينى أتمسك بيك
صمت
رضوى : محمود
محمود : أيوة يا رضوى
رضوى : أنا أسفة
محمود : لأ أسفة على أيه , أنا اللى أسف

السابعة إلا ربع
رضوى تبدأ الكلام : مقفلتش موبايلك يعنى
محمود : أقفله ليه
رضوى : يعنى أنا كنت بايخة و سخيفة جداً معاك
محمود : بس كنتى صريحة
رضوى : ِتفتكر
محمود : أكيد ماكونتيش صريحة مية ف المية يعنى , إستحالة إنك تلاقى شخص صريح مية ف المية , هو فى كلامه بيديكى زى ما تقولى كده ماستر كيز , بيقولك كام حاجة بيقدر يقنعك و يقنع نفسه إنه صريح معاكى و مع نفسه
رضوى : طيب تقدر تقولى انا أيه الكلام اللى داريته عليك ومقولتهوش
محمود : الصراحة ماهتمتش إنى أعرفه
رضوى : يا كداب
محمود : متشكر جداً يا ستى
رضوى : مش قصدى والله يا محمود
محمود : أنا عمرى ماقدرت أحدد مشاعرى بالنسبالك يا رضوى , على طول عندى أزمة ثقة فى كل حاجة , حتى فى مشاعرى أنا مش عارف إذا كنت بحبك ولا لأ , مش عارف إنتى بتحبينى ولا لأ , شخص مميز بالنسبة ليكى ولا واحد بتستريحيله وخلاص , لما الراجل فينا بيحب يا رضوى بيبقى نفسه يلاقى فى اللى بيحبها أمه و أخته و حبيبته و قرايبه و أصحابه و حتى عشيقته , انا لو حدور على واحدة الأقى فيها كل ده يبقى بضحك على نفسى , انا بلاقى معاكى حاجة محستهاش مع حد غيرك بحس كده بأمان نفسى , بإنى مهما إن كنت متضايق أو زعلان بحس إنك أكتر شخص ممكن يسمعنى و يفهمنى , ممكن يكون إحساسى غلط بس أنا مقتنع جداً بيه
صمت
محمود : أيه روحتى فين
رضوى : لأ أبداً كنت بسمعك بس
محمود : طيب شوفى طريقك بقى
رضوى : محمود ممكن أطلب منك طلب رذل جداً
محمود : ها قولى يا ستى
رضوى : أنا عايزاك تيجى , بصُ خد تاكسى على حسابى يا عم و تعالى , تعالى و بس مين قالك مش ممكن القطر يتأخر تعالى بقى والنبى , كده كده مش حتخسر حاجة والله
محمود : خلاص يا رضوى مفيش مشكلة
رضوى : عارف يا محمود حتى لو جيت وملحقتش القطر , الفكرة نفسها عظيمة جداً , مش حقدر أوصفلك حالتى المعنوية حتبقى عاملة إزاى و إنت بتكلمنى من على رصيف المحطة و بتقولى إنك ملحقتش القطر , وغلاوتى عندك سيبنى أوصفلك الموقف , مش إنت بس يعنى اللى بتحب السينما
إنت حتوصل المحطة , حتسأل على قطر سبعة بتاع القاهرة , حيقولوك إنه طلع من ربع ساعة كده , أكيد حتتضايق فكرة إنك تحاول تشوف حد قبل ما يسافر ومتلحقوش فكرة سخيفة جداً , خصوصا يعنى لو كان إحم حد عزيز عليك كده , بس يا سيدى حتقوم مطلع الموبايل السونى أريكسون بتاعك , شفت أنا لسة فاكراه إزاى حاسب يا هندسة , لسة بيسقط شبكة ولا صلحته , بس يا سيدى حتقوم طالب نمرة رضوى من عندك , زووم على وشك و إنت بتقولى إنك أسف جداً علشان ملحقتش القطر ,
ساعتها مش عارفة حقولك أيه , أكيد كلام أهبل , معلش يا محمود ولا يهمك شكراً على المحاولة , أهو أنا حبقى عاملة زيك شايلة كلام جوايا بس صعب أوى إنى أوصلهولك


13 Comments:

Blogger sha3'af said...

امممممممم

على فكرة انت بتعرف تحلل الشخصيات كويس

و قادر تعمل توازن حلو جدا بين فهمك لشخصية رضوى و فهمك لشخصية محمود

27/10/06  
Blogger Z_Diva said...

tab mahy 7lwa ahy, wala shiel edak wala y7zanon, mesh hya de brdo, we 2ol lm7moud yro7 leradwa elm7ata, asln hya htfwet elatr wehtstnah 3'alban fabalsh ndala :D

27/10/06  
Blogger باسم شرف said...

