الخميس، يناير 11، 2007

Christopher Nolan...thanks man

النهارده كُنت ناوى أول حاجة أعملها الصبح إنى أدخل أكتب بوست يفيد بما معناه إنى حقفل البلوج لفترة ما كنت حسيب البوستات القديمة مش حلغيها يعنى
كنت حاسس إنى عايز أبعد شوية عن البلوج وعن الكتابة بالرغم من إنى أصلاً بكتب كل فين و فين
بس الفكرة كانت مسيطرة على دماغى جداً و أعتقد إنى حنفذها فعلاً قريب جداً
المهم السبب اللى منعنى من إنى أعمل كده إن النت كان مقطوع
المهم إن اليوم مشى طبيعى لحد الساعةخمسة و نص كده قابلت إتنين من أقرب الناس ليا فى الدنيا كريم و مهاب و روحت السينما
طبعاً هما كانوا مستغربين جداً فكرة دخول فيلم يحمل إسم تحدى السحرة
الصراحة الأسم التجارى غبى جداً وسطحى أكتر من الازم و إن كان ماشى الصراحة مع قصة الفيلم و صعوبة نزول فيلم أجنبى بإسم كشف المستور الترجمة الحرفية ا
كما ذُكرت فى الفيلم
و بعد ما لبست كل واحد فيهم عصير غريب بمبلغ هلامى
كريم شرب عصير أناناس بالعسل والغريب إنه معجبوش بالرغم من إنى كنت رشحته ليه بالرغم من إنه ماكانش عاجبنى قبل كده
مهاب شرب عصير غريب جداً إسمه شيلالاليا أو حاجة شبه كده
طبعاً أنا علشان نبيه و إتلدعت قبل كده من الحاجات دى جبت كاكولا عادية و الحمد لله
الفيلم مذهل فعلاً
أنا تقريباً قاعد بكتب البوست ده علشان السطر ده
إذا كنت واحد من عشاق
Christopher Nolan
و أعتقد إنك لو بتحب السينما لازم تكون بتحب أى فيلم من أفلام الراجل ده إن ماكنش التلاتة الأشهر بالنسباله
Memento
Insomnia
Batman Begins
الفيلم ده تحفة جديدة من تحفه
أرض تانية مذهلة فى السينما بتتناول التنافس بين إتنين سحرة فى لندن فى القرن التاسع عشر
مش قصدى سحرة من بتوع هانى بطرس لأ دول سحرة مسرح زى دافيد كوبر فيلد كده
ال بيسير فى أوله بشكل هادى جداً لدرجة إنى قلقت و إبتديت أتخيل الحاجات الوحشة اللى ممكن تحصل فيا بعد الفيلم
مع مرور الوقت و بعد ما الأرضية إتمهدت الفيلم قلب حاجة تانية خالص
إشتغالات بنت لازينة
مساحات للتمثيل صعب جداً إنك تلاقيها أو تخلقها فى أفلام الأشتغالات
مع الأستراحة و بعد ما إنصرف مهاب علشان يروح بيته علشان جاله مغص فظيع فى بطنه
من الواضح إن الشللالايمو ده سره باتع
حاولو تجربوه مش حيعجبكم خالص على ضمانتى
وبعد كمان ما إنضملنا الرفيق سيد يا سيد بعد خمس دقايق من بداية الفيلم
إبتدى النصف التانى مع الفيلم مع المزيد من فتح الفم فى إذبهلال , كدهه زى مانا عامل بالظبط
و كيمة الشتايم اللذيذة اللى خرجت من الأخ كريم دليل على إنه لبس الأشتغالة زى ما الكتاب بيقول
الفيلم طبعاً بينتهى نهاية زى ما توقعناها جميعاً و إن المخرج بيشتغل أو حنقول بيشتغل ناس صيع سينما زينا
لكن للأسف هو فعلاً نجح إنه يشتغلنا فى الأخر
وزى ماقولت لنفسى يعنى الراجل قاعد طول الفيلم يشتغلنى حييجى على أخر الفيلم فى الأشتغالة الكبيرة حيكسفنى
ماهو لازم يلبسنى تانى طبعاً مش كده ولا أيه
صراحةً الفيلم كان فيه كام حتة مش لوجيك أوى بس مش كتير يعنى وده شىء طبيعى فى النوعية من الأفلام دى إستحالة الفيلم يتسبك مية فى المية
خرجنا من الفيلم
الصراحة كنت حاسس إنى مبسوط جداً جداً بشكل كنت نسيته من زمان
أنا بقالى فترة طويلة جداً فى دور إكتئاب لدرجة إنه مبقاش حالة ما ولكنه بقى متعايش معايا
لكن فعلاً لما بشوف فيلم حلو ببقى طالع طاير بقدر فعلاً أعيش لفترة فى مود تانى
الحكاية دى يمكن أخر مرة حصلتلى كانت بعد فيلم ليلة سقوط بغداد
يمكن علشان فيلم فانتازيا و عربى و معمول حلو جداً
ساعتها كتبت بوست بعد الفيلم إسمه تذكرة سينما بس منشرتوش مش فاكر ليه فعلاً
أعتقد إن الحاجات فعلاً اللى بتبهجنى فعلاً و بتحسسنى بمود تانى إنى أصلى الفجر فى الجامع و أجيب بسكوت و عصير و أكلهم و أنا مروح أو أقرا رواية ظريفة أو أشوف فيلم حلو فى السينما
يمكن دى تكون أول مرة ليا إنى أكتب فيها تدوينة حياتية كده , بس أنا فعلاً حاسس إنى فى مود ظريف جداً و كنت عايز أكتب و أنا فيه أى حاجة
أنا حتى نادراً جداً مبكتب تدوينة أونلاين إلا لو كانت حاجة قصيرة جت على بالى كده أو كانت مسيطرة عليا ساعتها
علشان كده ممكن تلاقوا أخطاء إملائية فى البوست أو حاجات مش مفهمومة يا ريت تسامحونى فيها لأنى لو رجعت من الأول علشان أراجع البوست يبقى تسعة و تسعين فى المية مش حنشره
و حاولوا فعلاً تشوفوا الفيلم ده
اه و تشربوا الشلولولو ده ده لذيذ جداً و رخيص جداً جداً ومبيجبش مغص خالص يعنى
وتصبحوا على خير
.......................................................................................
تحديث : أخيراً قريت البوست لأول مرة بالكامل بعد أقل من يوم بكام ساعة كده إكتشفت غلطات إملائية ظريفة ولقيت إن كان فيه كلام مش متركب مظبوط ولقيت إن كان فيه كلام تانى عايز أزوده و كذا حاجةكده , بس فضلت الصراحة إنى أسيب البوست بحالته الأولانية محتفظ بنفس طزاجته و الحالة الجميلة اللى كنت فيها و أنا بكتبه
على فكرة كريم ماكانش بيشرب أناناس بالعسل لو جت على كده كانت بقت هينة هو كان بيشرب عصير صبار بالعسل
اه واالله صبار بالعسل , حد برضوه يشرب يا كوكو صبار بالعسل
ساذج كعهدى بيك دائماً

