واحشنى يا عمور

إهداء إلى : الضفدع الشجاع

إزيك يا عمور

واحشنى جداً والله يا إبنى

من حوالى عشر تيام كده كنت معدى قدام أبو شوشة ومش عارف أيه اللى فكرنى بيوم كنت أنا و إنت راجعين بليل مش فاكر والله من فين غالباً كانت سينما يعنى

ولما قربنا على أبو شوشة قولنا ننزل نقعد عليها شوية

وكلمنا الولة مهاب و قولناله تعالى والراجل مكدبش خبر و نزل جه قعد معانا

تقريباً ساعتها إحنا مطولناش قعدنا ييجى ساعة كده و شربنا شاى بالنعناع وروحنا على بيتنا بعد ما طبعاً إنت و مهاب بعتونى البيعة المعتادة و سبتونى لوحدى أدور على مواصلات و كل واحد فيكم طلع على بيته

الغريب فى العملية و الغريب جداً إن الحدث ده كان عادى جداً

يعنى بيحصل كتير

بس كان نفسى أعرف فعلاً أيه اللى خلاه ذكرى عندى

و أيه اللى خلانى أفتكرك بيه أوى كده و يحسسنى بأول مرة فعلاً بأد أيه إنت واحشنى و أنا مفتقدك

يعنى أكيد لينا ذكريات أقوى من اليوم ده بكتير جداً

بس أيه اللى خلى اليوم ده بالذات يعلم معايا

الله أعلم

قعدت أحاول ألاقى أى تفسير للعملية والصراحة ماكونتش عايز أبوظ جمال اللحظة فعلاً بأى تفسير للى حصل

أفتكر إن اللى حصل ده فعلاً يندرج تحت جمال المحبة

واحشنى والله يا عمور الكلب

ساعات يا عمور بتسيطر على دماغى فكرة إنى لو جمعت الناس اللى بحبهم, بحبهم فعلاً يعنى مش مجرد أصدقاء أو أشباه أحِبة و سهرت معاهم لوش الصبح كل مشاكلى حتتحل

بجد والله

مش حيبقى ناقصنى غير إنى أصلى الفجر فى الجامع و أروح بيتنا أعمل كوباية شاى بالنعناع و أدخل البلكونة أقعد بالفانلة الداخلية و أفرد رجليا على جدار البلكونة

و بعد كده أخش أنام

حقوم من النوم حلاقى كل مشاكلى إتحلت

الفكرة خيالية جداً و غير واقعية

والله أنا ساعات فعلاً ببقى مقتنع إنها واقعية

يعنى بحس إنى أكيد حقوم من النوم مبسوط أبيض من كل الوساوس و الزبالة اللى فى دماغى و ساعتها فعلاً

الحياة حتبقى منطقية

الفكرة دى مسيطرة على دماغى بقالها فترة لدرجة إنى كنت عايز أعملها فيلم قصير

فى حدود نص ساعة أربعين دقيقة كده

يعنى شاب عايز يجمع أصحابه و يسهر معاهم لحد الصبح

تيمة ظريفة و سهلة جداً فى الكتابة و تجيب شغل سينما فيها زى مانتا عايز

بس أنا فعلاً مكونتش عايزها تبقى بوست أو سيناريو أو حتى فيلم لو مين حتى اللى حيخرجه

إنشالله حتى لو كان عمك بريان دى بالما

تخيل فى يوم كده تلاقى عمك بريان دى بالما متصل بيا و يقولى إنه عجبه السيناريو جداً

متستغربش أوى كده بص فوق كده على إيدك الشمال حتلاقى كلمة فانتازيا

أيوة اللى مكتوبة باللون الأخصر الغريب ده الله ينور عليك

بريان دى بالما : والنبى يا بشمهندس محمود ...لأ والنبى ما تنفعش ... جيسس كرايصت يا بشمهندس محمود السيناريو ده عاجبنى جداً

أنا : يا بريو ماينفعش والله ,إنت حبيبى أى نعم يا بريو و أنا و إنت ولاد نفس الكار بس إنت من أوتومبيل تانى بس السيناريو ده شخصى جداً , سو بيروسنال

بريان دى بالما : بٌص يا حوكة حديك مليون دولار ومتعيش على أهلى

أنا : ممم معيش على أهلك طب ينفع أعيش على زمالكك ههههه إضحك كده يا بريو و بلاش الأكتئاب ده , يا راجل حد يعرف نيكول كيدمان و يكتئب كده

بريان دى بالما : إنجزنى يا حوكة معنديش وقت

أنا : معزوش عليك يا بريان يا خويا , هات مليون جنيه و إنشاله عايزه تعمله فيلم كارتون إعمله

أنا سرحت و هيست جامد , فُكك منى

أشوفك على خير إنشاء الله