والله برافو عليك
سينارست رائع
انت فين ياعم عايزين نبقي نتكلم

وعايزين نقرا بقيت شغلك
قشطة

باسم شرف

27/10/06  
Blogger Ensan said...

اولا مبروك على النشاط فى الكتابة
ثانيا , انا مبحبش اسيب تعليقات علشان مابعرفش اقول ايه و مش عاوز اقول اى كلام , بس فعلا كتاباتك بتشد و تخلى الواحد عاوز يقول اى حاجة حتى لو مش هيقول جديد ,
اقولك لو دى تكلمة لشخيات محمود ورضوى اللى كتبتهم قبل كده , يبقى انت المرادى مركز شوية على رضوى , شخصيتها كانت ظاهرة قوى المرادى , وشخصية محمود وصلنا ( على الاقل ليا انا ) احساسها باقل كلمات ممكنة
الجزء بتاع " موبايل محمود يرن , محمود ينظر للشاشة , يرى نمرة رضوى تظهر على وجهه علامات الملل , يرد عليها
"خلانى اتوقع ناحية تانية فى الاحداث خالص

27/10/06  
Blogger غادة الكاميليا said...

فانتازيا جامده المرة دى على فكرة الكلام مش بس كلام سيناريوهات الكلام واقعي جدا وتحليلاتك فعلا صادقه للشخصيتين زي مشغف قالت لكن انا دايما بقع منك في الحتت الدارجه مش عارفه قلة استمتاع بتلك الاشياء ولا انا بحب امشي في خط مستقيم للحاله؟!مش عارفه بس المهم انى بستمتع

27/10/06  
Blogger ماشى الطريق said...

شغف :
متشكر جداً والله هو مش تحلييل على قد ماهوا معايشة
z-diva
هو لعلمك كان فيه مشهد فعلاً لما راحلها المحطة وكنت كتبته خلاص بس مش عارف حسيت إنى مش عايز أنزله فى البوست
باسم شرف
متشكراً جداً على زيارتك يا سيدى
وإنشاء الله حيبقى لينا كلام قريب
ولو عايز تقرا شغل ليا حتلاقى عنك فى أرشيف المدونة حاجات يامة
ensan
والله هو أنا كسول جداً فى الكتابة وعندك حق فعلاً أنا حسيت قبل كده إنى كنت مركز على محمةد أكتر
قولت أدى رضوى حقها المرادى
غادة الكاميليا
شكراً جداً على كلامك الحلو
بس معلش مفهمتش يعنى أيه
الحتت الدارجة؟؟؟

28/10/06  
Blogger حنين said...

طيب هو وصل لها و للا لسه ؟
تعرف ؟ بتضايق جدا اما اشوف ان علاقة جميلة زى دى كان ممكن انهم يكملوا مع قليل من العقلانية و احتمال الطرف التانى , علاقة زى دى انتهت بسبب سوء تفاهم
حرام و الله ان اجمل العلاقات دايما بتنتهي بسوء تفاهم
الدنيا مش ناقصة ان كمان العلاقات الجميلة تنتهي بسبب غير عقلانى
...

29/10/06  
Blogger Mariam said...

انت فعلا جميل..وصفك للناس قريب جدا..و حوارهم قريب تحس انك قلت الكلام ده قبل كده

29/10/06  
Blogger sabrina said...

كل دة
و الشخصيات اللي بتحللها
وكل االلي انت بتكتبة و ما عرفتش
انها بتحبك
يا بني حرام عليك

1/11/06  
Blogger Zengy said...

يا تفاصيلك يا حاج هوديدو

:D

7/11/06  
Blogger *~Daisy~* said...

ana ba7ebb radwa we mahmoud

8/11/06  
Anonymous غير معرف said...

hi ana sara ana awl mara ad7'ol hena waked awel mara a2ra 7ekayatak ana mesh ha2dar a2ol 3alek 7aga 3'er ene 3ayat lama nermen matet w2aret laha el fat7a ka2ne a3rafha enta aked fahem ma3na kalame ana hage hena 3ala tol w hatabe3 el gded bta3ak salam

13/4/07  
Anonymous غير معرف said...

جامد جدا واللة يا باشا بقولك متضيف ايميلي عندك انا محتاج اتكلم معاك
m.rlo0onely@hotmail.com
or
lamasteek@yahoo.com
or
to0om.crouse@hotmail.com
or
m.-.fadel@hotmail.com

رقمي اهه كمان ياعم اي خناقة
0128347718

ma7moud fadel- zagzig


sallllllllllllllam

6/7/07  

إرسال تعليق

<< Home

Free Web Site Counters