11 Comments:

Blogger Nour said...

:)و انت من أهل الخير يا محمود

11/1/07  
Anonymous غير معرف said...

اول مرة الصراحة يكون نفسى اكون اول واحد معلق على بوست
يا ريتنى كنت معاكم

11/1/07  
Anonymous غير معرف said...

طب ياعم مش تقول انك رايح سيما تاخدنا معاك


الفيلم دا فين ببقي عشان نروحوا


وشلولولو دا بيتباع فين عشان ما نشربوش ؟


ماشي ماشي


انا هاروح الفيلم ومش هاخدك معايا

11/1/07  
Blogger شغف said...

هوه طبعا شفت لنويل
memento & insomnia
عجبني
insomnia
بالذات اخراج نويل له
لكن ميمنتو اتصدمت لما شفته
لأني كنت بأدور عليه و ما صدقت لاقيته ، و كسر كتير من توقعاتي

هوه صحيح معالجة الفكرة جديدة في الفيلم ده على مستوى السيناريو و الاخراج كمان / لأن فيه أكتر من فيلم تناول حتة فقدان ذاكرة المدى القصير دي / بس مشكلة ممينتو ان نويل كان مستمتع باللعبة الفنية أكتر منه في حالة ابداع حقيقية

فيه فيلم تاني على فكرة ل جريج هاريسون اسمه نوفمبر ، مستخدم فيه تكنيك مشابه لتكنيك نويل في ممنتو ، بس بصراحة شتان ما بين الاتنين ، جريج هاريسون أبدع فعلا في الفيلم و قدر يلمسني بجد


المهم ، بالنسبة لموضوع التدوينة الرئيسي ألا و هو فيلم
the prestige
طبعا مش شفت الفيلم عشان أناقشه
بس المشكلة اني حتى ما فهمتش انت تقصد ايه بكلامك عنه؟
ايه نوعية الاشتغالة اللي الفيلم اشتغالهالك؟
و كانت على أي مستوى ؟
صراحة مافهمتش اي كلمة عن الفيلم منك غير انه كويس


بس عجبني الوصف الدقيق لظروف مشاهدة الفيلم و الشلولولو ده

ده قريب الشلولو ؟ حاجة كده سمعت عنها بيقولوا ان الملوخية من ضمن مكوناتها

12/1/07  
Anonymous غير معرف said...

