الاثنين، أغسطس 27، 2007

براح شاغر

على فكرة أنا سهل أوى إنك تبسطنى
و تقدر أوى تضحك عليا و تاكل بقلبى حلاوة بكلمة عادية أو ضحكة أو حتى إبتسامة بسيطة
و ساعات بيكفينى منك غمزة شقية ححملها فوق طاقتها و حفهم منها مليون رسالة
و ممكن مكالمة أو مسج و ساعات برنة علشان تعرف أد أيه أنا متسامح يا عم معاك
و ساعات حكون طماع و حغلبك معايا
معلش بس حقولك أنا محتاج أكتر من كل ده
و حطالبك بحضن و بوسة على خدى و كمان واحدة على جبينى و حقولك أحضن و خبط على ضهرى جامد
و على فكرة أنا على طول بناديك و بقولك تعالى يا عم قلبى أهوه مفتوحلك خش براحتك
بس إنت عارف على طول بتكسف أقولهالك عينى عينك
بلمحلك بقلبى و ببقى عارف إنك لقطت الأشارة
و كل أما تيجى من غير عزومة ولا منادية بفرح بيك أوى
و بفرشلك قلبى مش عارف أيه
إلا صحيح هو القلب بيتفرش أيه
أصلك أنا قعدت أكتب و روود و ياسمين بس لقيت الجملة سخيفة
و زى ما لقيت برضوه فكرة إنى أفرشلك قلبى فكرة سخيفة
وزى الأحساس اللى بحسه لما بكتب كلمة شخيفة و بحس إن حاجات يامة أوى فى حياتى سخيفة
بُص تعال و نخليها بظروفها

التسميات:

10 Comments:

Blogger M.R said...

مش عارف ممكن اقول و لا لأ
بس ع العموم بيتهيألي القلب بيتفرش ناس، روايح، وجع.... يعني و وردة لكل ده

28/8/07  
Blogger islamz said...

القلب يتفرش احاسيس ومشاعر
القلب يتفرش بالحنان على اللى بتحبه
القلب يتفرش كلام جميل يتقال للحبيب
القلب يتفرش قلق ممتع فى انتظار الحبيب
القلب يتفرش روحانيات فى الايام المفترجة

القلب يتفرش كل شيء جميل ..

28/8/07  
Blogger AZ said...

القلب يتفرش من عبدالرحيم عمرو

29/8/07  
Blogger حنين said...

ورد وياسمين طبعا..دي حاجات جميلة أوي :)
*******
عدي عندي هنا لو سمحت
http://nomenoskingdom.blogspot.com/2007/08/blog-post_29.html
******
وعقبال ما تيجي بالسلامة ..انت وحشت اسكندرية !

29/8/07  
Blogger كرانيش said...

ياريت فى منك كتييييييييييييير

29/8/07  
Blogger Oreka said...

ايموشن واحد اخرس ...
بيقولك بالاشاره أباااه أباااه صلى عالنبى يا اوستاذ..:))))))

1/9/07  
Blogger نهر الحب said...

جميله قوي

مش لاقيه كلام

3/9/07  
Blogger Ezz said...

حبيبي و إبن حبيبي و شريك الغربه رغم إننا في بلدين مختلفين بس جنب بعض عموما.

القلب بيتفرش بسجادة الرضا.... الرضا ده حاجه حلوه بجد و انت راجل ربنا حباه بشوية رضا حلوين.. ربنا يكرمك يا وحش... رائع يا ماشي كعهدي بك

8/9/07  
Blogger حزيــــــــــــــــــن said...

ربما يبعدنا الفراق
لكن يبقى بيننا حنين

9/9/07  
Blogger حواديت said...

كل سنه وانت طيب يا حوده ورمضان كريم

15/9/07  

إرسال تعليق

<< Home

Free Web Site Counters