هف جاكمان جامد جداااا فى النوعيه دى من الافلام شوفتله قبل كده فان هيلسينج و سورد فيش... والواد اللى قدامه بقى (كريستيان بايل) جامد جداااااااااا كان عامل حتة فيلم اسمه
the american psycho
فيلم ملاحيسى بقى على مستوى واسع.. شوفت انا شويه اعلانات عن بريستيج على الدش وشكله جامد.. كويس انك ايدت فكرتى.. هحاول اضحك على اخويا الكبير عشان يدخلهولى هىهىهى

12/1/07  
Anonymous غير معرف said...

وانت من اهله يا فندم .. مبسوطه اوى انك فى موود حلو كده :)

12/1/07  
Blogger ماشى الطريق said...

nour:
و إنتى من أهله يا نور
تصبحى و تمسى على خير إنشاء الله
ملك
وانا والله يا عم كان نفسى تكون معانا
كل مبتجمع أنا و العيال نقعد نتكلم عليك والله ونقول عمران أجدع واحد يقفل على صباعه
لوووووووووووووول
أدم المصرى :
يا عم وعد منى المرة الجاية و إحنا رايحيين إننا مش حنقولك
حاول تدور على العصير ده حيوجعلك بطنك أوى على ضمانتى
shaghaf:
إنتى أول شخص أشوفه مش بيحب مومنتو
فيه أفلام كده مبيفرقش رأى شخص فيها
زى جادفاذر مثلاً
أنا شايف إن مومنتو ده كان نقلة جامدة جداً فى السينما من غير كلام
التدوينة والله ماكانتش عن
the prestige
هى كانت عبارة عن حالة معينة و أنا مش كاتب نقد عن الفيلم يعنى
دى بس مجرد ملاحظات سريعة
AZ:
أنصحك فعلاً إنك تضحكى على أخوكى الكبير و تخليه يدخلك السينما
بس إوعى يضحك عليكى ويشربك شلالليمو
ولو معزمكيش على السينما يبقى يستحق إنك تعزميه على شلالليمو فعلاً
الفيلم يستحق إنه يتشاف
MOIA
شكراً جداً والله يا مويا يا عسل
و أنا مبسوط جداً إنى في مود حلو نفسى أفضل فيه ولو إسبوع حتى

12/1/07  
Blogger شغف said...

هوه كنت عاوزة أقول إن أصلا الأذواق الشخصية غالبا ما بيفرقش رأي حد فيها أصلا

و لو انت بتتكلم عن مومنتو من حيث قدم ايه في تاريخ السينيما دي حاجة ، و لما تتكلم عنه بصفته عمل ابداعي مفرد دي حاجة تانية
و تقدير عمل ما حاجة --- ( و ده بيصب في النقطة الأولانية ) ، و الاعجاب بيه و التماس معاه دي حاجة تانية

فالمسألة انك تحدد أي نقطة بتتكلم فيها أساسا

و برضة أنا ماقلتش انك كاتب نقد عن الفيلم --- واضح يعني من التدوينة
لكن المسألة اني مش فاهمه الحالة نفسها لأني مش فاهمة مصطلحاتك في التعبير عن الأشياء --- هذا كل شيء
تحياتي
:)

13/1/07  
Blogger روز said...

جميلة جدا روح الطفولة و البساطة دى : انبسطت فكتبت , اللى فيها ؟
طبعا ما فيهاش حاجة , بس احيانا الواحد بيبقى مشغلها اكتئاب شوية
تعيش و تنبسط
:):):)

14/1/07  
Anonymous غير معرف said...

مش عارفه هيا فره فى البلد ان الناس تقفل البلوجات بتاعتها ولا ايه
بقولك ايه ياض اثبت مطرحك اللى هيقفل المدوزنه هيتثبت انا بقولكو اهو مش ناقصه اكتئاب اكتر من كدا
ايموشنز عيات جامد اوى
ودينى والنبى واحد شلالالا بالعسل وصلحو

15/1/07  
Anonymous غير معرف said...

christopher nolan da 3abkary, el film gamed...EL AFLAM gamda... though i didnt see batman begins.

w howa ghalebn ana el 3araby el kowayes 3andy khalas da3 la2eny makhadtesh baly men ay 7aga ghalat fel post!!!

really nice blog btw (howa ana 2olt keda abl keda? )

18/1/07  

إرسال تعليق

<< Home

Free Web Site Counters